ഭക്ഷ്യസുരക്ഷ പ്രതിസന്ധിയിൽ: യുഎസിൽ ലക്ഷക്കണക്കിന് കുട്ടികൾക്ക് ‘സ്നാപ്’ ആനുകൂല്യങ്ങൾ നഷ്ടമായി.

വാഷിംഗ്ടൺ ഡി.സി: യുഎസിൽ റിപ്പബ്ലിക്കൻ പാർട്ടി കൊണ്ടുവന്ന പുതിയ നിയമനിർമ്മാണത്തെത്തുടർന്ന് പാവപ്പെട്ടവർക്കായുള്ള ‘സ്നാപ്’ (Supplemental Nutrition Assistance Program – Snap) ഭക്ഷ്യസഹായ പദ്ധതിയിൽ നിന്നും പത്തുലക്ഷത്തിലധികം കുട്ടികൾ പുറത്തായതായി റിപ്പോർട്ട്. സെന്റർ ഓൺ ബഡ്ജറ്റ് ആൻഡ് പോളിസി പ്രയോറിറ്റീസ് (CBPP) പുറത്തുവിട്ട പുതിയ പഠന റിപ്പോർട്ടിലാണ് ഞെട്ടിക്കുന്ന ഈ വിവരങ്ങളുള്ളത്. 2025 ജൂലൈയിൽ യുഎസ് കോൺഗ്രസ് പാസാക്കിയ ‘വൺ ബിഗ് ബ്യൂട്ടിഫുൾ ബിൽ ആക്ട്’ പ്രാബല്യത്തിൽ വന്നതിനു ശേഷം, 2025 ജൂലൈ മുതൽ 2026 മാർച്ച് വരെയുള്ള കാലയളവിൽ മാത്രം 40 ലക്ഷത്തിലധികം അമേരിക്കക്കാർക്കാണ് ഈ പദ്ധതിയുടെ ആനുകൂല്യം നഷ്ടപ്പെട്ടത്.

​പുതിയ നിയമം നടപ്പിലാക്കിയതിനു ശേഷം രാജ്യത്ത് ഏറ്റവും വലിയ തിരിച്ചടിയുണ്ടായത് അരിസോണയിലാണ്. ആനുകൂല്യങ്ങൾ ലഭിക്കുന്നതിനുള്ള യോഗ്യതാ മാനദണ്ഡങ്ങൾ കർശനമാക്കുകയും പരിശോധനകൾ വർദ്ധിപ്പിക്കുകയും ചെയ്തതോടെ സംസ്ഥാനത്തെ മൊത്തം ഗുണഭോക്താക്കളുടെ എണ്ണം പകുതിയായി കുറഞ്ഞു. മെയ് മാസം വരെയുള്ള ഔദ്യോഗിക കണക്കുകൾ പ്രകാരം അരിസോണയിൽ മാത്രം 4,50,000-ത്തിലധികം ആളുകളാണ് പദ്ധതിയിൽ നിന്നും പുറത്തായത്. പഠനം നടത്തിയ 19 സംസ്ഥാനങ്ങളിൽ നിന്നായി പത്തുലക്ഷത്തിലധികം കുട്ടികൾക്കാണ് പട്ടിണി മാറ്റാനുള്ള ഈ പ്രധാന ആശ്രയം നഷ്ടപ്പെട്ടിരിക്കുന്നത്.

​ ഭക്ഷ്യസഹായം ലഭിച്ചിരുന്ന കുട്ടികളിൽ നാലിലൊരാൾക്ക് വീതം പദ്ധതിക്ക് പുറത്തുപോകേണ്ടി വന്നത് ലൂസിയാനയിൽ വലിയ പ്രതിസന്ധി സൃഷ്ടിച്ചിട്ടുണ്ട്. സമാനമായ രീതിയിൽ മസാച്യുസെറ്റ്സ്, ടെക്സസ് എന്നീ സംസ്ഥാനങ്ങളിലും അഞ്ചിലൊന്ന് കുട്ടികൾക്ക് പദ്ധതിയുടെ ആനുകൂല്യം ഇല്ലാതായി. ട്രംപ് ഭരണകൂടത്തിന് കീഴിൽ ഫെഡറൽ ഭക്ഷ്യസഹായ പദ്ധതികളിൽ വരുത്തിയ വൻ വെട്ടിക്കുറയ്ക്കലുകൾക്ക് പിന്നാലെയാണ് പുതിയ നിയമം കൂടിയെത്തിയത്.

​ യുഎസിലെ കടുത്ത ഭക്ഷ്യപ്രതിസന്ധി മറികടക്കാൻ കോൺഗ്രസ് അടിയന്തരമായി ഇടപെടണമെന്ന് സി.ബി.പി.പി (CBPP) മുന്നറിയിപ്പ് നൽകി. ഇതിനിടെ, ഈ വെട്ടിക്കുറയ്ക്കലുകൾ പിൻവലിക്കണമെന്ന് ആവശ്യപ്പെട്ട് പ്രോഗ്രസീവ് ഡെമോക്രാറ്റ് പ്രതിനിധിയായ ഇൽഹാൻ ഒമർ പ്രതിനിധി സഭയിൽ ഭേദഗതി അവതരിപ്പിച്ചെങ്കിലും റിപ്പബ്ലിക്കൻ ഭൂരിപക്ഷം അത് നിരസിച്ചു. നിലവിലെ സാഹചര്യം മുൻനിർത്തി ഇരുന്നൂറിലധികം യുഎസ് മേയർമാർ ഒപ്പിട്ട കത്ത് സെനറ്റിന് കൈമാറിയിട്ടുണ്ട്.