മുഹമ്മദ് അൽ ഫായിദിനെതിരെ മനുഷ്യക്കടത്ത് അന്വേഷണം വേണമെന്ന് ഇരകൾ.

ലണ്ടൻ : ഹാരോട്സ് (Harrods) മുൻ ഉടമ മുഹമ്മദ് അൽ ഫായിദ് നടത്തിയ ലൈംഗിക അതിക്രമങ്ങൾക്ക് ഇരയായവർ, അദ്ദേഹം ഉൾപ്പെട്ട അന്താരാഷ്ട്ര മനുഷ്യക്കടത്ത് ശൃംഖലയെക്കുറിച്ച് സമഗ്രമായ അന്വേഷണം നടത്തണമെന്ന് ആവശ്യപ്പെടുന്നു. ഇരകളുടെ കൂട്ടായ്മയായ ‘നോ വൺ എബൗവ്’ (NOA), മെട്രോപൊളിറ്റൻ പോലീസ് തങ്ങളുടെ അന്വേഷണത്തിന്റെ പ്രധാന ശ്രദ്ധ മനുഷ്യക്കടത്തിലേക്ക് മാറ്റണമെന്ന് ആവശ്യപ്പെട്ടു. ശൃംഖലയുടെ യഥാർത്ഥ വ്യാപ്തി പുറത്തുകൊണ്ടുവരാൻ ഇത് അത്യാവശ്യമാണെന്ന് അവർ വാദിക്കുന്നു.

ലണ്ടനിലെ ആഡംബര ഡിപ്പാർട്ട്മെന്റ് സ്റ്റോറായ ഹാരോട്സ്, പാരീസിലെ റിറ്റ്സ് ഹോട്ടൽ, ഫുൾഹാം എഫ്സി തുടങ്ങിയ ഇടങ്ങളിൽ വെച്ച് അതിക്രമം നേരിട്ട 421 പേർ ഇതുവരെ രംഗത്തെത്തിയിട്ടുണ്ട്. മെട്രോപൊളിറ്റൻ പോലീസ് നിലവിൽ 155 ഇരകളുടെ പരാതികളാണ് അന്വേഷിക്കുന്നത്. എന്നാൽ, ഈ അതിക്രമങ്ങൾക്ക് ഫായിദിനെ സഹായിച്ച അന്താരാഷ്ട്ര ശൃംഖലയെ പിടികൂടാൻ നാഷണൽ ക്രൈം ഏജൻസി മറ്റ് രാജ്യങ്ങളിലെ അന്വേഷണ ഉദ്യോഗസ്ഥരെ ഉൾപ്പെടുത്തി ഒരു സംയുക്ത അന്വേഷണ സംഘം (Jit) രൂപീകരിക്കണമെന്നാണ് ഇരകളുടെ ആവശ്യം

തൊണ്ണൂറുകളിൽ ഹാരോട്സിൽ ജോലി ചെയ്തിരുന്ന ‘ജസ്റ്റിൻ’ (യഥാർത്ഥ പേരല്ല) എന്ന അതിജീവിത, ഫായിദിന്റെ പ്രവർത്തന രീതിയെക്കുറിച്ച് തുറന്നുപറഞ്ഞു. സുരക്ഷാ ജീവനക്കാരുമായി സ്റ്റോറിലൂടെ നടന്ന്, തനിക്ക് താല്പര്യം തോന്നുന്ന യുവതികളെ ഫായിദ് ഓഫീസിലേക്ക് വിളിപ്പിക്കുകയായിരുന്നു പതിവ്. തുടർന്ന് ഭീഷണിപ്പെടുത്തിയും പണം നൽകിയും ഇവരെ ഒതുക്കാൻ ശ്രമിച്ചു. സുരക്ഷാ ഉദ്യോഗസ്ഥർ, എച്ച്ആർ ജീവനക്കാർ, വൻതോതിൽ പണം അനുവദിച്ച ബാങ്ക് ഉദ്യോഗസ്ഥർ, പ്രൈവറ്റ് എയർപോർട്ടുകളിലെ ജീവനക്കാർ എന്നിവരടങ്ങുന്ന ഒരു വലിയ സംഘം ഫായിദിനെ സഹായിച്ചിരുന്നു.

അന്വേഷണം ആരംഭിച്ച് കഴിഞ്ഞ 18 മാസത്തിനിടെ നാല് പ്രതികളെ പോലീസ് ചോദ്യം ചെയ്തിട്ടുണ്ട്. 2018-ൽ ജസ്റ്റിൻ പോലീസിൽ പരാതി നൽകിയിരുന്നെങ്കിലും യാതൊരു തുടർനടപടിയും ഉണ്ടായിരുന്നില്ല. ഇത്തരത്തിൽ പരാതികൾ കൈകാര്യം ചെയ്യുന്നതിൽ വീഴ്ച വരുത്തിയ ഒരു നിലവിലെ പോലീസ് ഉദ്യോഗസ്ഥനും നാല് മുൻ ഉദ്യോഗസ്ഥർക്കുമെതിരെ നിലവിൽ സ്വതന്ത്ര അന്വേഷണം നടക്കുന്നുണ്ട്. ഇരകളുടെ സംരക്ഷണത്തിനാണ് മുൻഗണന നൽകുന്നതെന്നും, ലഭ്യമായ വിവരങ്ങൾ വെച്ച് അതിസങ്കീർണ്ണവും സമഗ്രവുമായ അന്വേഷണമാണ് പോലീസ് നടത്തിവരുന്നതെന്നും മെട്രോപൊളിറ്റൻ പോലീസ് വക്താവ് അറിയിച്ചു.