അയർലണ്ട് ബജറ്റ് 2027 പ്രഖ്യാപിച്ചു; കുടുംബങ്ങൾക്ക് നികുതി ഇളവുകളും ക്ഷേമസഹായങ്ങളും വർധിപ്പിച്ചു!
ഡബ്ലിൻ, അയർലണ്ട്: ജീവിതച്ചെലവിന്റെ സമ്മർദത്തിൽ കഴിയുന്ന കുടുംബങ്ങൾക്ക് ആശ്വാസമായി അയർലണ്ടിന്റെ ബജറ്റ് 2027 പ്രഖ്യാപിച്ചു. ധനമന്ത്രി സൈമൺ ഹാരിസും പൊതുചെലവ് മന്ത്രി ജാക്ക് ചേംബേഴ്സും ഒക്ടോബർ ആറിന് പാർലമെന്റിൽ അവതരിപ്പിച്ച ബജറ്റിൽ തൊഴിലെടുക്കുന്നവർ, കുട്ടികളുള്ള കുടുംബങ്ങൾ, പെൻഷൻകാർ, വാടകക്കാർ എന്നിവർക്കുള്ള ആശ്വാസനടപടികൾക്ക് മുൻഗണന നൽകിയിട്ടുണ്ട്. വ്യക്തിഗത ആദായനികുതി ഇളവുകൾക്കായി വൻ തുകയുടെ പാക്കേജാണ് സർക്കാർ മാറ്റിവെച്ചിരിക്കുന്നത്.
ആരോഗ്യമേഖലയുടെ വികസനത്തിനായി റെക്കോർഡ് തുകയാണ് ബജറ്റിൽ വകയിരുത്തിയിരിക്കുന്നത്. മൊത്തം ആരോഗ്യവിഹിതം 29.1 ബില്യൺ യൂറോയായി ഉയർന്നു. വയോജനങ്ങൾക്കായി വീടുകളിൽ പരിചരണം ലഭ്യമാക്കാൻ ലക്ഷ്യമിട്ട് ലക്ഷക്കണക്കിന് അധിക ഹോം സപ്പോർട്ട് മണിക്കൂറുകളും മാനസികാരോഗ്യ സേവനങ്ങൾക്കായി പ്രത്യേക സഹായങ്ങളും പ്രഖ്യാപിച്ചിട്ടുണ്ട്. കൂടാതെ കുട്ടികളുടെ ദന്തചികിത്സയ്ക്കും ഓർത്തോഡോണ്ടിക് സേവനങ്ങൾക്കും പ്രത്യേക ഫണ്ട് അനുവദിച്ചിട്ടുണ്ട്.
കുറഞ്ഞ വേതനം മണിക്കൂറിന് 14.94 യൂറോ ആയി വർധിപ്പിച്ചു. പെൻഷൻ ഉൾപ്പെടെയുള്ള പ്രധാന സാമൂഹികക്ഷേമ പേമെന്റുകൾക്ക് പത്ത് യൂറോയുടെ വർദ്ധനവും പ്രഖ്യാപിച്ചിട്ടുണ്ട്. കുട്ടികളുടെ പരിപാലന ഫീസ് കുറയ്ക്കുന്നതും, വാടക ടാക്സ് ക്രെഡിറ്റ് വർധിപ്പിക്കുന്നതും സാധാരണക്കാരായ കുടുംബങ്ങൾക്ക് വലിയ ആശ്വാസമാകും. ആദ്യമായി വീട് വാങ്ങുന്നവർക്കുള്ള സഹായവും കോളജ് ഫീസ് കുറച്ചതും വിദ്യാർത്ഥികൾക്കും ഗുണം ചെയ്യും.
അതേസമയം, ചില ബഹുരാഷ്ട്ര കമ്പനികളിൽ നിന്നുള്ള കോർപ്പറേഷൻ നികുതി വരുമാനത്തെ മാത്രം ആശ്രയിച്ച് സ്ഥിരം ചെലവുകൾ വർധിപ്പിക്കുന്നതിലെ അപകടം ഫിസ്കൽ അഡൈ്വസറി കൗൺസിൽ ചൂണ്ടിക്കാണിച്ചിട്ടുണ്ട്. എങ്കിലും, നിലവിലെ സാമ്പത്തിക പ്രതിസന്ധികൾക്കിടയിലും ജനങ്ങൾക്ക് പരമാവധി ആശ്വാസം നൽകുന്ന ജനക്ഷേമകരമായ പ്രഖ്യാപനങ്ങളാണ് ബജറ്റിൽ ഉൾപ്പെടുത്തിയിരിക്കുന്നതെന്നാണ് സർക്കാരിന്റെ വിലയിരുത്തൽ.
