എൽ.എ മേയർ പോരാട്ടം മുറുകുന്നു: രാഷ്ട്രീയ പരിചയക്കുറവ് തള്ളി പ്രറ്റ്; വെല്ലുവിളിയുമായി ഇടതുപക്ഷ താരം നിത്യ രാമൻ!

ലോസ് ആഞ്ചലസ്:  ലോസ് ആഞ്ചലസ്   മേയർ സ്ഥാനത്തേക്ക് മത്സരിക്കുന്ന പ്രായോഗിക രാഷ്ട്രീയ പരിചയമില്ലാത്ത പ്രറ്റിനെതിരെ (Pratt) ശക്തമായ വിമർശനങ്ങളാണ് ഉയരുന്നത്. എന്നാൽ ഈ ആശങ്കകളെ പൂർണ്ണമായും തള്ളിക്കളയുകയാണ് അദ്ദേഹം ചെയ്യുന്നത്. മോശം നേതൃത്വത്തിന് കീഴിൽ തന്റെ ജന്മനാട് നശിച്ചുപോകുന്നത് കണ്ടുനിന്ന ഒരാളാണ് താനെന്നും, ആ കാഴ്ചയാണ് തന്റെ ഏറ്റവും വലിയ രാഷ്ട്രീയ പരിചയമെന്നുമാണ് കഴിഞ്ഞ ആഴ്ച സോഷ്യൽ മീഡിയയിലൂടെ അദ്ദേഹം പ്രതികരിച്ചത്.

​ഒരു രജിസ്റ്റേഡ് റിപ്പബ്ലിക്കൻ പാർട്ടി അംഗമായ പ്രറ്റിന്, ഡെമോക്രാറ്റിക് പാർട്ടിക്ക് കടുത്ത സ്വാധീനമുള്ള ലോസ് ആഞ്ചലസിൽ നിലവിലെ മേയർ കാരെൻ ബാസിനെതിരെ വിജയിക്കുക എന്നത് വലിയൊരു വെല്ലുവിളിയാണ്. ലോസ് ആഞ്ചലസിൽ ഒട്ടും ജനപ്രീതിയില്ലാത്ത ഡൊണാൾഡ് ട്രംപ് പ്രറ്റിന് പിന്തുണ പ്രഖ്യാപിച്ചിരുന്നുവെങ്കിലും, പ്രറ്റ് ആ പിന്തുണയെ തള്ളിക്കളയുകയാണ് ചെയ്തത്. താൻ ദേശീയ രാഷ്ട്രീയത്തിലല്ല, മറിച്ച് പ്രാദേശിക പ്രശ്നങ്ങളിലാണ് ശ്രദ്ധ കേന്ദ്രീകരിക്കുന്നതെന്ന് അദ്ദേഹം വ്യക്തമാക്കി.

​അതേസമയം, നഗരത്തെ ശരിയായ ദിശയിലേക്ക് നയിക്കാൻ ആവശ്യമായ മാറ്റം താനാണെന്നാണ് ഡെമോക്രാറ്റിക് സോഷ്യലിസ്റ്റായ നിത്യ രാമൻ വിശ്വസിക്കുന്നത്. 2020-ൽ ഡേവിഡ് റ്യൂവിനെ പരാജയപ്പെടുത്തിക്കൊണ്ട് അവർ നേടിയ വിജയം രാജ്യത്തുടനീളമുള്ള ഇടതുപക്ഷ സ്ഥാനാർത്ഥികൾക്ക് വലിയ ആവേശമാണ് നൽകിയത്. വാടക വർദ്ധനവ് നിയന്ത്രിച്ചതും തന്റെ മണ്ഡലത്തിലെ താൽക്കാലിക താമസസ്ഥലങ്ങൾ (Encampments) പകുതിയായി കുറച്ചതുമുൾപ്പെടെയുള്ള നേട്ടങ്ങൾ ചൂണ്ടിക്കാണിച്ചാണ് രാമൻ വോട്ട് തേടുന്നത്. നഗരത്തിലുടനീളം കൂടുതൽ ഭവന നിർമ്മാണ പദ്ധതികൾ കൊണ്ടുവരിക എന്നതാണ് അവരുടെ പ്രധാന ലക്ഷ്യം.​

പല വിഷയങ്ങളിലും ബാസും രാമനും യോജിച്ചുപോകുന്നുണ്ടെങ്കിലും, ലോസ് ആഞ്ചലസിലെ പ്രധാന പ്രശ്നങ്ങളെ അഭിമുഖീകരിക്കുന്നതിൽ ഇരുവരുടെയും സമീപനങ്ങൾ വ്യത്യസ്തമാണ് തെരുവുകളിൽ കഴിയുന്നവർക്ക് താൽക്കാലികമായി ഹോട്ടൽ മുറികളിൽ താമസമൊരുക്കുന്ന ‘ഇൻസൈഡ് സേഫ്’ എന്ന പദ്ധതിയെ ബാസ് അനുകൂലിക്കുമ്പോൾ, ഈ പദ്ധതി ഫലപ്രദമല്ലെന്നാണ് രാമന്റെ വാദം. കൂടാതെ, കഴിഞ്ഞ വർഷത്തെ കാട്ടുതീയ്ക്ക് ശേഷം കൂടുതൽ അഗ്നിശമന സേനാംഗങ്ങളെ നിയമിക്കുന്നതിനുള്ള നിർദ്ദേശത്തെ രാമൻ എതിർത്തതും ഇരുവരും തമ്മിലുള്ള ഭിന്നതയ്ക്ക് കാരണമായി. നിലവിലെ മേയർ ബാസിന് ഗവർണർ ഗാവിൻ ന്യൂസം ഉൾപ്പെടെയുള്ള പ്രമുഖ ഡെമോക്രാറ്റുകളുടെ പിന്തുണയുള്ളപ്പോൾ, പ്രറ്റിന് ജോ റോഗൻ, പാരിസ് ഹിൽട്ടൺ തുടങ്ങിയ പ്രശസ്ത വ്യക്തികളുടെ പിന്തുണയാണ് ഉള്ളത്.