യുകെയിൽ തരംഗമാകാൻ വെഗോവി ഗുളിക; സ്വകാര്യ പ്രിസ്ക്രിപ്ഷനിലൂടെ വാങ്ങാം.
ലണ്ടൻ: ലോകമെമ്പാടും വലിയ ചർച്ചയായ ‘വെഗോവി’ (Wegovy) ശരീരഭാരം കുറയ്ക്കാനുള്ള മരുന്നിന്റെ ഗുളിക രൂപത്തിന് യുകെയിൽ അനുമതി. മെഡിസിൻസ് ആൻഡ് ഹെൽത്ത് കെയർ പ്രൊഡക്റ്റ്സ് റെഗുലേറ്ററി ഏജൻസി (MHRA) ആണ് ഗുളികയ്ക്ക് അംഗീകാരം നൽകിയത്. യുഎസ്, യുഎഇ എന്നീ രാജ്യങ്ങൾക്ക് ശേഷം ഈ ഗുളികയ്ക്ക് അനുമതി നൽകുന്ന മൂന്നാമത്തെ രാജ്യമാണ് യുകെ. യൂറോപ്പിൽ ഈ മരുന്നിന് അനുമതി നൽകുന്ന ആദ്യ രാജ്യം കൂടിയാണിത്.
ബിഎംഐ (BMI) 30-ഓ അതിൽ കൂടുതലോ ഉള്ള അമിതവണ്ണമുള്ളവർക്കും, ബിഎംഐ 27-30 വരെയുള്ളതും ഒപ്പം വണ്ണവുമായി ബന്ധപ്പെട്ട മറ്റ് ആരോഗ്യപ്രശ്നങ്ങളുള്ളവർക്കും ഈ ഗുളിക ഉപയോഗിക്കാം. ക്ലിനിക്കൽ പരീക്ഷണങ്ങളിൽ ഉയർന്ന ഡോസ് ഗുളികകൾ ഉപയോഗിച്ചവർക്ക് ശരീരഭാരത്തിന്റെ 14 മുതൽ 17 ശതമാനം വരെ കുറയ്ക്കാൻ സാധിച്ചതായി കണ്ടെത്തിയിട്ടുണ്ട്. ദിവസവും വെറും വയറ്റിൽ എട്ട് മണിക്കൂറെങ്കിലും ഉപവാസത്തിന് ശേഷം ഒരു സിപ്പ് വെള്ളം മാത്രം കുടിച്ച് വേണം ഈ ഗുളിക കഴിക്കാൻ. ഗുളിക കഴിച്ച് 30 മിനിറ്റ് നേരത്തേക്ക് മറ്റ് ഭക്ഷണങ്ങളോ പാനീയങ്ങളോ കഴിക്കാൻ പാടില്ല.
നാഷണൽ ഇൻസ്റ്റിറ്റ്യൂട്ട് ഫോർ ഹെൽത്ത് ആൻഡ് കെയർ എക്സലൻസിന്റെ (NICE) അന്തിമ അംഗീകാരം ലഭിക്കുന്നത് വരെ ഈ ഗുളികകൾ ബ്രിട്ടനിലെ പൊതുജനാരോഗ്യ സംവിധാനമായ എൻഎച്ച്എസ് (NHS) വഴി സൗജന്യമായി ലഭിക്കില്ല. അതിനാൽ താല്പര്യമുള്ളവർ സ്വകാര്യ പ്രിസ്ക്രിപ്ഷൻ വഴി പണം നൽകി വാങ്ങേണ്ടി വരും. നിലവിൽ വെഗോവി ഇൻജക്ഷനുകൾക്ക് പ്രതിമാസം 90 മുതൽ 300 പൗണ്ട് വരെയാണ് സ്വകാര്യ വിപണിയിൽ വിലയെന്നിരിക്കെ, ഗുളിക രൂപത്തിന് ഇതിനേക്കാൾ വില കുറവായിരിക്കുമെന്നാണ് രോഗികളുടെ പ്രതീക്ഷ.
ഓക്കാനം, വയറിളക്കം, മലബന്ധം, ഛർദ്ദി തുടങ്ങിയ ദഹനസംബന്ധമായ ബുദ്ധിമുട്ടുകളാണ് ഇതിന്റെ പ്രധാന പാർശ്വഫലങ്ങൾ. ഇൻജക്ഷൻ എടുക്കാൻ ഭയമുള്ള ദശലക്ഷക്കണക്കിന് ആളുകൾക്ക് ഈ ഗുളിക വലിയൊരു ആശ്വാസമാകുമെന്നാണ് ഫാർമസി വിദഗ്ദ്ധർ പറയുന്നത്. എന്നാൽ, ഗുളിക രൂപത്തിലുള്ള മരുന്നുകൾ വിപണിയിൽ എത്തുന്നതോടെ കരിഞ്ചന്തയിൽ വ്യാജ മരുന്നുകൾ ഇറങ്ങാനുള്ള സാധ്യത വളരെ കൂടുതലാണെന്നും, രോഗികൾ ജാഗ്രത പാലിക്കണമെന്നും നാഷണൽ ഫാർമസി അസോസിയേഷൻ മുന്നറിയിപ്പ് നൽകുന്നു.
