അഭയാർത്ഥികളെ കുട്ടികളുൾപ്പെടെ ബലംപ്രയോഗിച്ച് നാടുകടത്താൻ യുകെ; നീക്കം കുട്ടികൾക്ക് കടുത്ത ദോഷം ചെയ്യുമെന്ന് ചിൽഡ്രൻസ് കമ്മീഷണർ.

ലണ്ടൻ: യുകെയിൽ അഭയാർത്ഥി അപേക്ഷ നിരസിക്കപ്പെട്ടവരെ കുട്ടികളുൾപ്പെടെ നിർബന്ധിതമായി നാടുകടത്താനുള്ള ആഭ്യന്തര സെക്രട്ടറി ഷബാന മഹ്മൂദിന്റെ പുതിയ നീക്കത്തിനെതിരെ സ്വതന്ത്ര നിരീക്ഷണ സമിതി രംഗത്ത്. കുട്ടികളെ ബലപ്രയോഗത്തിലൂടെ നാടുകടത്താനുള്ള ഈ ക്രാക്ക്ഡൗൺ അവർക്ക് വലിയ രീതിയിലുള്ള ദോഷം (significant harm) ചെയ്യുമെന്ന് ഇംഗ്ലണ്ടിലെ ചിൽഡ്രൻസ് കമ്മീഷണർ റേച്ചൽ ഡി സൗസ മുന്നറിയിപ്പ് നൽകി. നിലവിൽ യുകെയിൽ ചികിത്സയിൽ കഴിയുന്ന കുട്ടികളുള്ള കുടുംബങ്ങളെപ്പോലും രാജ്യം വിടാൻ നിർബന്ധിക്കുന്ന പുതിയ പദ്ധതി ഇപ്പോൾ നിർദ്ദേശിച്ചിട്ടുള്ള രൂപത്തിൽ നടപ്പിലാക്കരുതെന്ന് അവർ ആവശ്യപ്പെട്ടു.

 ഈ നയം രാജ്യത്തെ ഏകദേശം 27,000 കുട്ടികളെ നേരിട്ട് ബാധിക്കുമെന്നാണ് കമ്മീഷണറുടെ ഓഫീസ് കണക്കാക്കുന്നത്. അഭയാർത്ഥി പദവി എന്താണെന്നതോ അവർ എങ്ങനെ ഇവിടെയെത്തി എന്നതോ നോക്കാതെ, ഈ രാജ്യത്തുള്ള എല്ലാ കുട്ടികളുടെയും അവകാശങ്ങൾ സംരക്ഷിക്കാൻ തനിക്ക് നിയമപരമായ ബാധ്യതയുണ്ടെന്നും പുതിയ നിർദ്ദേശങ്ങൾ കുട്ടികളെ കടുത്ത അപകടത്തിലാക്കുമെന്നും ഡി സൗസ വ്യക്തമാക്കി. ഈ നയം എത്ര കുട്ടികളെ ബാധിക്കുമെന്നത് വ്യക്തമാക്കണമെന്ന് ആവശ്യപ്പെട്ട് അവർ ആഭ്യന്തര സെക്രട്ടറിക്ക് കത്തയച്ചിട്ടുണ്ട്.

പുതിയ നിർദ്ദേശങ്ങൾ പ്രകാരം, ഒരു അഭയാർത്ഥിയുടെ ജന്മനാട്ടിൽ മതിയായ ചികിത്സാ സൗകര്യങ്ങൾ ലഭ്യമല്ലെന്നത് അവരെ നാടുകടത്തുന്നതിന് ഒരു തടസ്സമായി കണക്കാക്കില്ല. നാടുകടത്തൽ നടപടികൾ കാത്തിരിക്കുന്ന കുടുംബങ്ങൾക്ക് മറ്റ് സഹായങ്ങളൊന്നും ലഭിക്കില്ലെങ്കിലും, സ്വമേധയാ രാജ്യം വിടാൻ തയ്യാറാകുന്ന കുടുംബാംഗങ്ങൾക്ക് പരമാവധി 10,000 പൗണ്ട് വരെ ധനസഹായം നൽകാൻ മഹ്മൂദ് നിർദ്ദേശിച്ചിട്ടുണ്ട്.

നിലവിൽ യുകെയിലെ നിയമപ്രകാരം ഇമിഗ്രേഷൻ ഉദ്യോഗസ്ഥർക്ക് കുട്ടികൾക്കെതിരെ ശാരീരിക ബലപ്രയോഗം നടത്താൻ അനുമതിയില്ല. എന്നാൽ പുതിയ നിർദ്ദേശപ്രകാരം രാജ്യം വിടാൻ കൂട്ടാക്കാത്ത കുട്ടികൾക്കെതിരെ വിലങ്ങുവെക്കൽ (handcuffs) ഉൾപ്പെടെയുള്ള ബലപ്രയോഗങ്ങൾ നടത്താൻ അനുമതി നൽകുന്നുണ്ട്. കുട്ടികൾക്കെതിരെയുള്ള ഏതൊരു ബലപ്രയോഗവും മറ്റ് മാർഗ്ഗങ്ങളില്ലാത്ത അവസാനത്തെ വഴി മാത്രമായിരിക്കണമെന്നും, അത് കുട്ടികളുടെ സുരക്ഷയ്ക്കായി പരിശീലനം ലഭിച്ച വിദഗ്ദ്ധർ മാത്രമേ ചെയ്യാവൂ എന്നും ഡി സൗസ ചൂണ്ടിക്കാണിച്ചു. ഗുരുതരമായ രോഗങ്ങളുള്ള കുട്ടികളെപ്പോലും അവരുടെ ജന്മനാട്ടിൽ ചികിത്സയില്ലെങ്കിൽക്കൂടി നാടുകടത്താൻ ഈ നിയമം വഴിയൊരുക്കുമെന്ന് മനുഷ്യാവകാശ പ്രവർത്തകരും ആശങ്ക പ്രകടിപ്പിക്കുന്നു.