ജപ്പാനിൽ വീണ്ടും ഭൂകമ്പ ഭീതി: മരണസംഖ്യ 28 ആയി; രക്ഷാപ്രവർത്തനം ഊർജ്ജിതം

ടോക്കിയോ: ദക്ഷിണ പടിഞ്ഞാറൻ ജപ്പാനിലെ ക്യുഷു ദ്വീപിലുണ്ടായ ശക്തമായ ഭൂകമ്പത്തിൽ മരണസംഖ്യ 28 ആയി ഉയർന്നു. കുമാമോട്ടോ പ്രവിശ്യയിൽ റിക്ടർ സ്കെയിലിൽ 6.8 തീവ്രത രേഖപ്പെടുത്തിയ ഭൂപചലനത്തിൽ 62-ലധികം ആളുകൾക്ക് പരിക്കേറ്റിട്ടുണ്ട്. തകർന്നടിഞ്ഞ വീടുകൾക്കും ഷോപ്പിംഗ് മാളുകൾക്കും ഇടയിൽ കുടുങ്ങിക്കിടക്കുന്നവർക്കായുള്ള തിരച്ചിൽ തുടരുകയാണ്. ഇതിനിടയിൽ രേഖപ്പെടുത്തിയ 5.8 തീവ്രതയുള്ള തുടർചലനങ്ങളും കടുത്ത ചൂടും രക്ഷാപ്രവർത്തനങ്ങൾക്ക് വലിയ വെല്ലുവിളി സൃഷ്ടിക്കുന്നുണ്ട്.

കാശീമ പട്ടണത്തിലെ പ്രമുഖ ഷൊപ്പിംഗ് മാളിൽ വാതക ചോർച്ചയെ തുടർന്നുണ്ടായ സ്ഫോടനത്തിൽ നിരവധി പേർ കുടുങ്ങിയിരുന്നു. കെട്ടിട അവശിഷ്ടങ്ങൾക്കിടയിൽ നിന്ന് പുറത്തെടുത്ത 12 പേരിൽ 6 പേർ മരണപ്പെട്ടു. യാത്സുഷിറോയിലെ പേപ്പർ മില്ലിലെ ചിമ്മിനി തകർന്നുണ്ടായ അപകടത്തിൽ അഞ്ച് ജീവനക്കാർ കൊല്ലപ്പെടുകയും നാല് പേരെ കാണാതാവുകയും ചെയ്തു. ഭൂകമ്പത്തിൽ വ്യാവസായിക മേഖലയിലുണ്ടായ വിമാന അപകടത്തിൽ ഒരു വിയറ്റ്നാം സ്വദേശിയും കൊല്ലപ്പെട്ടതായി സ്ഥിരീകരിച്ചിട്ടുണ്ട്.

ദുരന്ത ബാധിത മേഖലയിൽ ഏകദേശം 23,000 വീടുകളിൽ വൈദ്യുതി ബന്ധവും 75,000 വീടുകളിൽ കുടിവെള്ള വിതരണവും തടസ്സപ്പെട്ടു. പ്രദേശത്തെ 15,000-ത്തോളം ആളുകളെ 400 താത്കാലിക അഭയകേന്ദ്രങ്ങളിലേക്ക് മാറ്റിപ്പാർപ്പിച്ചിട്ടുണ്ട്. അയ്യായിരത്തോളം വരുന്നത് സെൽഫ് ഡിഫൻസ് ഫോഴ്സ് (SDF) അംഗങ്ങളാണ് മേഖലയിൽ രക്ഷാപ്രവർത്തനങ്ങൾക്ക് നേതൃത്വം നൽകുന്നത്. വ്യോമസേനയുടെയും നാവികസേനയുടെയും സഹായത്തോടെ ആവശ്യമായ ഭക്ഷണവും കുടിവെള്ളവും മറ്റ് അടിയന്തര സാമഗ്രികളും ദുരന്തബാധിത പ്രദേശങ്ങളിൽ എത്തിക്കുന്നുണ്ട്.

ഭൂകമ്പത്തെ തുടർന്ന് ജപ്പാനിലെ പ്രമുഖ വാഹന, സെമികണ്ടക്ടർ കമ്പനികൾ താൽക്കാലികമായി പ്രവർത്തനം നിർത്തിവെച്ചു. പ്രമുഖ കാർ നിർമ്മാതാക്കളായ ടൊയോട്ട, ഹോണ്ട എന്നിവർ തങ്ങളുടെ പ്ലാന്റുകളുടെ പ്രവർത്തനം താൽക്കാലികമായി നിർത്തി. അതോടൊപ്പം സോണി, ടോക്കിയോ ഇലക്ട്രോൺ തുടങ്ങിയ ചിപ്പ് നിർമ്മാണ കമ്പനികളും മുൻകരുതലിന്റെ ഭാഗമായി ഉത്പാദനം നിർത്തിവെച്ചിരിക്കുകയാണ്. 2016-ൽ കുമാമോട്ടോയിൽ ഉണ്ടായ ഭീമൻ ഭൂകമ്പത്തിൽ 273 പേർ മരണപ്പെട്ടിരുന്നു.