എണ്ണക്കമ്പനികൾ അമിതലാഭം കൊയ്യുന്നു; ജനങ്ങൾക്ക് പണം തിരികെ നൽകണമെന്ന് ട്രംപ്.

വാഷിംഗ്ടൺ: ഇറാനെതിരായ യുദ്ധത്തെത്തുടർന്ന് ആഗോള ഊർജ്ജ വിപണിയിലുണ്ടായ പ്രതിസന്ധിയുടെ മറവിൽ വൻകിട എണ്ണക്കമ്പനികൾ അമിതലാഭം ഉണ്ടാക്കുന്നതിനെതിരെ ശക്തമായ വിമർശനവുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. എക്‌സൺമൊബീൽ (ExxonMobil), ഷെവ്‌റോൺ (Chevron) തുടങ്ങിയ പ്രമുഖ കമ്പനികൾ കൊയ്ത വൻ ലാഭത്തിന്റെ ഒരു പങ്ക് ജനങ്ങൾക്ക് തിരികെ നൽകണമെന്നും ഇന്ധനത്തിന്റെ റീട്ടെയിൽ വില ഉടനടി കുറയ്ക്കണമെന്നും ട്രംപ് ആവശ്യപ്പെട്ടു.

എണ്ണക്ഷാമത്തിന്റെ പേരിൽ കമ്പനികൾ അമിതലാഭം കൊയ്യുന്നത് അംഗീകരിക്കാനാവില്ലെന്ന് വൈറ്റ് ഹൗസിൽ വാർത്താസമ്മേളനത്തിൽ സംസാരിക്കവേ ട്രംപ് വ്യക്തമാക്കി. പശ്ചിമേഷ്യൻ യുദ്ധസാഹചര്യങ്ങൾ കാരണം ക്രൂഡ് ഓയിൽ വില ബാരലിന് 126 ഡോളർ വരെ ഉയർന്ന സാഹചര്യത്തിലാണ് ഈ എണ്ണക്കമ്പനികൾ കോടികളുടെ ലാഭമുണ്ടാക്കിയത്. കഴിഞ്ഞ സാമ്പത്തിക പാദത്തിൽ മാത്രം 26 ബില്യൺ ഡോളറിലധികമാണ് പ്രമുഖ യു.എസ് കമ്പനികൾ സ്വന്തമാക്കിയത്.

ഇന്ധനവില വർധനവ് തടയാനും വിപണിയിൽ കൃത്രിമ വിലക്കയറ്റം നടത്തുന്നില്ലെന്ന് ഉറപ്പാക്കാനും യുഎസ് ജസ്റ്റിസ് ഡിപ്പാർട്ട്‌മെന്റിനോട് ട്രംപ് അന്വേഷണത്തിന് ഉത്തരവിട്ടിട്ടുണ്ട്. വരാനിരിക്കുന്ന മിഡ്‌ടേം തിരഞ്ഞെടുപ്പിന് മുന്നോടിയായി ഇന്ധനവില കുറച്ച് ജനങ്ങൾക്ക് ആശ്വാസമെത്തിക്കാൻ കടുത്ത നടപടികളിലേക്ക് നീങ്ങുമെന്ന സൂചനയാണ് അമേരിക്കൻ ഭരണകൂടം നൽകുന്നത്.