അഭയാർത്ഥികളെ നാടുകടത്താനുള്ള യുകെ ഗവൺമെന്റ് നീക്കത്തിന് തിരിച്ചടി; ആഭ്യന്തര സെക്രട്ടറിയുടെ ഉത്തരവ് നിയമവിരുദ്ധമെന്ന് ഹൈക്കോടതി.

ലണ്ടൻ: ഫ്രാൻസുമായുള്ള ‘വൺ ഇൻ വൺ ഔട്ട്’ (One in one out) അഭയ കരാർ വേഗത്തിലാക്കാൻ ഇരകളുടെ സംരക്ഷണം വെട്ടിക്കുറച്ച യുകെ ആഭ്യന്തര സെക്രട്ടറി ഷബാന മഹ്മൂദിന്റെ നടപടി നിയമവിരുദ്ധമാണെന്ന് ലണ്ടൻ ഹൈക്കോടതി വിധിച്ചു. ഇംഗ്ലീഷ് ചാനൽ കടന്ന് യുകെയിൽ എത്തിയ അഞ്ച് അഭയാർത്ഥികൾ സമർപ്പിച്ച ഹർജിയിലാണ് ജസ്റ്റിസ് ഷെൽഡൺ നിർണ്ണായക വിധി പ്രസ്താവിച്ചത്. പുതിയ ഭേദഗതി പ്രകാരം മനുഷ്യക്കടത്തിന് ഇരയായവർക്ക് തങ്ങളുടെ സംരക്ഷണ അപേക്ഷകൾ പുനഃപരിശോധിക്കാൻ (Reconsideration) ഉണ്ടായിരുന്ന അവകാശമാണ് ആഭ്യന്തര മന്ത്രാലയം എടുത്തുകളഞ്ഞിരുന്നത്.

യുകെയും ഫ്രാൻസും തമ്മിലുള്ള കരാർ പ്രകാരം, ചെറുകപ്പലുകളിൽ ഫ്രാൻസിൽ നിന്ന് യുകെയിലേക്ക് നിയമവിരുദ്ധമായി എത്തുന്ന ഒരാളെ ഫ്രാൻസിലേക്ക് തിരിച്ചയക്കുകയും, പകരം ചാനൽ കടക്കാൻ ശ്രമിക്കാത്ത മറ്റൊരു അഭയാർത്ഥിയെ ഫ്രാൻസിൽ നിന്ന് യുകെ സ്വീകരിക്കുകയുമാണ് ചെയ്യുന്നത്. ഈ തിരിച്ചയക്കൽ പ്രക്രിയ വേഗത്തിലാക്കാനാണ് ആഭ്യന്തര സെക്രട്ടറി സംരക്ഷണ ചട്ടങ്ങളിൽ ഭേദഗതി വരുത്തിയത്. കഴിഞ്ഞ ഓഗസ്റ്റിൽ ഈ പദ്ധതി ആരംഭിച്ചതിനുശേഷം ആയിരത്തിലധികം ആളുകളെ യുകെയിൽ നിന്ന് ഫ്രാൻസിലേക്ക് നാടുകടത്തിയിട്ടുണ്ട്.

ലിബിയ ഉൾപ്പെടെയുള്ള രാജ്യങ്ങൾ വഴി യുകെയിൽ എത്തുന്ന ഭൂരിഭാഗം അഭയാർത്ഥികളും മനുഷ്യക്കടത്ത് സംഘങ്ങളുടെ ക്രൂരതകൾക്ക് ഇരയായവരാണ്. ഫ്രാൻസും മനുഷ്യക്കടത്തിന് ഇരയായവരെ സംരക്ഷിക്കുന്ന അന്താരാഷ്ട്ര ഉടമ്പടികളിൽ ഒപ്പുവെച്ചിട്ടുള്ള രാജ്യമാണെന്നും, അതിനാൽ ഇവരുടെ കേസുകൾ ഫ്രാൻസിൽ കൈകാര്യം ചെയ്യാമെന്നുമായിരുന്നു ആഭ്യന്തര മന്ത്രാലയത്തിന്റെ വാദം. എന്നാൽ ഫ്രഞ്ച് പൗരന്മാരല്ലാത്തവർക്കോ ഫ്രാൻസിൽ വെച്ച് കബളിപ്പിക്കപ്പെടാത്തവർക്കോ യുകെയിൽ ലഭിക്കുന്ന അത്രയും ശക്തമായ നിയമസംരക്ഷണം ഫ്രാൻസിൽ ലഭിക്കുന്നില്ലെന്ന് കോടതി നിരീക്ഷിച്ചു.

യുകെ ഗവൺമെന്റിന്റെ അഭയാർത്ഥി നയങ്ങൾക്ക് വലിയ തിരിച്ചടിയാകുന്നതാണ് ഹൈക്കോടതിയുടെ ഈ പുതിയ വിധി. മനുഷ്യക്കടത്തിന് ഇരയായവരോട് കാണിക്കുന്ന ഇത്തരം വിവേചനങ്ങൾ അന്താരാഷ്ട്ര മനുഷ്യാവകാശ ലംഘനമാണെന്ന് മനുഷ്യാവകാശ സംഘടനകൾ ചൂണ്ടിക്കാണിക്കുന്നു. കോടതി വിധി വന്ന സാഹചര്യത്തിൽ നിലവിലുള്ള നാടുകടത്തൽ നടപടികൾ പുനഃപരിശോധിക്കാൻ ഗവൺമെന്റ് നിർബന്ധിതരാകും. ഫ്രാൻസിലേക്ക് തിരിച്ചയക്കപ്പെട്ടവരിൽ ഭൂരിഭാഗം പേരെയും പിന്നീട് കണ്ടെത്താൻ കഴിഞ്ഞിട്ടില്ലെന്ന ആശങ്കയും കോടതി നടപടികൾക്കിടയിൽ ഉയർന്നു വന്നിരുന്നു.