ഡെമോക്രാറ്റിക് സെനറ്റർ ജോൺ ഫെറ്റർമാനെ റിപ്പബ്ലിക്കൻ പാർട്ടിയിലേക്ക് ക്ഷണിച്ച് ഡോണാൾഡ് ട്രംപ്

വാഷിംഗ്‌ടൺ ഡി.സി.:അമേരിക്കൻ കോൺഗ്രസിന്റെ നിയന്ത്രണം ആര് കൈയാളണമെന്ന് തീരുമാനിക്കുന്ന ഇടക്കാല തിരഞ്ഞെടുപ്പ് (Midterm Elections) വരാനിരിക്കെ, പ്രമുഖ ഡെമോക്രാറ്റിക് സെനറ്റർ ജോൺ ഫെറ്റർമാനോട് റിപ്പബ്ലിക്കൻ പാർട്ടിയിലേക്ക് മാറാൻ പരസ്യമായി ആവശ്യപ്പെട്ട് യു.എസ് പ്രസിഡന്റ് ഡൊണാൾഡ് ട്രംപ്. “അദ്ദേഹം ഒരു റിപ്പബ്ലിക്കനായി മാറുന്നത് കാണാൻ ഞാൻ ആഗ്രഹിക്കുന്നു” എന്ന് ടെന്നസിയിലെ റാലിക്ക് ശേഷം വാഷിംഗ്‌ടണിൽ തിരിച്ചെത്തിയ ട്രംപ് മാധ്യമപ്രവർത്തകരോട് പറഞ്ഞു. ഡെമോക്രാറ്റ് എന്നതിനേക്കാൾ റിപ്പബ്ലിക്കൻ പാർട്ടിയിലാണ് ഫെറ്റർമാന് കൂടുതൽ ശോഭിക്കാൻ കഴിയുകയെന്നും ട്രംപ് കൂട്ടിച്ചേർത്തു.

പെൻസിൽവേനിയയിൽ നിന്നുള്ള സെനറ്ററായ ജോൺ ഫെറ്റർമാൻ 2022-ൽ തിരഞ്ഞെടുക്കപ്പെട്ടപ്പോൾ ഡെമോക്രാറ്റിക് പാർട്ടിയുടെ പ്രധാന താരങ്ങളിലൊരാളായിരുന്നു. എന്നാൽ, കുടിയേറ്റം, ഇസ്രായേൽ തുടങ്ങിയ വിഷയങ്ങളിൽ പാർട്ടി നിലപാടുകളിൽ നിന്ന് വ്യത്യസ്തമായ സമീപനം സ്വീകരിച്ചതോടെയാണ് അദ്ദേഹം പാർട്ടി മാറുമെന്ന തരത്തിലുള്ള അഭ്യൂഹങ്ങൾ ഉയർന്നത്. റിപ്പബ്ലിക്കൻ പാർട്ടിയുടെ ഇടക്കാല തിരഞ്ഞെടുപ്പ് കൺവെൻഷനിൽ സംസാരിച്ചതും സഹ സെനറ്ററായ റിപ്പബ്ലിക്കൻ നേതാവ് ഡേവ് മക്കോർമിക്കിനെ പ്രശംസിച്ചതും ഡെമോക്രാറ്റുകൾക്കിടയിൽ അമർഷത്തിന് ഇടയാക്കിയിരുന്നു.

എന്നാൽ, റിപ്പബ്ലിക്കൻ പാർട്ടിയിലേക്ക് മാറുമെന്ന വാർത്തകളെ ഫെറ്റർമാൻ നേരത്തെ തള്ളിക്കളഞ്ഞിട്ടുണ്ട്. താൻ ഡെമോക്രാറ്റുകൾക്കൊപ്പം തന്നെ വോട്ട് ചെയ്യുന്ന വ്യക്തിയാണെന്നും റിപ്പബ്ലിക്കൻ പാർട്ടിയിലേക്ക് മാറിയാൽ അത് കടുത്ത പരാജയമായിരിക്കുമെന്നുമാണ് അദ്ദേഹം നിലപാടെടുത്തിരുന്നത്. താൻ എപ്പോഴും അമേരിക്കയ്ക്ക് ഒപ്പമായിരിക്കും നിൽക്കുകയെന്നും തീവ്രവാദ നിലപാടുകളെയും സോഷ്യലിസത്തെയും തള്ളിക്കളയുമെന്നും അദ്ദേഹം വ്യക്തമാക്കിയിരുന്നു.

സെനറ്റിൽ ഭൂരിപക്ഷം തിരിച്ചുപിടിക്കാൻ ഡെമോക്രാറ്റുകൾക്ക് നാല് സീറ്റുകൾ കൂടി ആവശ്യമുള്ള സാഹചര്യത്തിൽ ഫെറ്റർമാന്റെ നിലപാടുകൾ ഏറെ നിർണ്ണായകമാണ്. ഇറാൻ യുദ്ധവും രാജ്യത്തെ സാമ്പത്തിക സ്ഥിതിയും റിപ്പബ്ലിക്കൻ പാർട്ടിക്ക് തിരിച്ചടിയാകുമ്പോൾ സെനറ്റിലെ ആധിപത്യം നിലനിർത്താൻ ഫെറ്റർമാനെ പോലൊരു പ്രമുഖ നേതാവിനെ തങ്ങളുടെ പാളയത്തിൽ എത്തിക്കാനാണ് ട്രംപും റിപ്പബ്ലിക്കൻ പാർട്ടിയും ശ്രമിക്കുന്നത്. ഫെറ്റർമാൻ പാർട്ടി മാറുകയാണെങ്കിൽ അത് അമേരിക്കൻ രാഷ്ട്രീയത്തിൽ വൻ ചലനങ്ങൾ സൃഷ്ടിക്കും