ചെങ്കടൽ സംഘർഷം മുതലെടുത്ത് കടൽക്കൊള്ളക്കാർ; ആഫ്രിക്കൻ തീരങ്ങളിൽ കപ്പൽ വേട്ട രൂക്ഷം.

സോമാലിയ : ആഫ്രിക്കൻ തീരങ്ങളിൽ ചരക്കുകപ്പലുകളെയും എണ്ണടാങ്കറുകളെയും ലക്ഷ്യമിട്ടുള്ള സോമാലിയൻ കടൽക്കൊള്ളക്കാരുടെ ആക്രമണങ്ങൾ പത്തുവർഷത്തിനിടയിലെ ഏറ്റവും ഉയർന്ന നിരക്കിലെത്തി. യുഎസ്-ഇസ്രായേൽ-ഇറാൻ സംഘർഷങ്ങളെ തുടർന്ന് ചെങ്കടൽ മേഖലയിലെ അന്താരാഷ്ട്ര നാവികസേനകളുടെ ശ്രദ്ധ മാറിയതാണ് കൊള്ളക്കാർക്ക് വീണ്ടും അവസരമൊരുക്കിയത്. ഏപ്രിൽ മാസത്തിന് ശേഷം എണ്ണടാങ്കറുകളും സൈനിക സാമഗ്രികൾ കടത്തിയ കപ്പലുകളും ഉൾപ്പെടെ എട്ടോളം കപ്പലുകളാണ് സോമാലിയൻ തീരത്ത് കൊള്ളക്കാർ തട്ടിക്കൊണ്ടുപോയത്.

ഹൂതി ആക്രമണങ്ങളും യുദ്ധഭീതിയും കാരണം ഭൂരിഭാഗം വാണിജ്യ കപ്പലുകളും സോമാലിയൻ തീരത്തോട് ചേർന്നുള്ള പാതകളിലൂടെ സഞ്ചരിക്കാൻ നിർബന്ധിതരായതാണ് അപകടസാധ്യത വർദ്ധിപ്പിച്ചത്. അടുത്തിടെ തുർക്കിയിലേക്ക് സൈനിക സാമഗ്രികളുമായി പോയ ‘ലുതുഫ്’ (Lutuf) എന്ന കപ്പൽ തട്ടിക്കൊണ്ടുപോയ കൊള്ളക്കാർക്ക് 2.5 മില്യൺ ഡോളർ മോചനദ്രവ്യം നൽകിയാണ് മോചിപ്പിച്ചതെന്ന് റിപ്പോർട്ടുകളുണ്ട്. ഇത്തരം വലിയ തുകകൾ മോചനദ്രവ്യമായി ലഭിക്കുന്നത് കൂടുതൽ യുവാക്കളെ ഈ കുറ്റകൃത്യത്തിലേക്ക് ആകർഷിക്കുന്നു.

അത്യാധുനിക സാങ്കേതികവിദ്യകളും ഉപഗ്രഹ ഇന്റർനെറ്റ് സേവനങ്ങളായ ‘സ്റ്റാർലിങ്ക്’ (Starlink) അടക്കമുള്ളവയും ഉപയോഗിച്ചാണ് കൊള്ളക്കാർ ഇപ്പോൾ കപ്പലുകളുടെ നീക്കങ്ങൾ നിരീക്ഷിക്കുന്നത്. മുൻപ് പിടിച്ചെടുത്ത വലിയ കപ്പലുകൾ ‘മദർഷിപ്പുകൾ’ ആക്കി മാറ്റി കടലിൽ പട്രോളിംഗ് നടത്താനും ഇവർ ഉപയോഗിക്കുന്നു. സോമാലിയൻ പ്രദേശങ്ങളിലെ രാഷ്ട്രീയ അസ്ഥിരതയും അൽ-ഷബാബ് തീവ്രവാദ ഗ്രൂപ്പുകളുടെ സാന്നിധ്യവും കടൽക്കൊള്ള വർദ്ധിക്കാൻ കാരണമായി ചൂണ്ടിക്കാണിക്കപ്പെടുന്നു.

മുൻകാലങ്ങളിൽ അന്താരാഷ്ട്ര നാവികസേനകൾ സംയുക്തമായി നടത്തിയ പ്രതിരോധ പ്രവർത്തനങ്ങളാണ് കൊള്ളയെ തടഞ്ഞുനിർത്തിയിരുന്നത്. എന്നാൽ നിലവിലെ ആഗോള സാഹചര്യത്തിൽ സമാനമായ വലിയ നാവിക ദൗത്യങ്ങൾ നടപ്പിലാക്കാൻ രാജ്യങ്ങൾ തയാറാകാത്തത് പ്രതിസന്ധി രൂക്ഷമാക്കുന്നു. കപ്പലുകൾക്ക് മോചനദ്രവ്യം നൽകുന്നത് അവസാനിപ്പിക്കുകയും കരമാർഗ്ഗമുള്ള വികസനവും സുരക്ഷയും ഉറപ്പാക്കുകയും ചെയ്താലേ ഈ ഭീഷണി പൂർണ്ണമായി ഇല്ലാതാക്കാൻ സാധിക്കൂ എന്ന് വിദഗ്ദ്ധർ ഓർമ്മിപ്പിക്കുന്നു.