ഫ്രാൻസിൽ വിദ്യാർത്ഥി പ്രക്ഷോഭം അക്രമാസക്തം; 1,200 പേർ അറസ്റ്റിൽ, ചരിത്രപരമായ കെട്ടിടങ്ങൾക്ക് തീയിട്ടു.

പാരീസ്: സ്കൂളുകളിലെ അടിസ്ഥാന സൗകര്യങ്ങളുടെ അഭാവത്തിലും അധ്യാപക ക്ഷാമത്തിലും പ്രതിഷേധിച്ച് ഫ്രാൻസിൽ സ്കൂൾ വിദ്യാർത്ഥികൾ ആരംഭിച്ച പ്രക്ഷോഭം രാജ്യവ്യാപക അക്രമസംഭവങ്ങളിലേക്ക് വഴിമാറി. ശനിയാഴ്ച രാജ്യത്തിന്റെ വിവിധ ഭാഗങ്ങളിൽ പൊലീസും പ്രക്ഷോഭകരും തമ്മിലുണ്ടായ കടുത്ത ഏറ്റുമുട്ടലിൽ 1,200-ഓളം പേരെ പൊലീസ് അറസ്റ്റ് ചെയ്തു. പ്രക്ഷോഭത്തിന്റെ മറവിൽ മുഖംമൂടി ധരിച്ചെത്തിയ സാമൂഹിക വിരുദ്ധർ വ്യാപകമായി കടകൾ കൊള്ളയടിക്കുകയും സർക്കാർ കെട്ടിടങ്ങൾക്ക് തീയിടുകയും ചെയ്തു. അക്രമസംഭവങ്ങളിൽ 150-ഓളം പൊലീസുകാർക്ക് പരിക്കേറ്റതായി പ്രധാനമന്ത്രി സെബാസ്റ്റ്യൻ ലെകോർണു അറിയിച്ചു.

തൊഴിലില്ലായ്മയ്ക്കും വിലക്കയറ്റത്തിനും എതിരെ പെൻഷൻകാരും കർഷകരും തൊഴിലാളികളും വിദ്യാർത്ഥികൾക്ക് പിന്തുണയുമായി തെരുവിലിറങ്ങിയതോടെയാണ് പ്രതിഷേധം വലിയ ജനകീയ മുന്നേറ്റമായി മാറിയത്. 2018-ലെ പ്രശസ്തമായ ‘യല്ലോ വെസ്റ്റ്’ (Yellow Vests) പ്രക്ഷോഭത്തിന് സമാനമായ സാഹചര്യമാണ് നിലവിൽ രാജ്യത്ത് സൃഷ്ടിക്കപ്പെട്ടിരിക്കുന്നത്. പാരീസിൽ മാത്രം അരലക്ഷത്തിലധികം ആളുകൾ തെരുവിലിറങ്ങി.

ലിമോജസ് (Limoges) നഗരത്തിലെ 143 വർഷം പഴക്കമുള്ള ചരിത്രപ്രധാനമായ ടൗൺ ഹാൾ കെട്ടിടത്തിന് പ്രതിഷേധക്കാർ തീയിട്ടു. കെട്ടിടത്തിന്റെ മേൽക്കൂര നിലംപതിക്കുകയും വലിയൊരു ഭാഗം പൂർണ്ണമായി കത്തിയമരുകയും ചെയ്തു. ഇത് രാജ്യത്തിന്റെ സാംസ്കാരിക പൈതൃകത്തിന് വലിയൊരു ദുരന്തമാണെന്ന് പ്രാദേശിക അധികൃതർ വ്യക്തമാക്കി. മാർസെയിൽ നഗരസഭാ കാര്യാലയം തള്ളിക്കയറിയ പ്രക്ഷോഭകർ മതിലുകളിൽ അനാർക്കി ചിഹ്നങ്ങൾ സ്പ്രേ ചെയ്യുകയും നാശനഷ്ടങ്ങൾ വരുത്തുകയും ചെയ്തു.

വിലക്കയറ്റവും ജീവിതച്ചെലവും താങ്ങാനാവാത്ത അവസ്ഥയിലാണെന്നും വിദ്യാർത്ഥികളുടെ ന്യായമായ ആവശ്യങ്ങളെ അടിച്ചമർത്താനാണ് സർക്കാർ ശ്രമിക്കുന്നതെന്നും പ്രക്ഷോഭകർ ആരോപിക്കുന്നു. പ്രതിഷേധിക്കാനുള്ള ഭരണഘടനാപരമായ അവകാശത്തെ മാനിക്കുന്നുവെന്നും എന്നാൽ അക്രമവും പൊതുമുതൽ നശിപ്പിക്കുന്നതും അംഗീകരിക്കാനാവില്ലെന്നും പ്രസിഡന്റ് ഇമ്മാനുവൽ മാക്രോൺ വ്യക്തമാക്കി. സ്ഥിതിഗതികൾ നിയന്ത്രണവിധേയമാക്കാൻ കൂടുതൽ സുരക്ഷാ സേനയെ രാജ്യത്തുടനീളം വിന്യസിച്ചിട്ടുണ്ട്.