അന്തരീക്ഷത്തിൽ സർവ്വകാല റെക്കോർഡ് നീരാവി: ആഗോളതലത്തിൽ വൻ പ്രളയങ്ങൾക്കും വരൾച്ചയ്ക്കും സാധ്യത.

ലണ്ടൻ: ഭൂമിയുടെ അന്തരീക്ഷത്തിലെ നീരാവിയുടെ അളവ് ഓഗസ്റ്റ് മാസത്തിൽ ചരിത്രത്തിലെ ഏറ്റവും ഉയർന്ന നിരക്കിലെത്തിയെന്ന് യൂറോപ്യൻ കാലാവസ്ഥാ നിരീക്ഷണ ഏജൻസിയായ കോപ്പർനിക്കസ് ക്ലൈമറ്റ് ചേഞ്ച് സർവീസ് (C3S) വെളിപ്പെടുത്തി. ഇത് ലോകമെമ്പാടും അതിതീവ്ര മഴ, പ്രളയം, കടുത്ത ചൂട് എന്നിവയ്ക്കുള്ള സാധ്യത വൻതോതിൽ വർദ്ധിപ്പിക്കുന്നതായി ശാസ്ത്രജ്ഞർ മുന്നറിയിപ്പ് നൽകുന്നു.

ആഗോളതാപനവും പെസഫിക് സമുദ്രത്തിലുണ്ടായ ശക്തമായ ‘എൽ നിനോ’ പ്രതിഭാസവുമാണ് അന്തരീക്ഷത്തിലെ ഈ അപ്രതീക്ഷിത മാറ്റത്തിന് പ്രധാന കാരണം. ചൂടു കൂടുമ്പോൾ അന്തരീക്ഷത്തിന് കൂടുതൽ ഈർപ്പം ഉൾക്കൊള്ളാൻ കഴിയും; സാധാരണയേക്കാൾ 7 ശതമാനം വരെ അധികം നീരാവി ഓരോ ഡിഗ്രി താപനില വർദ്ധനവിലും അന്തരീക്ഷത്തിൽ നിക്ഷേപിക്കപ്പെടുന്നുണ്ടെന്ന് ശാസ്ത്രജ്ഞർ വ്യക്തമാക്കുന്നു.

ഓഗസ്റ്റിൽ രേഖപ്പെടുത്തിയ വർദ്ധനവ് എന്നത് ഏകദേശം 20 ട്രില്യൺ (20 ലക്ഷം കോടി) ലിറ്റർ അധിക ജലത്തിന് തുല്യമാണ്. അന്തരീക്ഷത്തിൽ ഘനീഭവിക്കുന്ന നീരാവി കൊടുങ്കാറ്റുകൾക്കും പ്രകൃതിദുരന്തങ്ങൾക്കും കൂടുതൽ ഊർജ്ജം നൽകുമെന്നതിനാൽ, ലോകത്തിന്റെ വിവിധ ഭാഗങ്ങളിൽ ഉണ്ടാകുന്ന പ്രകൃതിക്ഷോഭങ്ങളുടെ തീവ്രത ഇരട്ടിയാകും.

ഭൂമിയുടെ അന്തരീക്ഷത്തിൽ ഇത്രയധികം നീരാവി അടിഞ്ഞുകൂടുന്നത് കഴിഞ്ഞ ആയിരക്കണക്കിന് വർഷങ്ങൾക്കിടയിൽ ആദ്യമായിട്ടായിരിക്കുമെന്നാണ് കാലാവസ്ഥാ വിദഗ്ദ്ധരുടെ വിലയിരുത്തൽ. ഫോസിൽ ഇന്ധനങ്ങൾ കത്തിക്കുന്നതിലൂടെയുണ്ടാകുന്ന കാർബൺ പുറന്തള്ളലും എൽ നിനോയും ചേരുമ്പോൾ കാലാവസ്ഥാ വ്യതിയാനം വരുംനാളുകളിൽ കൂടുതൽ അപകടകരമായ അവസ്ഥയിലെത്തുമെന്ന് വിദഗ്ദ്ധർ ചൂണ്ടിക്കാണിക്കുന്നു.