ഇറാനിൽ തടവിലായിരുന്ന അമേരിക്കൻ പൗര ഡെന കരാരി മോചിതയായി; ട്രംപിന്റെ ഇടപെടൽ വഴിത്തിരിവായി.

വാഷിംഗ്ടൺ: 2024 ഡിസംബർ മുതൽ ഇറാനിൽ തടവിലായിരുന്ന അമേരിക്കൻ പൗരൻ ഡെന കരാരിയെ മോചിപ്പിച്ചതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു. തടവിലായിരുന്ന അവരെ ഇറാൻ അധികൃതർ വിട്ടയച്ചെന്നും ഇപ്പോൾ സുരക്ഷിതയായി പുറത്തുകടന്നുവെന്നും ട്രംപ് സോഷ്യൽ മീഡിയയിലൂടെ വ്യക്തമാക്കി. ഇറാന്റെ ഈ നടപടിയെ നന്മയുടെ പ്രതീകമായി കാണുന്നുവെന്നും അദ്ദേഹം കുറിച്ചു.

അമേരിക്കൻ-ഇറാനിയൻ ഇരട്ട പൗരത്വമുള്ള ഡെന കരാരിയെ മോചിപ്പിച്ചത് മനുഷ്യാവകാശ അഭിഭാഷകനായ ജാരെഡ് ജെൻസറാണ് ഔദ്യോഗികമായി സ്ഥിരീകരിച്ചത്. 2024-ൽ കുടുംബത്തെ സന്ദർശിക്കാൻ ഇറാനിലെത്തിയപ്പോൾ രാജ്യം വിടുന്നതിൽ നിന്ന് അവർക്ക് വിലക്കേർപ്പെടുത്തുകയായിരുന്നു. പ്രസിഡന്റ് ട്രംപിന്റെ നിരന്തരവും അസാധാരണവുമായ ഇടപെടലുകൾ കാരണമാണ് ഈ മോചനം സാധ്യമായതെന്ന് ജെൻസർ സാമൂഹിക മാധ്യമങ്ങളിൽ കുറിച്ചു.

ഒരു അമേരിക്കൻ ടെക് കമ്പനിയിൽ ജോലി ചെയ്യുന്ന കരാരി, ഇറാനിലെ നിർധനരായ കുട്ടികൾക്കായി ഒരു ചാരിറ്റി സംഘടനയും നടത്തുന്നുണ്ട്. 2025-ൽ അമേരിക്കയും ഇസ്രായേലും ചേർന്ന് ഇറാനിൽ നടത്തിയ ബോംബാക്രമണത്തിന് ശേഷം, ഇവർക്കെതിരെ ചാരവൃത്തി ആരോപിച്ച് കേസെടുത്തിരുന്നു. നിലവിൽ കരാരി സുരക്ഷിതയാണെന്നും അമേരിക്കയിലേക്കുള്ള മടക്കയാത്രയിലാണെന്നും അഭിഭാഷകൻ വ്യക്തമാക്കി.

ലോകമെമ്പാടുമുള്ള 20 രാജ്യങ്ങളിൽ നിന്നായി ഇതിനകം 340-ലധികം രാഷ്ട്രീയ തടവുകാരെ മോചിപ്പിക്കാൻ സഹായിച്ച വ്യക്തിയാണ് ജാരെഡ് ജെൻസർ. ‘ദി എക്സ്ട്രാക്ടർ’ (The Extractor) എന്ന അപരനാമത്തിൽ അറിയപ്പെടുന്ന ഇദ്ദേഹം മനുഷ്യാവകാശ രംഗത്തെ ശക്തമായ സാന്നിധ്യമാണ്. യുഎസ്-ഇറാൻ സംഘർഷങ്ങൾക്കിടയിലും കരാരിയുടെ മോചനം ഈ മേഖലയിലെ ശ്രദ്ധേയമായൊരു സംഭവമായാണ് കണക്കാക്കപ്പെടുന്നത്.