ദുരന്തതീരമായി എസെക്സ് ബീച്ച്: വിനോദയാത്രയ്ക്കിടെ കടലിൽ മുങ്ങി കൗമാരക്കാരിയടക്കം രണ്ടുപേർക്ക് ദാരുണാന്ത്യം.

എസെക്സ്: യുകെയിലെ എസെക്സിലുള്ള വെസ്റ്റ് മെർസി തീരത്ത് കടലിൽ കുളിക്കാനിറങ്ങിയ സംഘം അപകടത്തിൽപ്പെട്ട് കൗമാരക്കാരിയായ പെൺകുട്ടിയും നാല്പതുകളിൽ പ്രായമുള്ള സ്ത്രീയും മുങ്ങിമരിച്ചു. ബുധനാഴ്ച വൈകുന്നേരം സീവ്യൂ അവന്യൂവിന് സമീപമാണ് ദാരുണമായ സംഭവം നടന്നത്. ഒപ്പമുണ്ടായിരുന്ന മറ്റൊരാൾ ഗുരുതരാവസ്ഥയിൽ ആശുപത്രിയിൽ ചികിത്സയിലാണ്. ജീവന് ഭീഷണിയില്ലാത്ത പരിക്കുകളോടെ രണ്ട് പേരെക്കൂടി ആശുപത്രിയിൽ പ്രവേശിപ്പിച്ചതായി എസെക്സ് പോലീസ് സ്ഥിരീകരിച്ചു.

അപകടത്തിൽപ്പെട്ടവരെല്ലാം പരസ്പരം അറിയുന്നവരാണെന്നാണ് പ്രാഥമിക നിഗമനം. ബുധനാഴ്ച വൈകുന്നേരം 5.35-ഓടെ വിവരമറിഞ്ഞെത്തിയ എയർ അംബുലൻസും അടിയന്തര രക്ഷാസേനയും ചേർന്ന് രക്ഷാപ്രവർത്തനം നടത്തിയെങ്കിലും രണ്ട് പേരുടെ ജീവൻ രക്ഷിക്കാനായില്ല. ഒരാളെ വ്യോമമാർഗ്ഗവും മൂന്ന് പേരെ റോഡ് മാർഗ്ഗവുമാണ് സമീപത്തെ ആശുപത്രികളിലേക്ക് മാറ്റിപ്പാർപ്പിച്ചത്.

നാടിനെ നടുക്കിയ ഈ ദാരുണ സംഭവത്തിൽ പോലീസും പ്രാദേശിക ജനപ്രതിനിധികളും അനുശോചനം അറിയിച്ചു. ശക്തമായ ഒഴുക്കിന് സാധ്യതയുള്ള പ്രദേശമാണിതെങ്കിലും സാധാരണയായി അപകടസാധ്യത കുറഞ്ഞ തീരമായാണ് വെസ്റ്റ് മെർസിയെ കണക്കാക്കാറുള്ളതെന്ന് പ്രദേശിക എം.പി ബെർണാഡ് ജൻകിൻ പറഞ്ഞു. അപകടം നടക്കുന്ന സമയത്ത് തീരത്തുണ്ടായിരുന്നവരും ദൃശ്യങ്ങളോ വിവരങ്ങളോ കൈവശമുള്ളവരും അന്വേഷണവുമായി സഹകരിക്കണമെന്ന് പോലീസ് അഭ്യർത്ഥിച്ചു.

യുകെയിൽ വേനൽക്കാലം ആരംഭിച്ച മേയ് പകുതിക്ക് ശേഷം തുറസ്സായ ജലാശയങ്ങളിൽ മുങ്ങിമരിക്കുന്നവരുടെ എണ്ണം ആശങ്കാജനകമായി ഉയരുകയാണ്. നാഷണൽ വാട്ടർ സേഫ്റ്റി ഫോറത്തിന്റെ കണക്കനുസരിച്ച് ഇതുവരെ 29-ലധികം ആളുകളാണ് ഇത്തരത്തിൽ അപകടത്തിൽപ്പെട്ട് ജീവൻ വെടിഞ്ഞത്. അപകടത്തെത്തുടർന്ന് താൽക്കാലികമായി അടച്ച വെസ്റ്റ് മെർസി ബീച്ച് വ്യാഴാഴ്ച രാവിലെയോടെ പൊതുജനങ്ങൾക്കായി വീണ്ടും തുറന്നുകൊടുത്തു