ഇംഗ്ലണ്ടിലെ പ്രത്യേക വിദ്യാഭ്യാസ പരിഷ്കരണങ്ങൾ പ്രതിസന്ധിയിൽ; മുന്നറിയിപ്പുമായി തിങ്ക് ടാങ്ക് റിപ്പോർട്ട്.

ലണ്ടൻ : ഇംഗ്ലണ്ടിലെ പ്രത്യേക വിദ്യാഭ്യാസ സമ്പ്രദായത്തിൽ ലേബർ സർക്കാർ നടപ്പിലാക്കാൻ ഉദ്ദേശിക്കുന്ന പ്രധാന പരിഷ്കരണ പദ്ധതികൾ പ്രതിസന്ധിയിലാകുന്നു. നിലവിലുള്ള വിദ്യാഭ്യാസ, ആരോഗ്യ, പരിചരണ പ്ലാനുകൾക്ക് (EHCPs) പകരം സാധാരണ സ്കൂളുകളിൽ വ്യാപകമായ പിന്തുണ നൽകാനുള്ള സർക്കാരിന്റെ പദ്ധതികൾ അമിത പ്രതീക്ഷയോടെയുള്ളതാണെന്നും, 2030-ഓടെ ഇത് പൂർത്തിയാക്കാൻ സാധിച്ചേക്കില്ലെന്നും ഇൻസ്റ്റിറ്റ്യൂട്ട് ഫോർ ഗവൺമെന്റ് (IfG) തിങ്ക് ടാങ്ക് മുന്നറിയിപ്പ് നൽകി. മാറ്റങ്ങൾ നടപ്പിലാക്കുന്നതിന് മുൻപ് മാതാപിതാക്കൾ കൂട്ടത്തോടെ പിന്തുണയ്ക്കായി അപേക്ഷിക്കുന്നതാണ് പുതിയ വെല്ലുവിളിക്ക് കാരണം.

പുതിയ സംവിധാനങ്ങളെക്കുറിച്ചുള്ള അനിശ്ചിതത്വം കാരണം തങ്ങളുടെ കുട്ടികൾക്ക് ലഭിക്കേണ്ട സഹായം നഷ്ടപ്പെടരുതെന്ന് കരുതി മാതാപിതാക്കളും സ്കൂളുകളും ഇപ്പോൾ തന്നെ ഇഎച്ച്‌സിപികൾക്കായി തിടുക്കത്തിൽ അപേക്ഷിക്കുകയാണെന്ന് റിപ്പോർട്ട് വ്യക്തമാക്കുന്നു. നിലവിലെ നിരക്ക് തുടരുകയാണെങ്കിൽ 2029-ഓടെ പത്ത് വിദ്യാർത്ഥികളിൽ ഒരാൾക്ക് ഇഎച്ച്‌സിപി ഉണ്ടായിരിക്കുമെന്നാണ് കൗൺസിലുകളുടെ വിലയിരുത്തൽ. ഇത് സർക്കാരിന്റെ ബജറ്റ് കണക്കുകൂട്ടലുകളെയും സാമ്പത്തിക ആസൂത്രണങ്ങളെയും ഗുരുതരമായി ബാധിക്കുമെന്നും വിദഗ്ധർ ചൂണ്ടിക്കാണിക്കുന്നു.

വിദ്യാഭ്യാസ രംഗത്തെ ഈ പുതിയ മാറ്റങ്ങൾക്കായി സർക്കാർ വലിയ തുക നിക്ഷേപിക്കുന്നുണ്ടെങ്കിലും, നിയമപരമായി നിലവിലുള്ള ചട്ടക്കൂടുകൾ മാറ്റാൻ സമയമെടുക്കും. അതുവരെ പ്രാദേശിക ഭരണകൂടങ്ങൾ പഴയ നിയമങ്ങൾ പാലിക്കാൻ നിർബന്ധിതരാകും. എഡികെഷൻ സംവിധാനം കൂടുതൽ ഉൾക്കൊള്ളുന്നതാക്കാനും, സ്‌പെഷ്യൽ സ്‌കൂളുകളിലെ സമ്മർദ്ദം കുറയ്ക്കാനും ലക്ഷ്യമിട്ടുള്ളതാണ് പുതിയ പരിഷ്കാരങ്ങളെങ്കിലും, പ്രായോഗിക തലത്തിൽ ഇത് നടപ്പിലാക്കുന്നതിലെ കാലതാമസം സർക്കാരിന് വലിയ രാഷ്ട്രീയ വെല്ലുവിളിയായി മാറിയിട്ടുണ്ട്.

അതേസമയം, റിപ്പോർട്ടിലെ നിഗമനങ്ങൾ ഊഹാപോഹങ്ങൾ മാത്രമാണെന്നും നിർദ്ദിഷ്ട പരിഷ്കാരങ്ങൾ ഇഎച്ച്‌സിപി അപേക്ഷകൾ വർദ്ധിപ്പിക്കുന്നു എന്നതിന് തെളിവുകളില്ലെന്നും ഡിപ്പാർട്ട്‌മെന്റ് ഫോർ എഡ്യൂക്കേഷൻ (DfE) പ്രതികരിച്ചു. നിലവിലുള്ള തകരാറുകൾ പരിഹരിക്കാൻ സർക്കാർ പ്രതിജ്ഞാബദ്ധമാണെന്നും, സ്കൂൾ വൈറ്റ് പേപ്പറിൽ പറഞ്ഞിരിക്കുന്ന സമയപരിടികൾക്കകം തന്നെ നടപടികൾ പൂർത്തിയാക്കുമെന്നും അധികൃതർ വ്യക്തമാക്കി. എങ്കിലും, മാതാപിതാക്കളുടെ ആശങ്കകളും വർദ്ധിച്ചുവരുന്ന അപേക്ഷകളും സർക്കാരിന്റെ ഭാവി പദ്ധതികളെ എങ്ങനെ ബാധിക്കുമെന്നത് കണ്ടറിയേണ്ടിയിരിക്കുന്നു.