തടവുകാരെ നേരത്തെ മോചിപ്പിക്കാനുള്ള വിവാദ നീക്കം യുകെ സർക്കാർ പുനഃപരിശോധിക്കുന്നു.

ബാത്ത്: യുകെയിലെ ജയിലുകളിൽ തടവുകാരുടെ എണ്ണം പരിധിവിട്ടതിനെത്തുടർന്ന് കൊലപാതകികൾ, ബലാത്സംഗക്കേസ് പ്രതികൾ ഉൾപ്പെടെയുള്ള കുറ്റവാളികളെ സെപ്റ്റംബറിൽ നേരത്തെ മോചിപ്പിക്കാനുള്ള വിവാദ പദ്ധതി പുനഃപരിശോധിക്കുമെന്ന് യുകെ പ്രധാനമന്ത്രി ആൻഡി ബേൺഹാം അറിയിച്ചു. കടുത്ത ജനരോഷത്തെയും ഇരകളുടെ കുടുംബങ്ങളുടെയും സന്നദ്ധ സംഘടനകളുടെയും ശക്തമായ എതിർപ്പിനെയും തുടർന്നാണ് സർക്കാരിന്റെ ഈ പിന്മാറ്റം. ഏകദേശം 6,000 തടവുകാരെ ഇലക്ട്രോണിക് ടാഗുകൾ ഘടിപ്പിച്ച് സമൂഹത്തിലേക്ക് തുറന്നുവിടുന്നതിന് മുൻപായി, ഈ നയത്തിന്റെ എല്ലാ വശങ്ങളും ജസ്റ്റിസ് സെക്രട്ടറി അലക്സ് നോറിസുമായി ചേർന്ന് വിശദമായി പരിശോധിക്കുമെന്ന് പ്രധാനമന്ത്രി വ്യക്തമാക്കി. മുൻപ് കീർ സ്റ്റാമർ സർക്കാരിന്റെ കാലത്താണ് ജയിൽ പ്രതിസന്ധി പരിഹരിക്കാൻ ഈ പുതിയ നിയമം പാസാക്കിയത്.

ഡ്യൂട്ടിക്കിടെ കൊല്ലപ്പെട്ട പോലീസ് ഉദ്യോഗസ്ഥൻ പി.സി. ആൻഡ്രൂ ഹാർപ്പറിന്റെ കൊലയാളികൾക്കും ഈ നിയമപ്രകാരം ഇളവ് ലഭിച്ചേക്കുമെന്ന വാർത്തകൾ പുറത്തുവന്നതോടെയാണ് പ്രതിഷേധം ശക്തമായത്. മുൻ സേഫ്ഗാർഡിംഗ് മന്ത്രി ജെസ് ഫിലിപ്സ് ഉൾപ്പെടെയുള്ളവർ സ്ത്രീകൾക്കെതിരെ അതിക്രമം നടത്തിയ ക്രിമിനലുകളെ മോചിപ്പിക്കുന്നതിനെതിരെ രംഗത്തുവന്നിരുന്നു. അടിയന്തിര സാഹചര്യങ്ങളിൽ മുൻ സർക്കാർ പതിനായിരക്കണക്കിന് തടവുകാരെ വിട്ടയച്ചപ്പോൾ ഗുരുതര കുറ്റകൃത്യങ്ങൾ ചെയ്തവരെ ഒഴിവാക്കിയിരുന്നു.

ഡ്യൂട്ടിക്കിടെ കൊല്ലപ്പെടുന്ന അടിയന്തിര വിഭാഗം ജീവനക്കാരുടെ കൊലയാളികൾക്ക് കടുത്ത ശിക്ഷ ഉറപ്പാക്കുന്ന ‘ഹാർപ്പേഴ്സ് ലോ’ കൊണ്ടുവരാൻ പോരാടിയ ആൻഡ്രൂ ഹാർപ്പറിന്റെ വിധവ ലിസി ഹാർപ്പർ, നിലവിലെ സർക്കാരിന്റെ നീക്കത്തിൽ കടുത്ത നിരാശ രേഖപ്പെടുത്തി. അന്ന് ലേബർ പാർട്ടിയും കൺസർവേറ്റീവ് പാർട്ടിയും ഒരുപോലെ പിന്തുണച്ച ആ നിയമം ഇന്ന് വിസ്മരിക്കപ്പെട്ടതുപോലെ തോന്നുന്നുവെന്ന് അവർ പറഞ്ഞു. സർക്കാരിന്റെ പുനഃപരിശോധനാ തീരുമാനത്തെ ഇരകൾക്ക് വേണ്ടി പ്രവർത്തിക്കുന്ന സന്നദ്ധ സംഘടനകൾ സ്വാഗതം ചെയ്തു. തടവുകാർ നേരത്തെ പുറത്തിറങ്ങുന്നതിനെക്കുറിച്ച് ഇരകൾക്ക് യാതൊരു വിവരവും ലഭിക്കാത്ത നിലവിലെ സാഹചര്യം മാറണമെന്ന് ‘വിക്ടിം സപ്പോർട്ട്’ ചീഫ് എക്സിക്യൂട്ടീവ് കാറ്റി കെമ്പൻ ആവശ്യപ്പെട്ടു.