എഎഫ്ഡിയുടെ നയം വംശീയ ശുദ്ധീകരണം; തീവ്ര വലതുപക്ഷത്തിനെതിരെ കടുപ്പിച്ച് ജർമ്മൻ ചാൻസലർ.

ബർലിൻ: ജർമ്മനിയിൽ വൻ വിജയത്തിലേക്ക് കുതിക്കുന്ന തീവ്ര വലതുപക്ഷ പാർട്ടിയായ ‘ആൾട്ടർനേറ്റീവ് ഫോർ ഡോയ്ച്ലാൻഡിന്റെ’ (AfD) കുടിയേറ്റ വിരുദ്ധ നയം വംശീയ ശുദ്ധീകരണത്തിനുള്ള നീക്കമാണെന്ന് കുറ്റപ്പെടുത്തി ചാൻസലർ ഫ്രീഡ്രിഷ് മെർസ്. സാക്സണി-അൻഹാൾട്ട് പ്രവിശ്യയിലെ തിരഞ്ഞെടുപ്പിൽ എഎഫ്ഡി നേടിയ വൻ വിജയത്തിന് പിന്നാലെ പാർലമെന്റിൽ നടന്ന വാദപ്രതിവാദത്തിലാണ് ചാൻസലർ മെർസ് പാർട്ടിക്കെതിരെ കടുത്ത ഭാഷയിൽ ആഞ്ഞടിച്ചത്. വിദേശികളായ തൊഴിലാളികളെ കൂട്ടത്തോടെ പുറത്താക്കാനുള്ള എഎഫ്ഡിയുടെ ‘റീമൈഗ്രേഷൻ’ എന്ന ആശയം ജർമ്മൻ സാമ്പത്തിക രംഗത്തിന്റെ അടിത്തറ തോണ്ടുമെന്ന് അദ്ദേഹം ഓർമ്മിപ്പിച്ചു.

രാജ്യത്തെ ആശുപത്രികൾ, പരിചരണ കേന്ദ്രങ്ങൾ, വ്യവസായശാലകൾ, ഹോട്ടലുകൾ എന്നിവയുടെ സുഗമമായ പ്രവർത്തനത്തിന് ദശലക്ഷക്കണക്കിന് കുടിയേറ്റക്കാരായ തൊഴിലാളികൾ അത്യന്താപേക്ഷിതമാണെന്ന് മെർസ് ചൂണ്ടിക്കാട്ടി. ഇവരെ പുറത്താക്കിയാൽ ജർമ്മനിയുടെ സമ്പദ്‌വ്യവസ്ഥ തകരുമെന്നും സമാധാനപരമായ അന്തരീക്ഷം തകരുമെന്നും അദ്ദേഹം പറഞ്ഞു. എഎഫ്ഡിയുടെ വംശീയ അജണ്ട ജർമ്മൻ സമൂഹത്തിൽ വലിയ തോതിലുള്ള ഭിന്നതയാണ് ഉണ്ടാക്കുന്നതെന്നും പാർലമെന്റിൽ അംഗങ്ങളുടെ ബഹളത്തിനിടയിൽ ചാൻസലർ വ്യക്തമാക്കി.

സാക്സണി-അൻഹാൾട്ടിലെ പ്രാദേശിക തിരഞ്ഞെടുപ്പിൽ 44 ശതമാനത്തോളം വോട്ടുകൾ നേടിയാണ് എഎഫ്ഡി ഏറ്റവും വലിയ ഒറ്റക്കക്ഷിയായത്. പാർട്ടിയുടെ മുഖ്യമന്ത്രി സ്ഥാനാർത്ഥി ഉൾറിച്ച് സീഗ്മുണ്ട് മറ്റ് പാർട്ടികളുടെ പിന്തുണയോടെ ഭരണം പിടിക്കാൻ ശ്രമിക്കുകയാണ്. കഴിഞ്ഞ മാസം ലൈപ്സിഗ് വിമാനത്താവളത്തിലുണ്ടായ ബോംബ് ആക്രമണ നീക്കത്തിന് പിന്നിൽ റഷ്യയാണെന്ന തെളിവുകൾ പുറത്തുവന്നിട്ടും എഎഫ്ഡി റഷ്യൻ ഭരണകൂടത്തോട് അനുകൂല നിലപാട് സ്വീകരിക്കുന്നതിനെയും ചാൻസലർ രൂക്ഷമായി വിമർശിച്ചു.

അതേസമയം, പ്രവിശ്യാ തിരഞ്ഞെടുപ്പ് ഫലം മെർസിന്റെ ഭരണത്തിനെതിരെയുള്ള ജനവിധിയാണെന്ന് എഎഫ്ഡി നേതാവ് ആലിസ് വീഡൽ തിരിച്ചടിച്ചു. നിലവിലെ സർക്കാരിന്റെ തെറ്റായ നയങ്ങളാണ് രാജ്യത്തെ സുരക്ഷാ പ്രശ്നങ്ങൾക്കും കുറ്റകൃത്യങ്ങൾക്കും കാരണമെന്നും ജനങ്ങൾ മാറ്റം ആഗ്രഹിക്കുന്നുണ്ടെന്നും വീഡൽ കൂട്ടിച്ചേർത്തു. വരാനിരിക്കുന്ന മറ്റ് പ്രവിശ്യാ തിരഞ്ഞെടുപ്പുകളിലും അടുത്ത പൊതുതിരഞ്ഞെടുപ്പിലും അധികാരം പിടിക്കാനാണ് എഎഫ്ഡിയുടെ നീക്കം.