ആഗോള സാമ്പത്തിക പ്രതിസന്ധികൾക്കിടയിലും പ്രത്യാശ പകരാൻ യുകെ ബജറ്റ്; ചാൻസലർ ജോൺ ഹീലി ഇന്ന് ബജറ്റ് അവതരിപ്പിക്കും.

ലണ്ടൻ :  ആഗോള സാമ്പത്തിക അനിശ്ചിതത്വങ്ങൾക്കിടയിലും രാജ്യത്തെ മികച്ച ഭാവയിലേക്ക് നയിക്കുമെന്ന ഉറപ്പോടെ ചാൻസലർ ജോൺ ഹീലി തന്റെ ആദ്യ ബജറ്റ് ബുധനാഴ്ച അവതരിപ്പിക്കും. മിഡിൽ ഈസ്റ്റിലെ സംഘർഷങ്ങളെത്തുടർന്ന് വർദ്ധിച്ചുവരുന്ന ജീവിതച്ചെലവ് പ്രതിസന്ധിയിൽ നിന്ന് ജനങ്ങൾക്ക് ആശ്വാസം നൽകുന്ന പ്രഖ്യാപനങ്ങൾ ബജറ്റിലുണ്ടാകും. ആന്റി ബർണാം സർക്കാരിന്റെ വ്യക്തമായ നയരേഖയായിരിക്കും ഈ ബജറ്റ് എങ്കിലും, കടുത്ത സാമ്പത്തിക യാഥാർത്ഥ്യങ്ങൾ കാരണം പ്രധാനപ്പെട്ട നികുതി, ചെലവഴിക്കൽ തീരുമാനങ്ങളിൽ പലതും അടുത്ത വർഷത്തേക്ക് മാറ്റിവെക്കാനാണ് സാധ്യത.

വരാനിരിക്കുന്ന ശൈത്യകാലത്ത് ജനങ്ങൾക്ക് ആശ്വാസമായി ഊർജ്ജ ബില്ലുകളിൽ ഇളവുകൾ നൽകാനും ഗ്യാസ് സ്റ്റാൻഡിംഗ് ചാർജുകൾ ഒഴിവാക്കാനും സർക്കാർ ആലോചിക്കുന്നുണ്ട്. കുറഞ്ഞ വരുമാനക്കാരെ സഹായിക്കുന്നതിനായി മിനിമം വേതനം 4 ശതമാനത്തോളം വർദ്ധിപ്പിക്കുമെങ്കിലും, ചെറുപ്പക്കാർക്കുള്ള വേതന വർദ്ധനവിന്റെ നിരക്ക് കുറയ്ക്കാൻ സാധ്യതയുണ്ട്. കൂടാതെ പെൻഷൻകാരെയും സമ്പാദ്യക്കാരെയും ആദായനികുതിയിൽ നിന്ന് സംരക്ഷിക്കുന്ന നടപടികളും ഇന്ധന നികുതി വർദ്ധനവ് റദ്ദാക്കലും ബജറ്റിൽ ഇടംപിടിക്കും.

വ്യവസായ ബാധ്യതകൾ നിറവേറ്റുന്നതിനും യുദ്ധം മൂലമുണ്ടായ സാമ്പത്തിക ആഘാതം ചെറുക്കുന്നതിനുമായി ബ്രിട്ടനിലെ ബാങ്കുകൾക്ക് മേലുള്ള നികുതി വർദ്ധിപ്പിക്കാൻ ചാൻസലർ തയാറെടുക്കുന്നുണ്ട്. ഇതുവഴി പ്രതിവർഷം 2 ബില്യൺ പൗണ്ടിലധികം സമാഹരിക്കാൻ സാധിക്കുമെന്നാണ് പ്രതീക്ഷിക്കുന്നത്. പ്രാദേശിക നേതാക്കൾക്ക് കൂടുതൽ നികുതി വരുമാനവും അധികാരവും കൈമാറുന്ന വികേന്ദ്രീകരണത്തിനുള്ള (Devolution) പുതിയ പദ്ധതികളും ബജറ്റിൽ പ്രഖ്യാപിച്ചേക്കും.

അതേസമയം, പ്രതിരോധ ചെലവുകൾ ദേശീയ വരുമാനത്തിന്റെ 3 ശതമാനത്തിലേക്ക് ഉയർത്തുന്നതിനായുള്ള തുക നീക്കിവെക്കുമെങ്കിലും ഇതിന്റെ പൂർണ്ണമായ സമയവിവരപ്പട്ടിക അടുത്ത വർഷത്തെ അവലോകനത്തിലാകും പുറത്തുവിടുക. പണപ്പെരുപ്പവും പലിശനിരക്ക് വർദ്ധനവും സൃഷ്ടിക്കുന്ന കടുത്ത വെല്ലുവിളികൾക്കിടയിലും, ബ്രിട്ടന്റെ സമ്പദ്‌വ്യവസ്ഥയെ കൂടുതൽ ശക്തവും സുസ്ഥിരവുമാക്കുകയാണ് ലക്ഷ്യമെന്ന് ജോൺ ഹീലി വ്യക്തമാക്കുന്നു.