ഇംഗ്ലണ്ടിലെ സ്കൂളുകളിൽ വറുത്ത ഭക്ഷണങ്ങൾക്ക് നിരോധനം: ഉച്ചഭക്ഷണ ചട്ടങ്ങളിൽ വൻ മാറ്റങ്ങളുമായി യുകെ സർക്കാർ.

ലണ്ടൻ: കുട്ടികളിലെ അമിതവണ്ണവും ആരോഗ്യപ്രശ്നങ്ങളും പരിഹരിക്കുന്നതിനായി ഇംഗ്ലണ്ടിലെ സ്കൂളുകളിൽ വിളമ്പുന്ന ഭക്ഷണത്തിന്റെ ഗുണനിലവാര ചട്ടങ്ങളിൽ ചരിത്രപരമായ പരിഷ്കാരങ്ങളുമായി സർക്കാർ. സ്കൂളുകളിൽ ആഴത്തിൽ വറുത്തതും പൊരിച്ചതുമായ (Deep-fried) ഭക്ഷണങ്ങൾ നൽകുന്നത് പൂർണ്ണമായും നിരോധിച്ചു. ഒരു പതിറ്റാണ്ടിനിടെ സ്കൂൾ ഭക്ഷണക്രമത്തിൽ വരുത്തുന്ന ഏറ്റവും വലിയ മാറ്റമാണിതെന്ന് വിദ്യാഭ്യാസം മന്ത്രാലയം വ്യക്തമാക്കി.

2027 മുതൽ നിലവിൽ വരുന്ന പുതിയ മാനദണ്ഡങ്ങൾ പ്രകാരം ഫ്രെഷ് പഴങ്ങൾ, പച്ചക്കറികൾ, ധാന്യങ്ങൾ എന്നിവ ഭക്ഷണത്തിൽ നിർബന്ധമാക്കും. കേക്ക്, മറ്റ് മധുരപലഹാരങ്ങൾ എന്നിവ നൽകുന്നത് ആഴ്ചയിൽ ഒന്നോ രണ്ടോ ദിവസമായി ചുരുക്കും. സംസ്കരിച്ച മാംസം (Processed meat) ആഴ്ചയിൽ ഒരു ദിവസം മാത്രമേ അനുവദിക്കൂ. ഇതിനുപുറമെ, സ്കൂളുകളിലെ ബ്രേക്ക്ഫാസ്റ്റ് ക്ലബ്ബുകളിൽ പാസ്ട്രികൾ, ഫ്രൈ ചെയ്ത മുട്ട, മധുരം കൂടുതലുള്ള ധാന്യഭക്ഷണങ്ങൾ (Cereal) എന്നിവ ഒഴിവാക്കാനും നിർദ്ദേശമുണ്ട്.

കുട്ടികളുടെ മാനസികവും ശാരീരികവുമായ വളർച്ചയ്ക്ക് പോഷകാഹാരം അത്യാവശ്യമാണെന്നും പുതിയ തീരുമാനം സ്വാഗതാർഹമാണെന്നും അധ്യാപക സംഘടനകളും രക്ഷിതാക്കളും പ്രതികരിച്ചു. സ്കൂളുകൾ പുതിയ പോളിസികളും മെനുവും ഓൺലൈനായി പ്രസിദ്ധീകരിക്കണമെന്നും ഭക്ഷണത്തിന്റെ ഗുണനിലവാരം ഉറപ്പാക്കാൻ കൃത്യമായ പരിശോധനകൾ നടത്തുമെന്നും വിദ്യാഭ്യാസ സെക്രട്ടറി ലൂസി പവൽ അറിയിച്ചു.