ചൈന വിട്ടോടിയിട്ടും രക്ഷയില്ല; യുകെയിൽ അഭയം തേടിയ വിമതന് സ്വന്തം നാട്ടുകാരിൽ നിന്ന് തന്നെ ക്രൂരമായ അധിക്ഷേപം!

ലണ്ടൻ :ലണ്ടനിൽ വെച്ച് ചൈനീസ് ഭരണകൂടത്തിനെതിരെ പ്രതിഷേധം സംഘടിപ്പിച്ചതിന് പിന്നാലെ യുകെയിലേക്ക് പലായനം ചെയ്ത ചൈനീസ് വിമതൻ ഹോങ് ക്വിക്ക് (Hong Qi), ബ്രിട്ടീഷ് പൊലീസിൽ നിന്ന് സഹായം തേടിയപ്പോൾ ചൈനീസ് അനുകൂലിയായ ഇന്റർപ്രെറ്റർ (ഭാഷാന്തരകർത്താവ്) വഴി അധിക്ഷേപം നേരിടേണ്ടി വന്നു. കഴിഞ്ഞ വർഷം മൊബൈൽ ഫോൺ ഉപയോഗിച്ച് ചൈനയിലെ ഒരു കെട്ടിടത്തിലേക്ക് വിദൂരമായി ഭരണവിരുദ്ധ മുദ്രാവാക്യങ്ങൾ പ്രൊജക്റ്റ് ചെയ്ത് വാർത്തകളിൽ ഇടംപിടിച്ച വ്യക്തിയാണ് ക്വി. ചൈനീസ് അധികൃതർ ബാങ്ക് അക്കൗണ്ടുകൾ മരവിപ്പിച്ചതിനെ തുടർന്ന് ഭാര്യയും മക്കളുമായി തെരുവിൽ കഴിയേണ്ടി വരുമോ എന്ന ഭയത്താലാണ് അദ്ദേഹം യുകെ പൊലീസിന്റെ ഹെൽപ്പ് ലൈൻ നമ്പറായ 101-ൽ വിളിച്ച് സഹായം അഭ്യർത്ഥിച്ചത്.

എന്നാൽ ഡെവോൺ ആൻഡ് കോൺവാൾ പൊലീസിൽ നിന്ന് സഹായം ലഭിക്കുന്നതിന് പകരം, ചൈനീസ് മെയിൻലാൻഡ് ഉച്ചാരണത്തിൽ സംസാരിച്ച ഇന്റർപ്രെറ്റർ അദ്ദേഹത്തിന് നേരെ രാഷ്ട്രീയപരമായ അധിക്ഷേപം നടത്തുകയായിരുന്നുവെന്ന് ക്വി ആരോപിക്കുന്നു. എന്തുകൊണ്ടാണ് ചൈനയെ സ്നേഹിക്കാത്തതെന്നും, പണമില്ലാതെ എന്തിനാണ് മക്കളെ കഷ്ടപ്പെടുത്താൻ ഇങ്ങോട്ട് കൊണ്ടുവന്നതെന്നും ചോദിച്ച ഇന്റർപ്രെറ്റർ, ക്വിയുടെ നിസ്സഹായാവസ്ഥ പൊലീസിനെ അറിയിക്കാൻ വിസമ്മതിക്കുകയും ചെയ്തു. ഈ സംഭവത്തിൽ പരാതി നൽകി മൂന്ന് ആഴ്ചയ്ക്ക് ശേഷം, ഇന്റർപ്രെറ്ററെ നൽകിയത് ഒരു സ്വകാര്യ കരാർ ഏജൻസിയാണെന്നും അതിനാൽ തങ്ങൾക്ക് ഇതിൽ ഉത്തരവാദിത്തമില്ലെന്നുമാണ് പൊലീസ് അറിയിച്ചത്.

ആവശ്യത്തിന് ചൈനീസ് ഇന്റർപ്രെറ്റർമാർ ഇല്ലാത്തത് യുകെയിലെ ചാരക്കേസ് അന്വേഷണങ്ങളെപ്പോലും പ്രതികൂലമായി ബാധിക്കുന്നുണ്ട്. അടുത്തിടെ നടന്ന ഒരു ചൈനീസ് ചാരക്കേസിന്റെ വിചാരണ വേളയിൽ, ഭാഷാ വിദഗ്ദ്ധരുടെ കുറവ് മൂലം പ്രതികളുടെ ഡിജിറ്റൽ തെളിവുകൾ സമയബന്ധിതമായി പരിശോധിക്കാൻ കഴിയാതെ വരികയും, നിയമപരമായ തടങ്കൽ കാലാവധി കഴിഞ്ഞതിനെത്തുടർന്ന് പ്രതികൾ രാജ്യം വിട്ടുപോവുകയും ചെയ്ത സംഭവം കോടതിയിൽ ചർച്ചയായിരുന്നു. വിദേശത്തുനിന്നുള്ള ഇത്തരം വലിയ വെല്ലുവിളികളെ നേരിടാൻ ചൈനീസ് ഭാഷാ പഠനത്തിൽ യുകെ വലിയ മുന്നൊരുക്കങ്ങൾ നടത്തേണ്ടതുണ്ടെന്ന് ഗവേഷണ സംഘടനകൾ ചൂണ്ടിക്കാണിക്കുന്നു.