ഞാൻ മത്സരിക്കുന്നുവെന്ന് കരുതി വോട്ട് ചെയ്യണം; റിപ്പബ്ലിക്കൻ കൺവെൻഷനിൽ അപേക്ഷയുമായി ഡൊണാൾഡ് ട്രംപ്.

ഡാലസ്: വരാനിരിക്കുന്ന ഇടക്കാല തിരഞ്ഞെടുപ്പിൽ താൻ മത്സരരംഗത്തില്ലെങ്കിലും തന്നെ മുൻനിർത്തി വോട്ട് ചെയ്യണമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് അഭ്യർത്ഥിച്ചു. ഡാലസിൽ രണ്ട് ദിവസങ്ങളിലായി നടന്ന റിപ്പബ്ലിക്കൻ പാർട്ടിയുടെ ആദ്യ ഇടക്കാല കൺവെൻഷന്റെ സമാപന സമ്മേളനത്തിലാണ് ട്രംപ് വിവാദമായ ഈ അഭ്യർത്ഥന നടത്തിയത്. റീട്ടെയിൽ വിലക്കയറ്റവും ഇറാൻ യുദ്ധവും കാരണം ജനപ്രീതി കുത്തനെ ഇടിഞ്ഞ സാഹചര്യത്തിലാണ് പിന്തുണ ഉറപ്പാക്കാൻ ട്രംപ് നേരിട്ട് രംഗത്തിറങ്ങിയത്.

താൻ സ്ഥാനാർത്ഥിയാണെന്ന് കരുതി വോട്ട് ചെയ്യണമെന്ന് ആവശ്യപ്പെട്ട ട്രംപ്, സദസ്സിലുള്ളവരോട് വിശ്വസ്തത സത്യപ്രതിജ്ഞയും ചെയ്യിപ്പിച്ചു. റിപ്പബ്ലിക്കൻ പാർട്ടിക്ക് ഇരുസഭകളിലും ഭൂരിപക്ഷം ലഭിച്ചാൽ ഓരോ പൗരനും 5,000 ഡോളർ വീതം ‘ട്രംപ് ഡിവിഡൻഡ്’ നൽകുമെന്ന വാഗ്ദാനവും അദ്ദേഹം ആവർത്തിച്ചു. എന്നാൽ ഡെമോക്രാറ്റുകൾ ഇതിനെ തെരഞ്ഞെടുപ്പ് കൈക്കൂലി എന്ന് വിശേഷിപ്പിച്ചു തള്ളിക്കളയുകയും, സാധാരണക്കാർ വിലക്കയറ്റം കൊണ്ട് ബുദ്ധിമുട്ടുമ്പോൾ ട്രംപ് ആഡംബര പാർട്ടി നടത്തുകയാണെന്ന് വിമർശിക്കുകയും ചെയ്തു.

സമ്മേളനത്തിൽ സംസാരിച്ച ട്രംപിന്റെ മൂത്ത മകൻ ഡൊണാൾഡ് ട്രംപ് ജൂനിയർ, ഡെമോക്രാറ്റുകൾ രാജ്യത്ത് കമ്മ്യൂണിസം നടപ്പിലാക്കാൻ ശ്രമിക്കുകയാണെന്ന് ആരോപിച്ചു. സെനറ്റർ ടെഡ് ക്രൂസ്, ആരോഗ്യ സെക്രട്ടറി റോബർട്ട് എഫ് കെന്നഡി ജൂനിയർ തുടങ്ങിയവരും ഡെമോക്രാറ്റിക് പാർട്ടിക്കെതിരെ കടുത്ത വിമർശനങ്ങളാണ് ഉന്നയിച്ചത്. കഴിഞ്ഞ വർഷം കൊല്ലപ്പെട്ട തീവ്ര വലതുപക്ഷ പ്രവർത്തകൻ ചാർലി കിർക്കിനുള്ള ആദരാഞ്ജലികളും 9/11 ഭീകരാക്രമണത്തിന്റെ വാർഷികത്തോടനുബന്ധിച്ചുള്ള പ്രത്യേക സ്മരണാഞ്ജലികളും കൺവെൻഷനിൽ നടന്നു.

ഒക്ടോബറിലെ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് തിരിച്ചടി നേരിട്ടാൽ ട്രംപിന്റെ അടുത്ത രണ്ട് വർഷത്തെ ഭരണം കൂടുതൽ പ്രതിസന്ധിയിലാകും. ജനങ്ങളുടെ കണ്ണിൽ പൊടിയിടാനുള്ള വെറുമൊരു നാടകം മാത്രമാണ് ഈ കൺവെൻഷനെന്ന് ഡെമോക്രാറ്റുകൾ കുറ്റപ്പെടുത്തുന്നുണ്ടെങ്കിലും, തങ്ങളുടെ അടിത്തറ ശക്തമാക്കാൻ ഈ ഒത്തുചേരൽ സഹായിച്ചെന്നാണ് റിപ്പബ്ലിക്കൻ ക്യാമ്പിന്റെ വിലയിരുത്തൽ.