ആൻ വിഡികോംബിന്റെ കൊലപാതകം: അറസ്റ്റിലായ യുവാവിനെ പോലീസ് വിട്ടയച്ചു; യഥാർത്ഥ പ്രതിക്കായി തെരച്ചിൽ ഊർജ്ജിതം.
എക്സെറ്റർ: മുൻ യുകെ ഗവൺമെന്റ് മന്ത്രിയും രാഷ്ട്രീയ നേതാവുമായ ആൻ വിഡികോംബിന്റെ കൊലപാതകവുമായി ബന്ധപ്പെട്ട് അറസ്റ്റിലായിരുന്ന 26-കാരനെ പോലീസ് വിട്ടയച്ചു. ഡെവൺ ആൻഡ് കോൺവാൾ പോലീസ് ശനിയാഴ്ച പുലർച്ചെയാണ് ഇക്കാര്യം അറിയിച്ചത്. ഇയാളെ നിലവിൽ കേസിൽ നിന്നും പൂർണ്ണമായി ഒഴിവാക്കിയതായും യഥാർത്ഥ പ്രതികളെ കണ്ടെത്താനുള്ള അന്വേഷണം ഊർജ്ജിതമായി നടക്കുകയാണെന്നും അസിസ്റ്റന്റ് ചീഫ് കോൺസ്റ്റബിൾ മാറ്റ് ലോങ്മാൻ വ്യക്തമാക്കി. കഴിഞ്ഞ വ്യാഴാഴ്ച രാവിലെ ഡെവണിലെ വീട്ടിലാണ് ഗുരുതരമായി പരിക്കേറ്റ നിലയിൽ ആൻ വിഡികോംബിന്റെ മൃതദേഹം കണ്ടെത്തിയത്.
സംഭവവുമായി ബന്ധപ്പെട്ട് വ്യാഴാഴ്ച രാത്രി ന്യൂട്ടൺ ആബട്ടിൽ നിന്നാണ് 26-കാരനായ ബ്രിട്ടീഷ് പൗരനെ പോലീസ് കസ്റ്റഡിയിലെടുത്തിരുന്നത്. എന്നാൽ ഈ കൊലപാതകത്തിന് പിന്നിൽ രാഷ്ട്രീയ ലക്ഷ്യങ്ങളോ ഭീകരവാദ ബന്ധങ്ങളോ ഉള്ളതായി നിലവിൽ സൂചനകളില്ലെന്ന് കൗണ്ടർ ടെററിസം ഉദ്യോഗസ്ഥരുമായി നടത്തിയ പ്രാഥമിക ചർച്ചകൾക്ക് ശേഷം പോലീസ് വ്യക്തമാക്കി. സംഭവത്തെക്കുറിച്ച് എന്തെങ്കിലും വിവരങ്ങൾ അറിയാവുന്നവർ ഉടൻ തന്നെ പോലീസുമായി ബന്ധപ്പെടണമെന്നും, സോഷ്യൽ മീഡിയയിലൂടെ അനാവശ്യ ഊഹാപോഹങ്ങൾ പ്രചരിപ്പിക്കരുതെന്നും അധികൃതർ അഭ്യർത്ഥിച്ചു.
ഡാർട്ട്മൂർ നാഷണൽ പാർക്കിന് ഉള്ളിലെ ഹെയ്റ്റർ വെയ്ലിലുള്ള വീട്ടിലാണ് ആൻ വിഡികോംബ് താമസിച്ചിരുന്നത്. മരണപ്പെടുന്നതിന് തൊട്ടുമുൻപുള്ള ദിവസം വരെ ഇവർ മാധ്യമങ്ങളിൽ സജീവമായിരുന്നു. ചാനൽ 5-ലെ ഒരു പരിപാടിയിൽ പങ്കെടുക്കേണ്ടിയിരുന്ന അവർ സൂം കോളിൽ വരാതിരുന്നതിനെ തുടർന്ന് അണിയറപ്രവർത്തകർ ബന്ധപ്പെടാൻ ശ്രമിച്ചെങ്കിലും മറുപടിയുണ്ടായിരുന്നില്ല. അതിന് പിന്നാലെയാണ് വ്യാഴാഴ്ച രാവിലെ വീട്ടിലെത്തിയ ആംബുലൻസ് സംഘം മൃതദേഹം കണ്ടെത്തിയത്.
ആൻ വിഡികോംബിന്റെ ക്രൂരമായ കൊലപാതക വാർത്ത യുകെയിലെ രാഷ്ട്രീയ ലോകത്തെ ഒന്നടങ്കം ഞെട്ടിച്ചിരിക്കുകയാണ്. കക്ഷിരാഷ്ട്രീയ വ്യത്യാസങ്ങൾക്കപ്പുറം എല്ലാവരും ഈ ദാരുണ സംഭവത്തിൽ അനുശോചനം രേഖപ്പെടുത്തി. പ്രായമായ ഒരു സ്ത്രീക്കെതിരെ നടന്ന ഈ ക്രൂരമായ ആക്രമണം വിശ്വസിക്കാൻ കഴിയുന്നില്ലെന്ന് കൺസർവേറ്റീവ് പാർട്ടി നേതാവ് കെമി ബേഡനോക്ക് പ്രതികരിച്ചപ്പോൾ, ആൻ വിഡികോംബിന്റെ നിര്യാണം രാജ്യത്തിന് വലിയ നഷ്ടമാണെന്ന് പ്രധാനമന്ത്രി കീർ സ്റ്റാർമർ അനുസ്മരിച്ചു.
