എഐ സാങ്കേതികവിദ്യയിൽ ആശങ്കപ്പെടുത്തുന്ന പെരുമാറ്റങ്ങൾ വെളിപ്പെടുത്തി ഓപ്പൺഎഐ; വികസന വേഗത കുറയ്ക്കണമെന്ന് മുന്നറിയിപ്പ്.
സാൻ ഫ്രാൻസിസ്കോ: ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ സുരക്ഷയുമായി ബന്ധപ്പെട്ട് ആശങ്കപ്പെടുത്തുന്ന പുതിയ വെളിപ്പെടുത്തലുമായി ചാറ്റ്‌ജിപിടിയുടെ നിർമ്മാതാക്കളായ ഓപ്പൺഎഐ. തങ്ങളുടെ സാങ്കേതികവിദ്യയിൽ കണ്ടെത്തിയ ആറ് പുതിയ അപ്രതീക്ഷിത പെരുമാറ്റങ്ങളാണ് കമ്പനി പരസ്യമാക്കിയത്. സാധാരണ നിയന്ത്രണങ്ങൾ മറികടക്കാൻ ഒരു ഗവേഷണ മോഡൽ സ്വന്തം നോട്ട്സുകളിൽ പ്രത്യേക നിർദ്ദേശങ്ങൾ ചേർത്തുവെച്ചതും, അനുവാദമില്ലാതെ ഫയലുകൾ ഇന്റർനെറ്റിൽ അപ്‌ലോഡ് ചെയ്തതും ഇതിൽ ഉൾപ്പെടുന്നു.
മനുഷ്യന്റെ മൂല്യങ്ങൾക്കും സുരക്ഷാ ലക്ഷ്യങ്ങൾക്കും നിരക്കാത്ത തരത്തിൽ എഐ മോഡലുകൾ പെരുമാറുന്ന സാഹചര്യം നിരീക്ഷിക്കാനും അന്വേഷിക്കാനുമായി പുതിയൊരു ചട്ടക്കൂട് അവതരിപ്പിക്കുന്നതായി കമ്പനി വ്യക്തമാക്കി. നിലവിലെ വേഗതയിൽ എഐ വികസനം ഇനിയും മുന്നോട്ട് കൊണ്ടുപോകാൻ കഴിയില്ലെന്നും, സുരക്ഷാ മാനദണ്ഡങ്ങൾ പൂർണ്ണമായി ഉറപ്പുവരുത്താതെ പരമാവധി വേഗതയിൽ വളർച്ച തുടരുന്നത് ആശങ്കാജനകമാണെന്നും ഓപ്പൺഎഐ മുന്നറിയിപ്പ് നൽകുന്നു.
എഐ സാങ്കേതികവിദ്യയുടെ വളർച്ച അല്പം മന്ദഗതിയിലാക്കണമെന്ന് എതിരാളികളായ ആന്ത്രാപിക് അടക്കമുള്ള കമ്പനികളും നേരത്തെ ആവശ്യപ്പെട്ടിരുന്നു. ബയോവെപ്പുകളുടെ നിർമ്മാണത്തിന് എഐ ദുരുപയോഗം ചെയ്യപ്പെടാനുള്ള സാധ്യതകളും, ആഗോള സാമ്പത്തിക തകർച്ചയ്ക്ക് കാരണമായേക്കാവുന്ന ഭീഷണികളും വിദഗ്ധർ ചൂണ്ടിക്കാണിക്കുന്നുണ്ട്. എഐ ഏജന്റുകൾ കൂടുതൽ സ്വതന്ത്രമായി പ്രവർത്തിക്കാൻ തുടങ്ങിയതോടെ പരമ്പരാഗത സുരക്ഷാ മാർഗ്ഗങ്ങൾ ഉപയോഗിച്ച് അവയെ നിയന്ത്രിക്കുന്നത് കൂടുതൽ പ്രയാസകരമായി മാറിയിരിക്കുകയാണ്.
എഐ മോഡലുകളുടെ സുരക്ഷിതമല്ലാത്ത പെരുമാറ്റങ്ങൾ പരസ്യപ്പെടുത്തുന്നതിലൂടെ മറ്റ് ഡെവലപ്പർമാരെയും സമാനമായ സുരക്ഷാ രീതികൾ സ്വീകരിക്കാൻ പ്രേരിപ്പിക്കാനാണ് ഓപ്പൺഎഐ ലക്ഷ്യമിടുന്നത്. എങ്കിലും ഇത്തരം നിരീക്ഷണങ്ങളും വിലയിരുത്തലുകളും കമ്പനികൾ സ്വമേധയാ നടപ്പിലാക്കുന്നതാണെന്നത് ഭാവിയിലെ സുരക്ഷാ വെല്ലുവിളികൾ വർദ്ധിപ്പിക്കുന്നുണ്ടെന്ന് സാങ്കേതിക ഗവേഷകർ അഭിപ്രായപ്പെടുന്നു.
