ഗ്രിഡ് നവീകരണം വൈകിയാൽ വൈദ്യുതി ബിൽ കുത്തനെ ഉയരും; മുന്നറിയിപ്പുമായി യുകെ പബ്ലിക് ഓഡിറ്റ് ഓഫീസ്.

ലണ്ടൻ: രാജ്യത്തെ വൈദ്യുതി ഗ്രിഡ് നവീകരണ പ്രവർത്തനങ്ങൾ വേഗത്തിലാക്കിയില്ലെങ്കിൽ ഉപയോക്താക്കൾക്ക് വലിയ തുക വൈദ്യുതി ബില്ലായി നൽകേണ്ടി വരുമെന്ന് നാഷണൽ ഓഡിറ്റ് ഓഫീസിന്റെ (NAO) മുന്നറിയിപ്പ്. കാറ്റാടിപ്പാടങ്ങളിൽ നിന്നും സൗരോർജ്ജ നിലയങ്ങളിൽ നിന്നും ഉൽപ്പാദിപ്പിക്കുന്ന ശുദ്ധമായ ഊർജ്ജം വീടുകളിലേക്ക് എത്തിക്കുന്നതിനായി 70 ബില്യൺ പൗണ്ടിന്റെ പദ്ധതികളാണ് സർക്കാർ നടപ്പിലാക്കുന്നത്. എന്നാൽ ഈ നവീകരണ പ്രവർത്തനങ്ങൾ വേഗത്തിൽ പൂർത്തിയായില്ലെങ്കിൽ പഴകിയ ശൃംഖലകൾ കൈകാര്യം ചെയ്യാനുള്ള അധിക ചെലവ് ഉപഭോക്താക്കളുടെ തലയിൽ കെട്ടിവെക്കേണ്ടി വരും.

2030-ഓടെ ഗ്രിഡ് നവീകരണം പൂർത്തിയാക്കാനാണ് ലക്ഷ്യമിടുന്നതെങ്കിലും ആവശ്യമായ 80 പ്രോജക്റ്റുകളിൽ 16 എണ്ണം മാത്രമാണ് ഇതുവരെ പൂർത്തിയായിട്ടുള്ളത്. ആവശ്യത്തിന് വൈദ്യുതി എത്തിക്കാൻ കഴിയാത്ത അവസരങ്ങളിൽ കാറ്റാടി വൈദ്യുത നിലയങ്ങൾ ഓഫ് ചെയ്യുകയും പകരം ചെലവേറിയ ഗ്യാസ് പ്ലാന്റുകൾ പ്രവർത്തിപ്പിക്കുകയും ചെയ്യേണ്ടി വരുന്നുണ്ട്. ഇതുവഴിയുള്ള അധിക ചെലവ് 2030-ഓടെ പ്രതിവർഷം 7.8 ബില്യൺ പൗണ്ടായി ഉയരാൻ സാധ്യതയുണ്ടെന്ന് ഓഡിറ്റ് ഓഫീസ് വ്യക്തമാക്കി.

സ്വകാര്യ കമ്പനികളുടെ സഹകരണത്തോടെ നടപ്പിലാക്കുന്ന ഈ പദ്ധതിയിലൂടെ വർഷാവർഷമുള്ള ചെലവ് 2.5 ബില്യൺ പൗണ്ടിൽ നിന്ന് 11 ബില്യൺ പൗണ്ടായി വർദ്ധിപ്പിക്കേണ്ടതുണ്ട്. പദ്ധതികൾ സമയബന്ധിതമായി പൂർത്തിയാക്കിയാൽ ഓരോ കുടുംബത്തിനും പ്രതിവർഷം 30 പൗണ്ടോളം ലാഭിക്കാൻ കഴിയുമെന്നാണ് റെഗുലേറ്ററായ ഓഫ്ജെം (Ofgem) കണക്കാക്കുന്നത്. എന്നാൽ ഈ ലക്ഷ്യം കൈവരിക്കുന്നത് വളരെ വെല്ലുവിളി നിറഞ്ഞതാണെന്നും പല പദ്ധതികളും 2030-ന് ശേഷവും നീണ്ടുപോകാൻ സാധ്യതയുണ്ടെന്നും റിപ്പോർട്ടിൽ പറയുന്നു.

വർഷങ്ങളായുള്ള നിക്ഷേപക്കുറവാണ് ഗ്രിഡ് സംവിധാനത്തെ പ്രതിസന്ധിയിലാക്കിയതെന്ന് ഊർജ്ജ മന്ത്രി മൈക്കൽ ഷാങ്ക്സ് വ്യക്തമാക്കി. അന്താരാഷ്ട്ര വിപണിയിലെ ഇന്ധനവില വർദ്ധനവിൽ നിന്ന് ഉപഭോക്താക്കളെ സംരക്ഷിക്കാനും ഹരിത ഊർജ്ജത്തിലേക്ക് പൂർണ്ണമായി മാറാനും ഗ്രിഡ് നവീകരണം അടിയന്തരമായി നടപ്പിലാക്കേണ്ടതുണ്ട്. പദ്ധതികളുടെ പുരോഗതിയും ചെലവുകളും കൂടുതൽ സുതാര്യമാക്കണമെന്ന് പാർലമെന്റിന്റെ പബ്ലിക് അക്കൗണ്ട്സ് കമ്മിറ്റിയും ആവശ്യപ്പെട്ടിട്ടുണ്ട്.