ബ്രെക്സിറ്റ് തിരിച്ചടിയായോ? പ്രതീക്ഷകൾ തകിടം മറിഞ്ഞു; വിദേശ തൊഴിലാളികളുടെ എണ്ണത്തിൽ വൻ വർദ്ധനവുമായി ബ്രെക്സിറ്റ് അനുകൂല മേഖലകൾ!

ലണ്ടൻ : ബ്രെക്സിറ്റ് ഹിതപരിശോധനയ്ക്ക് ശേഷം (Brexit Referendum), യൂറോപ്യൻ യൂണിയൻ വിടാൻ അനുകൂലമായി വോട്ട് ചെയ്ത യുകെയിലെ ഭൂരിഭാഗം പ്രദേശങ്ങളിലും വിദേശ തൊഴിലാളികളുടെ എണ്ണത്തിൽ വലിയ വർദ്ധനവുണ്ടായതായി അന്വേഷണ റിപ്പോർട്ട് വ്യക്തമാക്കുന്നു.

ബ്രെക്സിറ്റിനെ പിന്തുണച്ച വോട്ടർമാരുടെ പ്രതീക്ഷകൾക്ക് വിപരീതമായി, കഴിഞ്ഞ ഒരു പതിറ്റാണ്ടിനിടെ ഈ പ്രദേശങ്ങളിൽ വിദേശ തൊഴിലാളികളുടെ എണ്ണത്തിൽ വലിയ തോതിലുള്ള ആപേക്ഷിക വളർച്ച രേഖപ്പെടുത്തുക മാത്രമല്ല, സാമ്പത്തികമായും സാമൂഹികമായും ഈ മേഖലകൾ കൂടുതൽ പിന്നോട്ട് പോവുകയും ചെയ്തു. കോവിഡ്-19, യുക്രൈൻ യുദ്ധം, ഉത്പാദന മേഖലയിലെ തകർച്ച തുടങ്ങിയവ ഈ തകർച്ചയ്ക്ക് ആക്കം കൂട്ടി.

ഗവൺമെന്റിന്റെ ഡാറ്റ പരിശോധിച്ചാൽ, 2016-നും 2024-ന്റെ അവസാനത്തിനും ഇടയിൽ ബ്രെക്സിറ്റിനെ ശക്തമായി പിന്തുണച്ച പ്രദേശങ്ങളിലാണ് യുകെയ്ക്ക് പുറത്തുനിന്നുള്ള തൊഴിലാളികളുടെ എണ്ണത്തിൽ ശതമാന അടിസ്ഥാനത്തിൽ ഏറ്റവും വേഗമേറിയ വളർച്ചയുണ്ടായത്. ഉദാഹരണത്തിന്, വിഗാനിലെ (Wigan) മേക്കർഫീൽഡ് (Makerfield) നിയോജകമണ്ഡലത്തിൽ 2016 ജൂണിൽ 5%-ൽ താഴെ മാത്രമായിരുന്ന വിദേശ തൊഴിലാളികളുടെ എണ്ണം 2024 ഡിസംബറായപ്പോഴേക്കും ഏകദേശം 10% ആയി വർദ്ധിച്ചു.

അതേസമയം, യൂറോപ്യൻ യൂണിയനിൽ തുടരണമെന്ന് വോട്ട് ചെയ്ത വലിയ നഗരങ്ങളുൾപ്പെടുന്ന പ്രദേശങ്ങൾ (Remain-voting areas) 2015-നും 2025-നും ഇടയിൽ വികസനത്തിന്റെ കാര്യത്തിൽ വലിയ മുന്നേറ്റം നടത്തി. എന്നാൽ ബോസ്റ്റൺ (Boston), സ്കെഗ്നെസ് (Skegness), ഹാർട്ട്ലിപൂൾ (Hartlepool), നോർത്ത് വാർവിക്ഷയർ (North Warwickshire), ബെഡ്‌വർത്ത് (Bedworth) തുടങ്ങിയ ബ്രെക്സിറ്റ് അനുകൂല പ്രദേശങ്ങൾ കൂടുതൽ ദാരിദ്ര്യത്തിലേക്കും പിന്നോക്കാവസ്ഥയിലേക്കും വീണു. .

കുടിയേറ്റ നിരക്കിലെ വർദ്ധനവും ഈ പ്രദേശങ്ങളുടെ തകർച്ചയും തമ്മിൽ നേരിട്ട് ബന്ധമില്ലെന്നും, ഈ പ്രദേശങ്ങൾ നേരത്തെ തന്നെ സാമ്പത്തികമായി ദുർബലമായിരുന്നുവെന്നും വിദഗ്ധർ വിലയിരുത്തുന്നു. മേക്കർഫീൽഡ് മണ്ഡലത്തിൽ മാത്രം കഴിഞ്ഞ പത്ത് വർഷത്തിനിടെ ഭവന വികസന റാങ്കിങ്ങിൽ 52 സ്ഥാനങ്ങളും കുറ്റകൃത്യങ്ങളുടെ കാര്യത്തിൽ 127 സ്ഥാനങ്ങളും പിന്നോട്ട് പോയി.