കാലാവസ്ഥാ മുന്നറിയിപ്പ്: മഡഗാസ്കറിനെ തകർത്ത് സൈക്ലോൺ ഫൈറ്റിയ; കിഴക്കൻ യൂറോപ്പിൽ കൊടുംതണുപ്പ്.
മഡഗാസ്കർ : മഡഗാസ്കറിലെ ഈ വർഷത്തെ ആദ്യ ട്രോപ്പിക്കൽ ചുഴലിക്കാറ്റായ സൈക്ലോൺ ഫൈറ്റിയ (Cyclone Fytia) വാരാന്ത്യത്തിൽ കരതൊടഞ്ഞതിനെ തുടർന്ന് ശക്തമായ മഴയും പ്രളയവും വ്യാപക നാശനഷ്ടങ്ങളും റിപ്പോർട്ട് ചെയ്യപ്പെട്ടു. ഇതുവരെ കുറഞ്ഞത് മൂന്ന് പേർ മരിക്കുകയും ഏകദേശം 28,000ത്തിലധികം പേർ ബാധിക്കപ്പെടുകയും ചെയ്തതായി രാജ്യത്തെ ദേശീയ ദുരന്തനിവാരണ ഏജൻസി അറിയിച്ചു.
വ്യാഴാഴ്ച മഡഗാസ്കറിന്റെ വടക്കുപടിഞ്ഞാറായി, വടക്കൻ മൊസാംബിക് ചാനലിലാണ് ഫൈറ്റിയ രൂപംകൊണ്ടത്. ശക്തമായ മഴയോടെയാണ് ചുഴലിക്കാറ്റ് മുന്നേറിയത്. ഏറ്റവും കൂടുതൽ ബാധിച്ച പ്രദേശങ്ങളിൽ ദിവസം ഏകദേശം 150 മില്ലീമീറ്റർ വരെ മഴ ലഭിക്കുമെന്നാണ് മുന്നറിയിപ്പ്. ഇതോടെ പ്രളയത്തിനും മണ്ണിടിച്ചിലിനും സാധ്യത വർധിച്ചു.
ചുഴലിക്കാറ്റിന്റെ പാതയിലുള്ള മേഖലകളിൽ റെഡ് അലർട്ട് പ്രഖ്യാപിച്ചിരിക്കുകയാണ്. യാത്രാ തടസ്സങ്ങളും സ്കൂൾ അടച്ചിടലുകളും ഉണ്ടാകാനിടയുണ്ടെന്നും 40,000ത്തിലധികം വീടുകൾ വെള്ളത്തിനടിയിലാകാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകി. കടലിൽ പോകുന്നവർക്കും മത്സ്യത്തൊഴിലാളികൾക്കും സുരക്ഷിത ഇടങ്ങളിൽ അഭയം തേടാൻ നിർദേശം നൽകിയിട്ടുണ്ട്.
ശനിയാഴ്ച ഫൈറ്റിയ വടക്കൻ-മധ്യ മഡഗാസ്കറിലൂടെ തെക്കുകിഴക്കൻ ദിശയിലേക്ക് നീങ്ങുമ്പോൾ കനത്ത മഴ, ശക്തമായ കാറ്റ്, കഠിനമായ കടൽസ്ഥിതി എന്നിവയാണ് റിപ്പോർട്ട് ചെയ്തത്. മെടിയോ മഡഗാസ്കറിന്റെ കണക്കുകൾ പ്രകാരം, മണിക്കൂറിൽ 90 മൈലിലധികം ശരാശരി കാറ്റുവേഗവും, 130 മൈൽ വരെ വീശിയടിച്ച കാറ്റടികളും രേഖപ്പെടുത്തി. പിന്നീട് ചുഴലിക്കാറ്റ് ട്രോപ്പിക്കൽ സ്റ്റോമായി ദുർബലമായെങ്കിലും, ഈ ആഴ്ചയും വ്യാപക തടസ്സങ്ങൾ തുടരുമെന്നാണ് വിലയിരുത്തൽ.
ഇതിനിടെ, കിഴക്കൻ യൂറോപ്പ് അതിശൈത്യത്തിലേക്ക് നീങ്ങുകയാണ്. പോളണ്ട്, യുക്രെയിൻ, ബെലാറസ് തുടങ്ങിയ രാജ്യങ്ങളിൽ താപനില ഇനിയും കുത്തനെ ഇടിയുമെന്നാണ് കാലാവസ്ഥാ പ്രവചനം. ബർലിനുവരെ പകൽ താപനില മൈനസ് ഇരട്ട അക്കങ്ങളിൽ തുടരാൻ സാധ്യതയുണ്ട്. എന്നാൽ ഏറ്റവും ആശങ്കാജനകമായത് രാത്രിയിലെ താപനിലയാണ് – ചില പ്രദേശങ്ങളിൽ -30 ഡിഗ്രി സെൽഷ്യസിനും താഴെയേക്ക് താപനില പതിക്കാം.
കിഴക്കൻ സ്കാൻഡിനേവിയയ്ക്ക് മുകളിൽ നിലനിൽക്കുന്ന ഉയർന്ന മർദ്ദവും, പടിഞ്ഞാറൻ റഷ്യയിൽ രൂപപ്പെട്ട കുറഞ്ഞ മർദ്ദവുമാണ് ഈ കൊടുംതണുപ്പിന് കാരണം. ഇതോടെ കിഴക്കൻ-വടക്കുകിഴക്കൻ കാറ്റ് വീശി അത്യന്തം തണുത്ത വായു പ്രദേശത്തേക്ക് പ്രവേശിക്കുന്നു. കൂടാതെ, കിഴക്കൻ യൂറോപ്പിലെ വ്യാപകമായ മഞ്ഞുമൂടൽ (snow cover) സൂര്യപ്രകാശം പ്രതിഫലിപ്പിക്കുകയും, ചൂട് അന്തരീക്ഷത്തിലേക്ക് വിടുകയും ചെയ്യുന്നതിലൂടെ താപനില കൂടുതൽ താഴെയിറങ്ങാൻ ഇടയാക്കുന്നു.
ലോകത്തിന്റെ വിവിധ ഭാഗങ്ങളിൽ ഒരേസമയം സംഭവിക്കുന്ന ഈ കാലാവസ്ഥാ അതിരൂക്ഷതകൾ വലിയ വെല്ലുവിളികളാണ് ഉയർത്തുന്നത്.
