ഒറ്റപ്പെടലും പിന്തുണയില്ലായ്മയും; ഇംഗ്ലണ്ടിൽ നൂറിലധികം ‘കെയർ ലീവേഴ്സ്’ മരണപ്പെട്ടു, വൻ പ്രതിഷേധം!

ലണ്ടൻ: ഇംഗ്ലണ്ടിൽ സർക്കാരിന്റെ സംരക്ഷണ കാലാവധി (Care) പൂർത്തിയാക്കി പുറത്തിറങ്ങുന്ന ചെറുപ്പക്കാർക്കിടയിൽ (Care Leavers) വൻതോതിലുള്ള മരണനിരക്ക് രേഖപ്പെടുത്തിയതായി ഞെട്ടിക്കുന്ന റിപ്പോർട്ട്. 18 വയസ്സ് തികയുന്നതോടെ സോഷ്യൽ സർവീസസിൽ നിന്നുള്ള പിന്തുണ പെട്ടെന്ന് നിൽക്കുന്നതും കടുത്ത ഒറ്റപ്പെടലുമാണ് ഒരു വർഷത്തിനിടെ നൂറിലധികം ചെറുപ്പക്കാരുടെ ജീവനെടുത്തതെന്ന് സർക്കാർ നിയോഗിച്ച അവലോകന സമിതി കണ്ടെത്തി. 2025-ൽ 18-നും 24-നും ഇടയിൽ പ്രായമുള്ള 112 കെയർ ലീവർമാരുടെ മരണമാണ് പഠനവിധേയമാക്കിയത്.

സാധാരണ ജനവിഭാഗങ്ങളെ അപേക്ഷിച്ച് ഈ വിഭാഗത്തിലെ മരണനിരക്ക് മൂന്നോ നാലോ മടങ്ങ് കൂടുതലാണെന്ന് ക്ലെയർ ചേംബർലെയ്ൻ, ആഷ്‌ലി ജോൺ-ബാപ്റ്റിസ്റ്റ് എന്നിവരുടെ നേതൃത്വത്തിലുള്ള സമിതി വ്യക്തമാക്കി. മരണപ്പെട്ടവരിൽ 36 ശതമാനം പേരും ആത്മഹത്യ ചെയ്തതാണെന്നാണ് പ്രാഥമിക നിഗമനം. ഇതിൽ 24 യുവതികളും ഉൾപ്പെടുന്നു. 18 വയസ്സ് പൂർത്തിയാകുമ്പോൾ തന്നെ 20 ശതമാനം മരണങ്ങൾ സംഭവിക്കുന്നത് ഈ സമയത്ത് ഇവർക്ക് ലഭിക്കേണ്ട സംരക്ഷണവും സഹായങ്ങളും പൂർണ്ണമായി നിലയ്ക്കുന്നത് കൊണ്ടാണെന്ന് റിപ്പോർട്ട് ചൂണ്ടിക്കാണിക്കുന്നു.

സംവിധാനങ്ങളുടെ ഭാഗത്തുനിന്നുണ്ടാകുന്ന ഈ വീഴ്ച രാജ്യത്തിന് തന്നെ വലിയൊരു അപമാനമാണെന്നും കുട്ടികളുടെയും മുതിർന്നവരുടെയും സോഷ്യൽ കെയർ മേഖലകളിൽ വലിയ പരിഷ്കരണങ്ങൾ ആവശ്യമാണെന്നും ചിൽഡ്രൻസ് മിനിസ്റ്റർ ജോഷ് മക്അലിസ്റ്റർ പ്രതികരിച്ചു. 18 വയസ്സിൽ സഹായങ്ങൾ അവസാനിപ്പിക്കുന്നതിന് പകരം 0 മുതൽ 25 വയസ്സ് വരെ സംരക്ഷണം നൽകുന്ന ഏകീകൃത സംവിധാനം കൊണ്ടുവരണമെന്ന് സമിതി നിർദ്ദേശിച്ചു. കൃത്യമായ മാനസികാരോഗ്യ പരിശീലനം ലഭിച്ച ഉദ്യോഗസ്ഥരെ ഇത്തരം യുവാക്കളുടെ മേൽനോട്ടത്തിനായി നിയമിക്കണമെന്നും ആവശ്യമുയർന്നിട്ടുണ്ട്.

ഈ വൻ ദുരന്തത്തിന്റെ പശ്ചാത്തലത്തിൽ, സംരക്ഷണം കഴിഞ്ഞിറങ്ങുന്ന ചെറുപ്പക്കാർക്കായി 25 ദശലക്ഷം പൗണ്ടിന്റെ സുരക്ഷിത ഭവന പദ്ധതി സർക്കാർ പ്രഖ്യാപിച്ചു. കൂട്ടായ താമസസൗകര്യങ്ങളും മാനസിക പിന്തുണയും ഉറപ്പാക്കുന്ന രീതിയിലാണ് പദ്ധതി രൂപകൽപ്പന ചെയ്യുന്നത്. സർക്കാരിനും സോഷ്യൽ കെയർ രംഗത്തിനും പുറമെ കെയർ ലീവേഴ്‌സിന് സമൂഹത്തിൽ സൗഹൃദ അന്തരീക്ഷവും പിന്തുണയും ഉറപ്പാക്കാൻ പൊതുജനങ്ങളും മുന്നോട്ട് വരണമെന്ന് മന്ത്രി അഭ്യർത്ഥിച്ചു.