ഇസ്രായേൽ സൈനികർ നടത്തിയ വെടിവെപ്പിൽ ഏഴ് മാസം പ്രായമുള്ള ഫലസ്തീൻ കുഞ്ഞ് കൊല്ലപ്പെട്ടു.
ജെറുസലേം : വെസ്റ്റ് ബാങ്കിലെ ഹെബ്രോണിൽ സൈന്യത്തിന്റെ നിർദ്ദേശം അനുസരിച്ച് വാഹനം പൂർണ്ണമായും നിർത്തിയിട്ടിട്ടും ഇസ്രായേൽ സൈനികർ നടത്തിയ വെടിവെപ്പിൽ ഏഴ് മാസം പ്രായമുള്ള ഫലസ്തീൻ കുഞ്ഞ് കൊല്ലപ്പെട്ടു. മാതാപിതാക്കൾക്കൊപ്പം കാറിൽ സഞ്ചരിക്കുകയായിരുന്ന സാം ഫഹദ് അബു ഹൈക്കൽ എന്ന കുഞ്ഞാണ് വെടിയേറ്റ് മരിച്ചത്. കുഞ്ഞിന്റെ മാതാപിതാക്കൾക്കും വെടിവെപ്പിൽ ഗുരുതരമായി പരിക്കേറ്റിട്ടുണ്ട്. തങ്ങൾക്ക് നേരെ വാഹനം വേഗത്തിൽ ഓടിച്ചു വന്നതിനാലാണ് വെടിവെച്ചതെന്നാണ് ഇസ്രായേൽ പ്രതിരോധ സേന (IDF) അവകാശപ്പെടുന്നത്. എന്നാൽ പരിക്കേറ്റവർ നിരപരാധികളായ സാധാരണക്കാരാണെന്ന് പ്രാഥമിക അന്വേഷണത്തിൽ വ്യക്തമായതായി സൈന്യം പിന്നീട് സമ്മതിച്ചു.“സൈനികൻ ആവശ്യപ്പെട്ടതനുസരിച്ച് ഞാൻ വാഹനം പൂർണ്ണമായി നിർത്തുകയും കൈകൾ സ്റ്റിയറിംഗിൽ ഉയർത്തിപ്പിടിക്കുകയും ചെയ്ത ഉടനെയാണ് അവർ വെടിയുതിർത്തത്.”കുഞ്ഞിന്റെ പിതാവും ബെത്ലഹേം സർവ്വകലാശാലയിലെ ലക്ചററുമായ ഫഹദ് അബു ഹൈക്കൽ.
സൈന്യത്തിന്റെ വാദങ്ങൾ പൂർണ്ണമായും തള്ളിയ ഫഹദ്, വെറും പത്ത് മീറ്റർ മാത്രം അകലെയുണ്ടായിരുന്ന സൈനികന് കാറിനുള്ളിലിരിക്കുന്നത് ഒരു കുടുംബമാണെന്ന് വ്യക്തമായി കാണാമായിരുന്നുവെന്ന് പറഞ്ഞു. പകൽ വെളിച്ചമായിരുന്നതിനാലും കാറിന്റെ ഗ്ലാസുകൾ കറുപ്പിച്ചതല്ലാത്തതിനാലും ഉള്ളിലെ കാഴ്ചകൾ മറഞ്ഞിരുന്നില്ല. കുഞ്ഞിന്റെ അമ്മയുടെ കയ്യിലിരുന്ന കുഞ്ഞിന്റെ ശരീരത്തിലേക്കാണ് വെടിയുണ്ട തുളച്ചുകയറിയത്. സംഭവത്തിൽ നിഷ്പക്ഷമായ അന്വേഷണം നടത്തി കുറ്റക്കാരനായ സൈനികനെ നിയമത്തിന് മുന്നിൽ കൊണ്ടുവരണമെന്ന് ഈ കുടുംബം ആവശ്യപ്പെടുന്നു.
ഇസ്രായേൽ സൈന്യത്തിന്റെ ഭാഗത്തുനിന്നുണ്ടാകുന്ന സമാനമായ രണ്ടാമത്തെ സംഭവമാണിത്. കഴിഞ്ഞ മാർച്ച് 15-ന് താമൂൻ ഗ്രാമത്തിൽ ഇസ്രായേൽ സൈന്യം നടത്തിയ വെടിവെപ്പിൽ ഒരു ഫലസ്തീൻ ദമ്പതികളും അവരുടെ രണ്ട് ചെറിയ കുട്ടികളും കൊല്ലപ്പെട്ടിരുന്നു. അന്ന് വണ്ടിയിലുണ്ടായിരുന്ന മറ്റ് രണ്ട് കുട്ടികൾക്ക് പരിക്കേൽക്കുകയും, അതിലൊരു എട്ടുവയസ്സുകാരനെ ഇസ്രായേൽ സൈന്യം സംഭവസ്ഥലത്തുവെച്ച് ക്രൂരമായി ചോദ്യം ചെയ്യുകയും ചെയ്തതായി മനുഷ്യാവകാശ സംഘടനയായ ‘ബിത്സെലെം’ (B’Tselem) വെളിപ്പെടുത്തി. പരിക്കേറ്റവർക്ക് അടിയന്തിര ചികിത്സ നൽകാൻ എത്തിയ ആംബുലൻസുകളെപ്പോലും സൈന്യം തടഞ്ഞുവെച്ചതായും റിപ്പോർട്ടുകളുണ്ട്.
ഐക്യരാഷ്ട്രസഭയുടെ (UN) ഏറ്റവും പുതിയ കണക്കുകൾ പ്രകാരം, യുദ്ധം ആരംഭിച്ചതുമുതൽ വെസ്റ്റ് ബാങ്കിലും കിഴക്കൻ ജറുസലേമിലുമായി ആയിരത്തിലധികം ഫലസ്തീനികൾ കൊല്ലപ്പെട്ടിട്ടുണ്ട്; ഇതിൽ 240 ലധികം പേർ നിരപരാധികളായ കുട്ടികളാണ്.
