ചാരിറ്റി ആശുപത്രികളുടെ മറവിൽ കോർപ്പറേറ്റ് കൊള്ള; യുഎസ് ആരോഗ്യ മേഖലയിൽ പ്രൈവറ്റ് ഇക്വിറ്റി നിക്ഷേപങ്ങൾക്കെതിരെ കടുത്ത നിയന്ത്രണത്തിന് ശുപാർശ.

വാഷിംഗ്ടൺ: അമേരിക്കയിലെ പ്രൈവറ്റ് ഇക്വിറ്റി ഫാമുകളും ലാഭേച്ഛയില്ലാതെ പ്രവർത്തിക്കുന്ന (Nonprofit) ആരോഗ്യ സംരക്ഷണ സ്ഥാപനങ്ങളും തമ്മിലുള്ള സംയുക്ത സംരംഭങ്ങളിൽ (Joint Ventures) സർക്കാർ മേൽനോട്ടം ശക്തമാക്കണമെന്ന് ആവശ്യപ്പെട്ട് നിരീക്ഷണ സംഘടനയായ ‘പ്രൈവറ്റ് ഇക്വിറ്റി സ്റ്റേക്ക്ഹോൾഡർ പ്രോജക്റ്റ്’ (PESP) രംഗത്ത്. ഇത്തരം പങ്കാളിത്തങ്ങൾ രോഗികൾക്കും ജീവനക്കാർക്കും വലിയ രീതിയിലുള്ള സുരക്ഷാ ഭീഷണികൾ ഉയർത്തുന്നുണ്ടെന്ന് സംഘടന പുറത്തുവിട്ട പുതിയ റിപ്പോർട്ടിൽ വ്യക്തമാക്കുന്നു.

കഴിഞ്ഞ ദശകത്തിൽ മാത്രം അമേരിക്കൻ ആരോഗ്യ മേഖലയിൽ കടം അടിസ്ഥാനമാക്കിയുള്ള ഇടപാടുകളിലൂടെ ഒരു ട്രില്യൺ ഡോളറിലധികം തുകയാണ് പ്രൈവറ്റ് ഇക്വിറ്റി ഫണ്ടുകൾ നിക്ഷേപിച്ചിട്ടുള്ളത്. ലാഭേച്ഛയില്ലാതെ പ്രവർത്തിക്കുന്ന ചാരിറ്റബിൾ ആശുപത്രികൾ തങ്ങളുടെ സാമൂഹിക പ്രതിബദ്ധത മറന്ന് ഇത്തരം കോർപ്പറേറ്റ് നിക്ഷേപകരുമായി കൈകോർക്കുന്നത് വലിയ നിയമപ്രശ്നങ്ങൾക്കും ഇടയാക്കുന്നുണ്ട്. നിലവിലെ യുഎസ് നിയമപ്രകാരം ചാരിറ്റി പ്രവർത്തനങ്ങൾ തുടരുന്നിടത്തോളം കാലം ഈ ആശുപത്രികൾക്ക് വലിയ നികുതിയിളവുകൾ ലഭിക്കും.

 സാമ്പത്തിക പ്രതിസന്ധി മൂലം അടിസ്ഥാന മെഡിക്കൽ സാമഗ്രികൾ പോലും ഇല്ലാതിരുന്ന ഈ ശൃംഖലയ്ക്ക് കീഴിലെ രണ്ട് പ്രമുഖ ആശുപത്രികൾ ഒടുവിൽ പൂട്ടേണ്ടി വന്നിരുന്നു. സമാനമായ രീതിയിൽ നോർത്ത് കരോലിനയിലെ വിൽസൺ മെഡിക്കൽ സെന്ററിൽ പ്രൈവറ്റ് ഇക്വിറ്റി കമ്പനിയായ അപ്പോളോ ഗ്ലോബൽ മാനേജ്മെന്റ് പങ്കാളിത്തം നേടിയതിന് ശേഷം ചികിത്സാ പിഴവ് മൂലം രണ്ട് രോഗികൾ മരണപ്പെട്ടതായും കടുത്ത നിയമലംഘനങ്ങൾ നടന്നതായും യുഎസ് ഫെഡറൽ ഏജൻസി കണ്ടെത്തിയിരുന്നു.

എന്നാൽ ഈ വിഷയത്തിൽ ഭിന്നരൂപത്തിലുള്ള അഭിപ്രായങ്ങളും ആരോഗ്യ വിദഗ്ദ്ധർക്കിടയിലുണ്ട്. പ്രൈവറ്റ് ഇക്വിറ്റി ഫണ്ടുകൾ വഴി എത്തുന്ന നിക്ഷേപം അടിസ്ഥാന സൗകര്യങ്ങൾ മെച്ചപ്പെടുത്താനും ജീവനക്കാരുടെ എണ്ണം വർദ്ധിപ്പിക്കാനും സഹായിക്കുമെന്നാണ് അനുകൂലിക്കുന്നവരുടെ വാദം. നിലവിൽ അമേരിക്കയിലെ 40 ശതമാനത്തോളം ആശുപത്രികളും വലിയ സാമ്പത്തിക നഷ്ടത്തിലാണ് മുന്നോട്ട് പോകുന്നത്. ട്രംപ് ഭരണകൂടം ആരോഗ്യ മേഖലയിലും സാധാരണക്കാർക്കുള്ള ഇൻഷുറൻസ് പദ്ധതിയായ മെഡിക്കെയ്ഡിലും (Medicaid) വലിയ വെട്ടിക്കുറവുകൾ പ്രഖ്യാപിച്ച പശ്ചാത്തലത്തിൽ, ഇത്തരം വലിയ നിക്ഷേപങ്ങൾ ലാഭേച്ഛയില്ലാത്ത ആശുപത്രികളുടെ നിലനിൽപ്പിന് ആവശ്യമാണെന്നും ഒരു വിഭാഗം സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു.