യുകെയിൽ കൺസർവേറ്റീവ് സർക്കാരിന്റെ വാഗ്ദാനങ്ങൾ ജലരേഖയായി; ‘ലെവലിങ് അപ്പ്’ പദ്ധതികളിൽ ഭൂരിഭാഗവും പൂർത്തിയായില്ല.

ലണ്ടൻ : മേഖലാതലത്തിലെ അസമത്വം പരിഹരിക്കാനും പിന്നാക്കം നിൽക്കുന്ന നഗരങ്ങളെ വികസിപ്പിക്കാനുമായി കൺസർവേറ്റീവ് സർക്കാർ കൊണ്ടുവന്ന ‘ലെവലിംഗ് അപ്പ്’ (Levelling Up) പദ്ധതികളിലധികവും വർഷങ്ങൾ കഴിഞ്ഞിട്ടും പൂർത്തിയായിട്ടില്ലെന്ന് റിപ്പോർട്ട്. മെയ് വരെയുള്ള കണക്കുകൾ പ്രകാരം അനുവദിച്ച 1,347 പദ്ധതികളിൽ 821 എണ്ണവും ഇതുവരെ പൂർത്തിയായിട്ടില്ലെന്ന് ‘ദ ഗാർഡിയൻ’ നടത്തിയ അന്വേഷണത്തിൽ വ്യക്തമായി. ഫണ്ട് ലഭിച്ച 73 കൗൺസിൽ മേഖലകളിൽ ഒരൊറ്റ പദ്ധതി പോലും പൂർണ്ണമായി പൂർത്തിയാക്കാൻ സാധിച്ചിട്ടില്ല.

വെയിൽസ്, സ്കോട്ട്‌ലൻഡ്, നോർത്തേൺ അയർലൻഡ് എന്നിവിടങ്ങളിലും ഇംഗ്ലണ്ടിന്റെ വടക്കുപടിഞ്ഞാറൻ മേഖലകളിലുമാണ് പദ്ധതികൾ നടപ്പിലാക്കുന്നതിൽ കടുത്ത മന്ദഗതി രേഖപ്പെടുത്തിയിട്ടുള്ളത്. പദ്ധതികൾക്ക് തുക അനുവദിച്ച ശേഷമുണ്ടായ കടുത്ത പണപ്പെരുപ്പവും നിർമ്മാണച്ചെലവിലുണ്ടായ വർദ്ധനവുമാണ് പദ്ധതികൾ വൈകാനോ നിർത്തിവെക്കാനോ കൗൺസിലുകളെ നിർബന്ധിതരാക്കിയത്. കേന്ദ്രീകൃതമായി ഫണ്ട് അനുവദിക്കുന്ന രീതിയും തദ്ദേശ ഭരണകൂടങ്ങൾക്ക് കൃത്യമായ സമയപരിധി ലഭിക്കാത്തതും തിരിച്ചടിയായെന്ന് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു.

തുടർന്ന് വന്ന ലേബർ സർക്കാർ ഈ പദ്ധതികളുടെ കാലാവധി 2028 മാർച്ച് വരെ നീട്ടുകയും ‘ലോക്കൽ റീജനറേഷൻ ഫണ്ട്’ എന്ന് പുനർനാമകരണം ചെയ്യുകയും ചെയ്തിട്ടുണ്ട്. കൂടാതെ തദ്ദേശീയ സമിതികൾക്ക് കൂടുതൽ തീരുമാനാധികാരവും 10 വർഷത്തേക്ക് പ്രതിവർഷം 2 മില്യൺ പൗണ്ട് ഉറപ്പുനൽകുന്നതുമായ ‘പ്രൈഡ് ഇൻ പ്ലേസ്’ (Pride in Place) എന്ന പുതിയ പദ്ധതിക്കും ലേബർ സർക്കാർ തുടക്കം കുറിച്ചു. കൗൺസിലുകളെ ഫണ്ടിനായി പരസ്പരം മത്സരിപ്പിക്കുന്നതിന് പകരം പ്രാദേശിക വികസനത്തിന് സ്ഥിരത നൽകാനാണ് ഈ നീക്കം.

എന്നാൽ പുതിയ പദ്ധതിക്കും തുക വിനിയോഗിക്കുന്നതിൽ മുൻ സർക്കാരിന്റേതിന് സമാനമായ കാലതാമസം നേരിട്ടേക്കാമെന്ന് പ്രാദേശിക സാമ്പത്തിക വിദഗ്ദ്ധർ മുന്നറിയിപ്പ് നൽകുന്നുണ്ട്. അടിസ്ഥാന സൗകര്യ വികസന പദ്ധതികൾ പൂർത്തിയാക്കാൻ കൂടുതൽ സമയമെടുക്കുമെന്നതിനാൽ അടിയന്തരമായി പ്രാദേശിക സമ്പദ്‌വ്യവസ്ഥയെ ശക്തിപ്പെടുത്തുന്ന ഇടപെടലുകൾ കേന്ദ്ര സർക്കാരിന്റെ ഭാഗത്ത് നിന്ന് ഉണ്ടാകണമെന്നാണ് കൗൺസിലുകളുടെ ആവശ്യം.