യുകെ ‘ഇസ്‌ലാം മതം കോളനിവൽക്കരിക്കുന്നു’; ഫോക്ക്‌ലാൻഡ് ദ്വീപുകൾ തിരിച്ചുപിടിക്കണമെന്ന് അർജന്റീനൻ പ്രസിഡന്റിന്റെ ഉപദേഷ്ടാവ്.
ലണ്ടൻ : യുകെ ഇസ്‌ലാം മതം വഴി കോളനിവൽക്കരിക്കപ്പെടുകയാണെന്ന് അർജന്റീനൻ പ്രസിഡന്റ് ജാവിയർ മിലെയുടെ പ്രധാന ഉപദേഷ്ടാവ് സാന്റിയാഗോ കാപുട്ടോ. തെക്കൻ അറ്റ്ലാന്റിക്കിൽ ‘ഇസ്‌ലാമിക രാഷ്ട്രത്തിന്റെ ഇടപെടൽ’ തടയുന്നതിനായി അർജന്റീന ഫോക്ക്‌ലാൻഡ് ദ്വീപുകളുടെ പരമാധികാരം തിരിച്ചുപിടിക്കണമെന്നും അദ്ദേഹം വാദിച്ചു. ബ്രിട്ടീഷ് പാർലമെന്റ് അംഗമായി സാഗൽ അബ്ദി-വാലി സത്യപ്രതിജ്ഞ ചെയ്യുന്ന ചിത്രം പങ്കുവെച്ചുകൊണ്ട് കാപുട്ടോയുടെ ഈ സോഷ്യൽ മീഡിയ പോസ്റ്റ് പ്രസിഡന്റ് ജാവിയർ മിലേയും ഷെയർ ചെയ്തിട്ടുണ്ട്.
ബ്രിട്ടീഷ് ഓവർസീസ് ടെറിട്ടറിയായ ഫോക്ക്‌ലാൻഡിന്റെ പേരിൽ ലണ്ടനും ബ്യൂണസ് ഐറിസും തമ്മിലുള്ള സംഘർഷം ശക്തമാകുന്നതിനിടയിലാണ് ഈ വിവാദ പരാമർശം. ദ്വീപിലെ എണ്ണ, മത്സ്യബന്ധന വ്യവസായങ്ങളിലെ എക്സിക്യൂട്ടീവുകളെ അർജന്റീന സർക്കാർ ഭീഷണിപ്പെടുത്തുകയും നയതന്ത്ര സമ്മർദ്ദം ചെലുത്തുകയും ചെയ്തിരുന്നു. ഇതേ തുടർന്ന് രാഷ്ട്രീയ പ്രേരിതമായ അറസ്റ്റ് വാറന്റുകൾ തള്ളിക്കളയാൻ യുകെ വിദേശകാര്യ ഓഫീസ് ഇന്റർപോളിനോട് ആവശ്യപ്പെട്ടിട്ടുണ്ട്.
അതേസമയം, പ്രാദേശിക ബിസിനസുകളെ സംരക്ഷിക്കുമെന്നും 2013-ലെ ജനഹിതപരിശോധനയിൽ ബ്രിട്ടീഷ് ഭാഗമായി തുടരാൻ വോട്ട് ചെയ്ത 3,600 വരുന്ന ദ്വീപ് നിവാസികളുടെ ആത്മനിർണ്ണയാവകാശത്തെ മാനിക്കുമെന്നും ബ്രിട്ടീഷ് അധികൃതർ വ്യക്തമാക്കി.
