അമേരിക്കൻ തിരഞ്ഞെടുപ്പിൽ തൊഴിലാളികളെ സ്ഥാനാർത്ഥികളാക്കി ഡെമോക്രാറ്റുകൾ; റിപ്പബ്ലിക്കൻ കോട്ടകളിൽ വൻ മാറ്റത്തിന് സാധ്യത!

വാഷിംഗ്ടൺ:അമേരിക്കയിൽ വരാനിരിക്കുന്ന മിഡ്‌ടേം തിരഞ്ഞെടുപ്പിൽ പണപ്പെരുപ്പത്തിലും ഉയർന്ന ജീവിതച്ചെലവിലും വലയുന്ന വോട്ടർമാരെ ആകർഷിക്കാൻ സാധാരണക്കാരായ തൊഴിലാളികളെ സ്ഥാനാർത്ഥികളാക്കി ഡെമോക്രാറ്റിക് പാർട്ടി. ട്രേഡ് യൂണിയൻ പശ്ചാത്തലമുള്ളവരെയും താഴെത്തട്ടിൽ പ്രവർത്തിക്കുന്നവരെയും മത്സരരംഗത്തിറക്കി റിപ്പബ്ലിക്കൻ പാർട്ടിയുടെ ഉറച്ച സീറ്റുകൾ പിടിച്ചെടുക്കാനാണ് ഡെമോക്രാറ്റുകൾ തന്ത്രം മെനയുന്നത്. വാഷിംഗ്ടണിലെ പരമ്പരാഗത രാഷ്ട്രീയക്കാരോട് മടുപ്പ് തോന്നിയ ജനങ്ങൾക്ക് ഇടയിൽ ഇത്തരം സ്ഥാനാർത്ഥികൾക്ക് സ്വാധീനം ചെലുത്താനാകുമെന്നാണ് പാർട്ടിയുടെ കണക്കുകൂട്ടൽ.

വിസ്കോൺസിനിലെ ഹൗസ് സീറ്റിലേക്ക് മത്സരിക്കുന്ന എമർജൻസി റൂം നഴ്സായ മിച്ചൽ ബെർമാനാണ് ഈ നീക്കത്തിലെ  ശ്രദ്ധേയയായ ഒരു സ്ഥാനാർത്ഥി. മുൻ ഹൗസ് സ്പീക്കർ പോൾ റയാൻ പ്രതിനിധീകരിച്ചിരുന്ന റിപ്പബ്ലിക്കൻ സ്വാധീനമേഖലയിലാണ് 20 വർഷത്തിലധികം ആരോഗ്യമേഖലയിൽ പരിചയസമ്പത്തുള്ള ബെർമാൻ ജനവിധി തേടുന്നത്. കോർപ്പറേറ്റ് അഭിഭാഷകനായ നിലവിലെ റിപ്പബ്ലിക്കൻ പ്രതിനിധി ബ്രയാൻ സ്റ്റൈലിൽ നിന്നും വ്യത്യസ്തമായി, സാധാരണക്കാരുടെ പ്രശ്നങ്ങൾ അടുത്തറിഞ്ഞ ആളെന്ന നിലയിൽ തനിക്ക് ജനങ്ങളുടെ പ്രതിസന്ധികൾ കൂടുതൽ നന്നായി മനസ്സിലാക്കാൻ കഴിയുമെന്ന് ബെർമാൻ ചൂണ്ടിക്കാണിക്കുന്നു.

വിസ്കോൺസിൻ അടക്കമുള്ള മിഡ്‌വെസ്റ്റ് മേഖലകളിൽ ഉൽപ്പാദന മേഖല തകർച്ച നേരിട്ടതും ആയിരക്കണക്കിന് തൊഴിലവസരങ്ങൾ നഷ്ടപ്പെട്ടതും തിരഞ്ഞെടുപ്പിൽ പ്രധാന ചർച്ചാവിഷയമാണ്. പുതിയ തീരുവകൾ (Tariffs) കാരണം സംസ്ഥാനത്തെ ഓരോ കുടുംബത്തിനും പ്രതിവർഷം 1,095 ഡോളറിന്റെ അധിക സാമ്പത്തിക ഭാരമാണ് ഉണ്ടാകുന്നത്. ഉൽപ്പാദന മേഖലയെയും സാധാരണക്കാരുടെ സാമ്പത്തിക നിലയെയും തകർത്ത റിപ്പബ്ലിക്കൻ നയങ്ങൾക്കെതിരെ ശക്തമായ രോഷം ജനങ്ങൾക്കിടയിലുണ്ടെന്ന് തൊഴിലാളി യൂണിയൻ അംഗം കൂടിയായ ബെർമാൻ വ്യക്തമാക്കി.

സാധാരണക്കാർക്ക് അർഹമായ വേതനവും ജോലിസ്ഥലത്തെ സുരക്ഷിതത്വവും ഉറപ്പാക്കാൻ അവരുടെ ശബ്ദം പാർലമെന്റിൽ ഉയരേണ്ടതുണ്ടെന്ന് ഡെമോക്രാറ്റുകൾ വാദിക്കുന്നു. വിലക്കയറ്റവും പണപ്പെരുപ്പവും ജീവിതം ദുസ്സഹമാക്കിയ സാഹചര്യത്തിൽ, രാഷ്ട്രീയ പാരമ്പര്യമില്ലാത്ത തൊഴിലാളി വർഗ്ഗ സ്ഥാനാർത്ഥികൾക്ക് ഈ തിരഞ്ഞെടുപ്പിൽ നിർണ്ണായക മുന്നേറ്റം നടത്താൻ കഴിയുമെന്ന പ്രതീക്ഷയിലാണ് ഡെമോക്രാറ്റിക് ക്യാമ്പ്.