ഈസ്റ്റ് സസെക്സിൽ വിക്ടോറിയ-ഈസ്റ്റ്ബോൺ പാസഞ്ചർ ട്രെയിൻ പാളം തെറ്റി; യാത്രക്കാർ അത്ഭുതകരമായി രക്ഷപ്പെട്ടു!

ലണ്ടൻ  : ഈസ്റ്റ് സസെക്സിലെ (East Sussex) ഹേവാർഡ്സ് ഹീത്തിനും (Haywards Heath) ലൂയിസിനും (Lewes) ഇടയിൽ പാസഞ്ചർ ട്രെയിൻ പാളം തെറ്റി മറിഞ്ഞു. വൈകുന്നേരം നാല് മണിയോടെയുണ്ടായ അപകടത്തെത്തുടർന്ന് വൻ രക്ഷാപ്രവർത്തനമാണ് പ്രദേശത്ത് നടന്നത്. ലണ്ടൻ വിക്ടോറിയയിൽ (Victoria) നിന്ന് ഈസ്റ്റ്ബോണിലേക്ക് (Eastbourne) പോകുകയായിരുന്ന സതേൺ റെയിൽവേയുടെ (Southern Railway) ട്രെയിനാണ് അപകടത്തിൽപ്പെട്ടത്. അപകടത്തിൽ ട്രെയിനിന്റെ രണ്ട് ബോഗികൾ വശങ്ങളിലേക്ക് മറിഞ്ഞു

അപകടത്തിൽ ആർക്കും ജീവഹാനിയോ മാരകമായ പരിക്കുകളോ സംഭവിച്ചിട്ടില്ലെന്നത് വലിയ ആശ്വാസമായി. ട്രെയിനിലുണ്ടായിരുന്ന എല്ലാ യാത്രക്കാരെയും സുരക്ഷിതമായി പുറത്തെത്തിച്ചതായി ബ്രിട്ടീഷ് ഗതാഗത പൊലീസും സർക്കാരും സ്ഥിരീകരിച്ചു. ചില്ലറ പരിക്കേറ്റവർക്ക് പ്രാഥമിക ചികിത്സ നൽകി. മറിഞ്ഞ ബോഗികൾക്ക് മുകളിലും സമീപത്തെ പുൽമേടുകളിലും പരിഭ്രാന്തരായി നിൽക്കുന്ന യാത്രക്കാരുടെ ചിത്രങ്ങൾ പുറത്തുവന്നിട്ടുണ്ട്.

അപകടത്തെത്തുടർന്ന് ഈ മേഖലയിലൂടെയുള്ള തീവണ്ടി ഗതാഗതം പൂർണ്ണമായും തടസ്സപ്പെട്ടു. ബ്രൈറ്റൺ (Brighton), സീഫോർഡ് (Seaford), ഈസ്റ്റ്ബോൺ എന്നീ സ്ഥലങ്ങളിലേക്കുള്ള ട്രെയിൻ സർവീസുകൾ താത്കാലികമായി നിർത്തിവെച്ചിരിക്കുകയാണ്. ഈ വഴിയുള്ള യാത്രക്കാർ കുറഞ്ഞത് 60 മിനിറ്റ് വരെ അധിക സമയം കണക്കാക്കണമെന്നും, അടിയന്തര യാത്രകളല്ലാത്തവ ഒഴിവാക്കണമെന്നും റെയിൽവേ അധികൃതരും അടിയന്തര രക്ഷാസേനകളും മുന്നറിയിപ്പ് നൽകി.

സംഭവത്തിൽ ബ്രിട്ടീഷ് ഗതാഗത സെക്രട്ടറിയും ലൂയിസ് മണ്ഡലത്തിലെ എംപി ജെയിംസ് മക്ലിയറിയും (James MacCleary) ആശങ്ക രേഖപ്പെടുത്തുകയും രക്ഷാപ്രവർത്തനം വേഗത്തിലാക്കാൻ നിർദ്ദേശം നൽകുകയും ചെയ്തു. അപകടത്തിന്റെ കാരണം വ്യക്തമല്ലെന്നും നെറ്റ്വർക്ക് റെയിലും പൊലീസും ചേർന്ന് അന്വേഷണം ആരംഭിച്ചിട്ടുണ്ടെന്നും അധികൃതർ അറിയിച്ചു.