ജയിലുകളിൽ നിന്ന് നൂറുകണക്കിന് തടവുകാരെ മുൻകൂട്ടി മോചിപ്പിച്ചു; പാർപ്പിടമില്ലാതെ പ്രതികൾ തെരുവിൽ എത്തുമെന്ന് ആശങ്ക!
ലണ്ടൻ : ജയിലുകളിലെ അതിരൂക്ഷമായ തിരക്ക് ഒഴിവാക്കുന്നതിന്റെ ഭാഗമായി നൂറുകണക്കിന് തടവുകാരെ ഇന്ന് മുതൽ മുൻകൂട്ടി മോചിപ്പിച്ചുതുടങ്ങി. ഗാർഹിക പീഡനക്കേസുകളിലെ പ്രതികളും അക്രമകാരികളും ഉൾപ്പെടെ അയ്യായിരത്തോളം കുറ്റവാളികളെയാണ് ഘട്ടങ്ങളായി വിടാൻ തീരുമാനിച്ചിരിക്കുന്നത്. എന്നാൽ കൃത്യമായ താമസസൗകര്യങ്ങൾ ഒരുക്കുന്നതിൽ പ്രൊബേഷൻ സംവിധാനങ്ങൾ പരാജയപ്പെടുകയാണെന്നും പലരും തെരുവുകളിലേക്ക് ഇറങ്ങേണ്ട അവസ്ഥയാണെന്നും ആശങ്ക ഉയർന്നിട്ടുണ്ട്.
തടവുകാർക്ക് പുറത്തിറങ്ങുമ്പോൾ അനുയോജ്യമായ പാർപ്പിടം ഉറപ്പാക്കുന്നത് വഴി കുറ്റകൃത്യങ്ങൾ ആവർത്തിക്കുന്നത് ഒരു പരിധി വരെ തടയാനാകുമെന്നാണ് നിയമം പറയുന്നത്. എന്നാൽ പല നഗരങ്ങളിലും എക്സ്-ഓഫെൻഡർമാർക്കുള്ള ഹോസ്റ്റലുകൾ പൂർണ്ണമായും നിറഞ്ഞിരിക്കുകയാണെന്ന് ഉദ്യോഗസ്ഥർ വ്യക്തമാക്കി. ജയിൽ മോചിതരാകുന്നവർക്ക് കിടപ്പാടം ഉറപ്പാക്കാൻ കൗൺസിലുകളും കമ്മ്യൂണിറ്റി പ്രൊവൈഡർമാരും ഒരുമിച്ച് പ്രവർത്തിക്കേണ്ടത് അനിവാര്യമാണെന്ന് ജീവകാരുണ്യ സംഘടനകളും ആവശ്യപ്പെടുന്നു.
പ്രൊബേഷൻ വകുപ്പിൽ കടുത്ത ജീവനക്കാരുടെ കുറവുണ്ടെന്നും അടിയന്തരമായി മേൽനോട്ടം വഹിക്കാൻ സംവിധാനമില്ലാത്തത് വലിയ വെല്ലുവിളിയാണെന്നും യൂണിയൻ പ്രതിനിധികൾ മുന്നറിയിപ്പ് നൽകുന്നുണ്ട്. കൂടാതെ മോചിതരാകുന്ന കുറ്റവാളികൾക്ക് ഏർപ്പെടുത്തുന്ന ഇലക്ട്രോണിക് ടാഗിംഗ് സംവിധാനം കൃത്യസമയത്ത് പ്രവർത്തിക്കുന്നില്ലെന്ന റിപ്പോർട്ടുകളും ആശങ്ക വർദ്ധിപ്പിക്കുന്നു. കുറ്റവാളികളിൽ പലർക്കും മാസങ്ങളോളം കാത്തിരുന്നിട്ടും ടാഗുകൾ ഘടിപ്പിക്കാൻ കഴിയുന്നില്ലെന്നും കണ്ടെത്തിയിട്ടുണ്ട്.
തടവറകൾ തകർച്ചയുടെ വക്കിലെത്തിയപ്പോഴാണ് സർക്കാർ ഈ അടിയന്തര മോചന പദ്ധതി നടപ്പിലാക്കിയതെന്ന് അധികൃതർ വ്യക്തമാക്കുന്നു. ശിക്ഷാ ഇളവ് പദ്ധതി പ്രകാരം കുട്ടികളെ ദുരുപയോഗം ചെയ്ത കേസുകളിലെ പ്രതികളെയും നരഹത്യ കുറ്റവാളികളെയും ഈ പദ്ധതിയിൽ നിന്ന് ഒഴിവാക്കിയിട്ടുണ്ട്. ജയിൽ മോചിതരാകുന്നവരുടെ പുനരധിവാസവും സുരക്ഷയും ഉറപ്പാക്കാൻ റെക്കോർഡ് തുകയാണ് സർക്കാർ പ്രൊബേഷൻ സേവനങ്ങൾക്കായി നീക്കിവെച്ചിരിക്കുന്നത്.
