മിസിസിപ്പിയിൽ കരളലിയിക്കുന്ന ദുരന്തം; പൊലീസിന്റെ വെടിയേറ്റ് ഒരു വയസ്സുകാരൻ കൊല്ലപ്പെട്ടു.

മിസിസിപ്പി : യൂണൈറ്റഡ് സ്റ്റേറ്റ്സിലെ വടക്കൻ മിസിസിപ്പിയിലുണ്ടായ പൊലീസ് വെടിവെപ്പിൽ ഒരു വയസ്സുകാരൻ കൊല്ലപ്പെടുകയും മറ്റൊരു സ്ത്രീക്ക് ഗുരുതരമായി പരിക്കേൽക്കുകയും ചെയ്തു. കോഹൻ വൈലി എന്ന കുഞ്ഞാണ് വെടിയേറ്റ് മരിച്ചത്. ഒരു വാൾമാർട്ട് (Walmart) സ്റ്റോറിൽ നടന്ന മോക്ഷണശ്രമത്തെക്കുറിച്ച് അന്വേഷിക്കാനെത്തിയ സെനാറ്റോബിയ പൊലീസ് ഉദ്യോഗസ്ഥർ, സംശയകരമായ സാഹചര്യത്തിൽ കണ്ട ഒരു വാഹനത്തിന് നേരെ വെടിയുതിർക്കുകയായിരുന്നു. ഈ വാഹനത്തിനുള്ളിൽ കൊല്ലപ്പെട്ട കുഞ്ഞിന്റെ അമ്മയും അമ്മയുടെ സുഹൃത്തും ഉണ്ടായിരുന്നു.

പൊലീസിന്റെ റിപ്പോർട്ട് പ്രകാരം, പാർക്കിംഗ് ഏരിയയിൽ വെച്ച് വാഹനം തടയാൻ ശ്രമിച്ച ഉദ്യോഗസ്ഥർക്ക് നേരെ ഡ്രൈവർ കാർ ഓടിച്ചു കയറ്റാൻ ശ്രമിച്ചപ്പോഴാണ് വെടിവെപ്പുണ്ടായത്. എന്നാൽ താൻ കുറ്റകൃത്യങ്ങളിലൊന്നും പങ്കാളിയല്ലെന്നും, കാറിനുള്ളിൽ ഒരു കുഞ്ഞുണ്ടെന്ന കാര്യം പൊലീസിനെ വിളിച്ചുപറയാൻ ശ്രമിച്ചിട്ടും അവർ കാറിന് നേരെ വെടിയുതിർക്കുകയായിരുന്നുവെന്നും കുഞ്ഞിന്റെ അമ്മ വ്യക്തമാക്കി. വെടിയേറ്റതിനെ തുടർന്ന് കുട്ടിയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

നിരപരാധിയായ ഒരു കുഞ്ഞിന്റെ ജീവൻ പൊലിഞ്ഞ സംഭവത്തിൽ നീതി ഉറപ്പാക്കാനായി പ്രമുഖ മനുഷ്യാവകാശ അഭിഭാഷകനായ ബെൻ ക്രംപിനെ (Ben Crump) കുടുംബം ചുമതലപ്പെടുത്തിയിട്ടുണ്ട്. തിരക്കേറിയ ഒരു വാൾമാർട്ട് പാർക്കിംഗ് സ്ഥലത്ത് വെച്ച് പൊലീസ് നടത്തിയ ഈ വെടിവെപ്പ് അങ്ങേയറ്റം ക്രൂരവും അനാവശ്യവുമാണെന്ന് അദ്ദേഹം പ്രസ്താവനയിലൂടെ കുറ്റപ്പെടുത്തി. തന്റെ കൊച്ചുമകൻ അതീവ സന്തോഷവാനായ ഒരു കുഞ്ഞായിരുന്നുവെന്നും അവന്റെ ജീവിതം തുടങ്ങും മുൻപേ ആരോ അത് അവസാനിപ്പിച്ചുവെന്നും കോഹന്റെ മുത്തശ്ശൻ കാർലോസ് ഹെയ്ൻസ് സങ്കടത്തോടെ ഓർത്തു.

മിസിസിപ്പി ബ്യൂറോ ഓഫ് ഇൻവെസ്റ്റിഗേഷൻ നിലവിൽ ഈ വെടിവെപ്പിനെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്. കൂടുതൽ വിവരങ്ങൾ ലഭ്യമാകുന്ന മുറയ്ക്ക് പുറത്തുവിടുമെന്ന് സെനാറ്റോബിയ പൊലീസ് ഡിപ്പാർട്ട്മെന്റ് ഫേസ്ബുക്കിലൂടെ അറിയിച്ചു. തങ്ങളുടെ സ്റ്റോറിന് സമീപമുണ്ടായ ഈ ദാരുണ സംഭവത്തിൽ അതീവ ദുഃഖമുണ്ടെന്നും അന്വേഷണവുമായി പൂർണ്ണമായി സഹകരിക്കുമെന്നും വാൾമാർട്ട് അധികൃതരും വ്യക്തമാക്കി.