ജന്തർ മന്ദാറിൽ പ്രതിഷേധം; ‘കോക്രോച്ച്’ പ്രസ്ഥാന നേതാക്കൾക്ക് ജയിൽ ശിക്ഷ!

ന്യൂഡൽഹി, ഇന്ത്യ: ഡൽഹി ജന്തർ മന്ദാറിലെ നിരോധനാജ്ഞ ലംഘിച്ച് പ്രതിഷേധിച്ച ‘കോക്രോച്ച് ജനതാ പാർട്ടി’ (CJP) പ്രസ്ഥാനത്തിന്റെ രണ്ട് യുവനേതാക്കളെ അഞ്ച് ദിവസത്തേക്ക് ജയിലിലടച്ചു. അശുതോഷ് റാങ്ക, സൗരവ് ദാസ് എന്നിവരെയാണ് പോലീസ് ബാരിക്കേഡുകൾ ചാടികടന്ന് ദേശീയപതാകയേന്തി പ്രതിഷേധിച്ചതിന് കോടതി തിഹാർ ജയിലിലേക്ക് അയച്ചത്. ഡൽഹിയിലെ പ്രതിഷേധങ്ങളുടെ പ്രധാന കേന്ദ്രമായിരുന്ന ജന്തർ മന്ദാറിൽ ഡൽഹി പോലീസ് ഏർപ്പെടുത്തിയ വിലക്കിനെതിരെയാണ് പ്രസ്ഥാനം രംഗത്തെത്തിയത്.

കഴിഞ്ഞ വാരാന്ത്യത്തിൽ ഡൽഹിയിലുണ്ടായ പോലീസ് നടപടികൾക്കും ജന്തർ മന്ദാറിലെ പ്രതിഷേധ വിലക്കിനുമെതിരെയുള്ള പ്രതിഷേധത്തിന്റെ ഭാഗമായാണ് നേതാക്കൾ രംഗത്തിറങ്ങിയത്. തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന് ആവശ്യപ്പെട്ട് സിജെപി കഴിഞ്ഞ ദിവസം ജന്തർ മന്ദാറിൽ പ്രതിഷേധം സംഘടിപ്പിച്ചിരുന്നു. കോടിക്കണക്കിന് വോട്ടർമാരുടെ പേരുകൾ വോട്ടർ പട്ടികയിൽ നിന്ന് നീക്കംചെയ്തുവെന്നാരോപിച്ച് പ്രതിപക്ഷ കക്ഷികളും വിദ്യാർത്ഥി സംഘടനകളും സമരരംഗത്തുണ്ട്.

പ്രതിഷേധങ്ങളെ പ്രതിരോധിക്കാൻ ഡൽഹിയിൽ വലിയ തോതിൽ അർദ്ധസൈനിക വിഭാഗങ്ങളെയും പൊലീസിനെയും വിന്യസിച്ചിരുന്നു. ആയിരക്കണക്കിന് ആളുകളെയാണ് പോലീസ് കസ്റ്റഡിയിലെടുത്തത്. ജന്തർ മന്ദാറിലെ പ്രതിഷേധങ്ങൾക്ക് ഇനി അനുമതി നൽകില്ലെന്നും മറ്റ് മൂന്ന് സ്ഥലങ്ങളിലേക്ക് പ്രതിഷേധങ്ങൾ മാറ്റുമെന്നുമുള്ള പോലീസിന്റെ തീരുമാനത്തിനെതിരെ വലിയ പ്രതിഷേധമാണ് ഉയർന്നിട്ടുള്ളത്. ജയിലിലടച്ച നേതാക്കൾക്ക് പിന്തുണയുമായി പ്രതിപക്ഷ നേതാവ് രാഹുൽ ഗാന്ധിയും രംഗത്തെത്തിയിട്ടുണ്ട്.

യുവജന പ്രസ്ഥാനങ്ങളുടെ പ്രതിഷേധങ്ങളെ അടിച്ചമർത്താനാണ് സർക്കാർ ശ്രമിക്കുന്നതെന്ന് സിജെപി സ്ഥാപകൻ അഭിജിത് ദീപ്കെ ആരോപിച്ചു. ഇന്ത്യയിലെ ജനങ്ങളുടെ ശബ്ദം ഇല്ലാതാക്കാനാവില്ലെന്നും ജന്തർ മന്ദാറിലെ പ്രതിഷേധങ്ങൾ തുടരുമെന്നും അദ്ദേഹം വ്യക്തമാക്കി. രാജ്യത്ത് നടന്നുക്കൊണ്ടിരിക്കുന്ന ഭരണകൂട നടപടികൾക്കെതിരെ അന്താരാഷ്ട്ര തലത്തിൽ മനുഷ്യാവകാശ സംഘടനകളും ആശങ്ക പ്രകടിപ്പിച്ചിട്ടുണ്ട്.