എൻഎച്ച്എസിന്റെ വീഴ്ച: രോഗികളായ കുട്ടികൾക്ക് വീട്ടിൽ കിടന്നു മരിക്കാനുള്ള അവസരം നിഷേധിക്കപ്പെടുന്നതായി വിമർശനം.

ലണ്ടൻ: ഗുരുതരമായ രോഗങ്ങൾ ബാധിച്ച കുട്ടികൾക്ക് ജീവിതത്തിന്റെ അവസാന നിമിഷങ്ങളിൽ വീട്ടിൽ കിടന്നു മരിക്കാനുള്ള സൗകര്യം നാഷണൽ ഹെൽത്ത് സർവീസ് (NHS) നിഷേധിക്കുന്നതായി റിപ്പോർട്ട്. ഇംഗ്ലണ്ടിലെ പല ഭാഗങ്ങളിലും ആവശ്യമായ പാലിയേറ്റീവ് പരിചരണങ്ങൾ നൽകുന്നതിൽ എൻഎച്ച്എസ് പരാജയപ്പെടുന്നത് മൂലം ഇത്തരം കുട്ടികൾക്ക് ആശുപത്രികളിൽ കിടന്നു മരിക്കേണ്ടി വരുന്നു. ഈ സാഹചര്യം അങ്ങേയറ്റം ക്രൂരമാണെന്ന് ചാരിറ്റി സംഘടനകൾ വിശേഷിപ്പിക്കുന്നു.

2022-ലെ ഹെൽത്ത് ആന്റ് കെയർ ആക്ട് പ്രകാരം ഇംഗ്ലണ്ടിലെ 42 ഇന്റഗ്രേറ്റഡ് കെയർ ബോർഡുകൾക്കും (ICBs) ഇത്തരത്തിലുള്ള കുട്ടികൾക്ക് 24 മണിക്കൂറും വീട്ടിൽ പരിചരണം ഉറപ്പാക്കാനുള്ള നിയമപരമായ ഉത്തരവാദിത്തമുണ്ട്. എന്നാൽ ‘ടുഗെദർ ഫോർ ഷോർട്ട് ലൈവ്സ്’ എന്ന ചാരിറ്റി സംഘടന നടത്തിയ അന്വേഷണത്തിൽ 36 ശതമാനം ബോർഡുകളും ഇത്തരം സേവനങ്ങൾ നൽകുന്നില്ലെന്ന് കണ്ടെത്തി. വെറും 31 ശതമാനം മേഖലകളിൽ മാത്രമാണ് കുട്ടികൾക്ക് വീട്ടിൽ പൂർണ്ണ പരിചരണം ലഭ്യമാകുന്നത്.

ഇംഗ്ലണ്ടിൽ 19 വയസ്സിൽ താഴെയുള്ള ഏകദേശം 89,000 കുട്ടികൾ ഗുരുതരമായ രോഗങ്ങൾ അനുഭവിക്കുന്നവരാണ്. ഇവരിൽ പ്രതിവർഷം 1,600 ഓളം കുട്ടികൾ മരണപ്പെടുന്നു. ആവശ്യമായ പാലിയേറ്റീവ് കെയർ ടീമുകളെയും ഡോക്ടർമാരെയും വിട്ടുനൽകാത്തതിനാൽ കുടുംബങ്ങൾക്ക് അവരുടെ കുട്ടികളുമൊത്തുള്ള അവസാന നിമിഷങ്ങൾ സ്വന്തം വീടുകളിൽ പ്രിയപ്പെട്ടവരോടൊപ്പം ചെലവഴിക്കാൻ കഴിയാതെ പോകുന്നത് വലിയ പ്രതിഷേധത്തിന് ഇടയാക്കിയിട്ടുണ്ട്.

പാലിയേറ്റീവ് പരിചരണങ്ങൾ മുതിർന്നവർക്ക് മാത്രമുള്ളതാണെന്ന ധാരണയും ബോർഡുകളുടെ സാമ്പത്തിക പ്രതിസന്ധിയുമാണ് ഈ തിരിച്ചടിക്ക് കാരണമെന്ന് ടുഗെദർ ഫോർ ഷോർട്ട് ലൈവ്സ് ചീഫ് എക്സിക്യൂട്ടീവ് നിക്ക് കരോൾ വ്യക്തമാക്കി. ഈ വിഷയം പരിഹരിച്ച് ഇംഗ്ലണ്ടിലുടനീളം എല്ലാ കുട്ടികൾക്കും തുല്യമായ രീതിയിൽ പാലിയേറ്റീവ് സേവനങ്ങൾ വീട്ടിൽ ലഭ്യമാക്കണമെന്ന് കുട്ടികളുടെ അവകാശ പ്രവർത്തകരും ആവശ്യപ്പെടുന്നു.