എഐ മനുഷ്യകുലത്തെ നശിപ്പിക്കുമെന്ന പ്രചാരണങ്ങൾ അസംബന്ധം; കടുത്ത വിമർശനവുമായി എൻവിഡിയ മേധാവി ജെൻസൻ ഹുവാങ്!

സാൻ ഫ്രാൻസിസ്കോ: ആർട്ടിഫിഷ്യൽ ഇന്റലിജൻസ് സാങ്കേതികവിദ്യ മനുഷ്യകുലത്തിന്റെ നാശത്തിന് കാരണമാകുമെന്ന തരത്തിലുള്ള പ്രചാരണങ്ങൾ തള്ളി എൻവിഡിയ (Nvidia) മേധാവി ജെൻസൻ ഹുവാങ്. വരും വർഷങ്ങളിൽ എഐ മൂലം ഭൂമിയിലെ ജീവൻ അവസാനിക്കുമെന്ന വാദങ്ങൾ യാതൊരുവിധ ശാസ്ത്രീയ അടിത്തറയുമില്ലാത്തതാണെന്ന് അദ്ദേഹം വ്യക്തമാക്കി. ഇത്തരം അതിശയോക്തിപരമായ പ്രവചനങ്ങൾ ജനങ്ങളിൽ അനാവശ്യ ഭീതി പരത്തുക മാത്രമാണ് ചെയ്യുന്നതെന്നും അദ്ദേഹം വിമർശിച്ചു.

എഐ സുരക്ഷയുടെ പേരിൽ ചില കമ്പനികൾ ആവശ്യപ്പെടുന്ന പുതിയ നിയന്ത്രണങ്ങൾ നിലവിലുള്ള നിയമങ്ങളിൽ നിന്ന് രക്ഷപ്പെടാനുള്ള തന്ത്രം മാത്രമാണെന്ന് ഹുവാങ് കുറ്റപ്പെടുത്തി. സൈബർ സുരക്ഷാ ലംഘനങ്ങൾക്കും മറ്റ് ദോഷഫലങ്ങൾക്കും എതിരെ കർശനമായ നിലവിലുള്ള നിയമങ്ങൾ ആദ്യം നടപ്പിലാക്കുകയാണ് വേണ്ടതെന്നും, ഡൂംസ്ഡേ കഥകൾ പറഞ്ഞ് കമ്പനികൾ നിയമബാധ്യതകളിൽ നിന്ന് ഒളിച്ചോടാൻ ശ്രമിക്കുകയാണെന്നും അദ്ദേഹം അഭിപ്രായപ്പെട്ടു.

ചില എഐ ഗവേഷകരും പ്രമുഖ കമ്പനികളുടെ തലവന്മാരും സാങ്കേതികവിദ്യയുടെ വളർച്ച മന്ദഗതിയിലാക്കണമെന്ന് ആവശ്യപ്പെടുമ്പോൾ തന്നെ, എതിർവശത്ത് വലിയ മുന്നേറ്റത്തിനുള്ള തയ്യാറെടുപ്പുകളും നടക്കുന്നുണ്ട്. അമേരിക്കയും ചൈനയും തമ്മിൽ എഐ അപകടങ്ങൾ ഒഴിവാക്കുന്നതിനായി പുതിയ സുരക്ഷാ ചർച്ചകൾക്ക് തുടക്കം കുറിച്ചിട്ടുണ്ടെങ്കിലും, സാങ്കേതിക രംഗത്ത് പിന്നിലാവുന്നത് വലിയ സാമ്പത്തിക തിരിച്ചടികൾക്ക് കാരണമാകുമെന്ന് ടോണി ബ്ലെയർ ഇൻസ്റ്റിറ്റ്യൂട്ട് അടക്കമുള്ളവരും മുന്നറിയിപ്പ് നൽകുന്നുണ്ട്.

അതേസമയം, എഐ സാങ്കേതികവിദ്യയുടെ അതിവേഗ വളർച്ച സമ്പദ്‌വ്യവസ്ഥയിലും പൊതുസേവനങ്ങളിലും വലിയ മാറ്റങ്ങൾ സൃഷ്ടിക്കുമെങ്കിലും, ഇതിന്റെ അപകടസാധ്യതകൾ നേരിടാൻ പരമ്പരാഗത ഭരണസംവിധാനങ്ങൾ ഇനിയും പാകപ്പെട്ടിട്ടില്ലെന്നും വിദഗ്ധർ ചൂണ്ടിക്കാണിക്കുന്നു. സുരക്ഷാ മാനദണ്ഡങ്ങൾ ഉറപ്പുവരുത്തുന്നതിനൊപ്പം സാങ്കേതികവിദ്യയുടെ അനന്തസാധ്യതകൾ പ്രയോജനപ്പെടുത്തുക എന്ന വെല്ലുവിളിയാണ് ലോകരാജ്യങ്ങൾക്കുമുന്നിലുള്ളത്.