യുകെയിൽ നിന്ന് ഫ്രാൻസിലേക്ക് നാടുകടത്തുന്ന അഭയാർത്ഥികൾ ക്രൂരമായ ശാരീരിക അക്രമങ്ങൾക്ക് ഇരയാകുന്നതായി റിപ്പോർട്ട്.
പാരീസ്: യുകെയും ഫ്രാൻസും തമ്മിലുള്ള ‘വൺ ഇൻ, വൺ ഔട്ട്’ (One in, one out) ധാരണയുടെ ഭാഗമായി ബ്രിട്ടനിൽ നിന്ന് തിരിച്ചയക്കപ്പെടുന്ന അഭയാർത്ഥികൾ തടങ്കൽ കേന്ദ്രങ്ങളിൽ വെച്ചും മാറ്റുന്നതിനിടയിലും ക്രൂരമായ ശാരീരിക, മാനസിക പീഡനങ്ങൾക്കും അക്രമങ്ങൾക്കും ഇരയാകുന്നതായി റിപ്പോർട്ട്. ഫ്രഞ്ച് ആരോഗ്യ സേവന സംഘടനയായ സാമുസോഷ്യൽ ഡി പാരീസ് (Samusocial de Paris – SSP) ആണ് ഇരകളുടെ ഞെട്ടിക്കുന്ന മെഡിക്കൽ തെളിവുകൾ പുറത്തുവിട്ടത്.
തിരിച്ചയക്കപ്പെട്ട അഭയാർത്ഥികളിൽ ഗുരുതരമായ പരിക്കുകൾ, അസ്ഥി ഒടിവുകൾ, വിലങ്ങ് അണിയിച്ചതുമൂലമുള്ള മുറിവുകൾ, മർദ്ദനമേറ്റ പാടുകൾ എന്നിവ കണ്ടെത്തിയിട്ടുണ്ട്. യുകെയിലെ തടങ്കൽ കേന്ദ്രങ്ങളിൽ വെച്ച് നേരിട്ട മോശം അനുഭവങ്ങളാണ് ഇവരുടെ ആരോഗ്യനില വഷളാക്കിയതെന്ന് മെഡിക്കൽ പരിശോധനകളിൽ തെളിഞ്ഞു. പലരും കടുത്ത മാനസിക ആഘാതവും (PTSD) വിഷാദവും അനുഭവിക്കുന്നതായും ചിലർ അത്യാഹിത വിഭാഗത്തിൽ ചികിത്സ തേടിയതായും സംഘടന വ്യക്തമാക്കി.
ബ്രിട്ടനിൽ നിന്ന് നാടുകടത്തപ്പെടുന്ന അഭയാർത്ഥികളുടെ അവസ്ഥ പരിശോധിക്കാൻ ചുമതലപ്പെടുത്തിയ സമിതി ഈ റിപ്പോർട്ട് ഫ്രഞ്ച് അസംബ്ലിയുടെ അന്വേഷണ കമ്മീഷന് സമർപ്പിച്ചു. യുകെ അധികൃതരുടെ ഭാഗത്തുനിന്നുണ്ടായ അതിക്രമങ്ങളെക്കുറിച്ച് അന്വേഷിക്കാൻ നിയമപരമായ നടപടികൾ സ്വീകരിക്കണമെന്ന് മനുഷ്യാവകാശ സംഘടനകളും ഡോക്ടേഴ്സ് വിത്തൗട്ട് ബോർഡേഴ്സും (MSF) ആവശ്യപ്പെട്ടിട്ടുണ്ട്.
