അധ്യാപകർക്കും രക്ഷിതാക്കൾക്കും ‘ഫോൺ ബാൻ’; മാതൃകയായി ഒരു ലണ്ടൻ പ്രൈമറി സ്കൂൾ.

ലണ്ടൻ : കുട്ടികൾ സ്കൂളിൽ മൊബൈൽ ഫോൺ ഉപയോഗിക്കുന്നത് നിരോധിക്കുന്നത് സാധാരണയാണ്. എന്നാൽ വിദ്യാർത്ഥികൾ മുൻകൈയെടുത്ത് അധ്യാപകരുടെയും രക്ഷിതാക്കളുടെയും ഫോൺ ഉപയോഗം നിരോധിച്ചാലോ? വെസ്റ്റ് ലണ്ടനിലെ ഈലിങ്ങിലുള്ള ‘ഹോളി ഫാമിലി കാത്തലിക് പ്രൈമറി സ്കൂളിലാണ്’ ഈ വേറിട്ട പരീക്ഷണം നടക്കുന്നത്. ഇവിടെ മാസത്തിലൊരിക്കൽ തിങ്കളാഴ്ചകളിൽ ‘സ്ക്രീൻ-ഫ്രീ ഡേ’ (Screen-free Monday) ആയി ആചരിക്കുന്നു. ഈ ദിവസം സ്കൂളിലെ അധ്യാപകർ മൊബൈൽ ഫോണുകൾ മാത്രമല്ല, ലാപ്ടോപ്പുകളോ കമ്പ്യൂട്ടർ മോണിറ്ററുകളോ ടാബ്‌ലറ്റുകളോ പോലും ഉപയോഗിക്കാറില്ല.

സ്കൂളിലെ ആറാം ക്ലാസ് വിദ്യാർത്ഥിനിയായ സോഫി ജനഷിയ എന്ന കുട്ടിയുടെ ചിന്തയിൽ നിന്നാണ് ഈ ആശയം രൂപപ്പെട്ടത്. കുട്ടികൾ സ്ക്രീനുകൾക്ക് മുന്നിൽ അമിതമായി സമയം ചിലവഴിക്കുന്നതും, ഒരുമിച്ചിരിക്കുമ്പോൾ പോലും പരസ്പരം സംസാരിക്കാതെ ഫോണിൽ മുഴുകുന്നതും ശ്രദ്ധയിൽപ്പെട്ടപ്പോഴാണ് സോഫി ഇങ്ങനെയൊരു നിർദ്ദേശം അധ്യാപകർക്ക് മുന്നിൽ വെച്ചത്. തുടക്കത്തിൽ ഒരു ദിവസത്തെ പരീക്ഷണമായി തുടങ്ങിയ ഇത് വലിയ വിജയമായതോടെ സ്കൂൾ കലണ്ടറിലെ സ്ഥിരം പരിപാടിയായി മാറ്റുകയായിരുന്നുവെന്ന് ഡെപ്യൂട്ടി ഹെഡ് യവോൺ റഥർഫോർഡ് വ്യക്തമാക്കി.

ഈ പദ്ധതിയിൽ കുട്ടികളേക്കാൾ ആവേശത്തോടെ പങ്കാളികളായത് രക്ഷിതാക്കളാണ്. സ്ക്രീൻ രഹിത തിങ്കളാഴ്ചകളിൽ വൈകുന്നേരങ്ങളിൽ ഫോണും ടിവിയും മാറ്റിവെച്ച് തങ്ങൾ മക്കൾക്കൊപ്പം ചെലവഴിക്കുന്ന ചിത്രങ്ങൾ മാതാപിതാക്കൾ തന്നെ സ്കൂളിലേക്ക് അയച്ചു കൊടുക്കാൻ തുടങ്ങി. കാർഡുകൾ കളിച്ചും, പുസ്തകങ്ങൾ വായിച്ചും, ഒരുമിച്ച് നടക്കാൻ പോയുമൊക്കെയാണ് കുടുംബങ്ങൾ ഈ സമയം ആസ്വദിക്കുന്നത്. മുതിർന്നവരുടെ ഫോൺ ഉപയോഗം കുറഞ്ഞതോടെ തങ്ങൾക്ക് കൂടുതൽ ശ്രദ്ധയും സ്നേഹവും ലഭിക്കുന്നുണ്ടെന്ന് കുട്ടികളും സാക്ഷ്യപ്പെടുത്തുന്നു.

ഈ സ്കൂളിന്റെ വിജയം കണ്ട് സമീപപ്രദേശങ്ങളിലെ മറ്റ് സ്കൂളുകളും ഈ മാതൃക പിന്തുടരാൻ താല്പര്യം പ്രകടിപ്പിച്ചിട്ടുണ്ട്. യുകെ ഗവൺമെന്റിന്റെ സാങ്കേതിക വിദ്യാ വകുപ്പ് മന്ത്രി ലിസ് കെൻഡലും, ഓൺലൈൻ സുരക്ഷാ മന്ത്രി കനിഷ്ക നാരായണനും സ്കൂൾ സന്ദർശിക്കുകയും സോഫിയുമായും മറ്റ് കുട്ടികളുമായും ചർച്ചകൾ നടത്തുകയും ചെയ്തു. അധ്യാപകർക്ക് പരമ്പരാഗതമായ അധ്യാപന രീതികളിലേക്ക് തിരിച്ചുപോകാനും, കുടുംബങ്ങൾക്കിടയിലെ പരസ്പര ബന്ധം കൂടുതൽ ദൃഢമാക്കാനും ഈ സ്ക്രീൻ വിരുദ്ധ ദിനം വലിയ രീതിയിൽ സഹായിക്കുന്നുണ്ട്.