ക്യാൻസർ പേടിയില്ലാതെ ബ്രെഡ് ടോസ്റ്റ് ചെയ്യാം: വിപ്ലവകരമായ ‘ജീൻ എഡിറ്റഡ്’ ഗോതമ്പ് വികസിപ്പിച്ചു.
ലണ്ടൻ : ടോസ്റ്റ് ചെയ്ത ബ്രെഡ് കഴിക്കുമ്പോൾ ഉണ്ടാകാൻ സാധ്യതയുള്ള ക്യാൻസർ ഭീഷണി കുറയ്ക്കാൻ സഹായിക്കുന്ന പുതിയയിനം ഗോതമ്പ് ശാസ്ത്രജ്ഞർ വികസിപ്പിച്ചെടുത്തു. ഹെർട്ട്ഫോർഡ്ഷെയറിലെ റോതംസ്റ്റഡ് റിസർച്ചിലെ ഗവേഷകരാണ് ‘ക്രിസ്പർ’ (Crispr) എന്ന ജീൻ എഡിറ്റിംഗ് സാങ്കേതികവിദ്യ ഉപയോഗിച്ച് ഈ നേട്ടം കൈവരിച്ചത്. ഗോതമ്പിലടങ്ങിയിരിക്കുന്ന ‘ഫ്രീ അസ്പരാജിൻ’ (Free Asparagine) എന്ന അമിനോ ആസിഡാണ് ബ്രെഡ് ചൂടാക്കുമ്പോഴോ വറുക്കുമ്പോഴോ ‘അക്രിലാമൈഡ്’ (Acrylamide) എന്ന വിഷാംശമായി മാറുന്നത്.
ഇത് മനുഷ്യരിൽ ക്യാൻസറിന് കാരണമായേക്കാമെന്ന് ശാസ്ത്രലോകം നേരത്തെ തന്നെ മുന്നറിയിപ്പ് നൽകിയിരുന്നു. എന്നാൽ പുതിയ സാങ്കേതികവിദ്യയിലൂടെ ഗോതമ്പിലെ അസ്പരാജിന്റെ അളവ് ഗണ്യമായി കുറയ്ക്കാൻ ശാസ്ത്രജ്ഞർക്ക് സാധിച്ചു.രണ്ട് വർഷം നീണ്ട പരീക്ഷണങ്ങൾക്കൊടുവിൽ, ക്രിസ്പർ രീതിയിലൂടെ ഉൽപ്പാദിപ്പിച്ച ഗോതമ്പിൽ അസ്പരാജിന്റെ അളവ് 59% മുതൽ 93% വരെ കുറഞ്ഞതായി കണ്ടെത്തി.
ഇത് വിളവിനെ ബാധിക്കാതെ തന്നെ സാധ്യമായി എന്നതുകൂടി ഈ കണ്ടുപിടുത്തത്തിന്റെ വലിയ പ്രത്യേകതയാണ്. രാസവസ്തുക്കൾ ഉപയോഗിച്ച് ജീനുകളിൽ മാറ്റം വരുത്തുന്ന പഴയ രീതികളിൽ വിളവ് 25 ശതമാനത്തോളം കുറയാറുണ്ടായിരുന്നു. എന്നാൽ പുതിയ കൃത്യതയാർന്ന ജീൻ എഡിറ്റിംഗിലൂടെ ഗുണമേന്മയേറിയതും സുരക്ഷിതവുമായ ഗോതമ്പ് ഉൽപ്പാദിപ്പിക്കാം.
യൂറോപ്യൻ യൂണിയൻ ഭക്ഷണപദാർത്ഥങ്ങളിലെ അക്രിലാമൈഡ് അളവിൽ കർശനമായ നിയന്ത്രണങ്ങൾ ഏർപ്പെടുത്താനിരിക്കെ, ഭക്ഷ്യ ഉൽപ്പാദകർക്ക് വലിയ ആശ്വാസം നൽകുന്നതാണ് ഈ കണ്ടുപിടുത്തം. ബ്രിട്ടനിലെ പുതിയ നിയമനിർമ്മാണങ്ങൾ ഇത്തരം പരീക്ഷണങ്ങൾക്ക് വേഗത കൂട്ടുമ്പോൾ, ഇത് ഭാവിയിലെ കൃഷിരീതികളിലും ഭക്ഷ്യസുരക്ഷയിലും വിപ്ലവകരമായ മാറ്റങ്ങൾ കൊണ്ടുവരുമെന്ന് ഗവേഷകർ പ്രത്യാശിക്കുന്നു.
