ഇംഗ്ലണ്ടിലെയും വെയിൽസിലെയും ക്രൗൺ കോടതികളിൽ എഐ അസിസ്റ്റന്റുകൾ പരീക്ഷണാടിസ്ഥാനത്തിൽ കൊണ്ടുവരുമെന്ന് ഡെപ്യൂട്ടി പ്രധാനമന്ത്രി.

ലണ്ടൻ’ : യുകെയിലെ ക്രൗൺ കോടതികളിൽ കേസുകളുടെ കെട്ടിക്കിടപ്പ് ഒഴിവാക്കാൻ ആർട്ടിഫിഷ്യൽ ഇന്റലിജൻസ് (AI) അസിസ്റ്റന്റുകളെ പരീക്ഷണാടിസ്ഥാനത്തിൽ കൊണ്ടുവരുന്നതായി ഡെപ്യൂട്ടി പ്രധാനമന്ത്രി ഡേവിഡ് ലാമി പ്രഖ്യാപിക്കും. ലണ്ടൻ ടെക് വീക്കിൽ ചൊവ്വാഴ്ച നടത്തുന്ന പ്രസംഗത്തിലാണ് അദ്ദേഹം ഈ സുപ്രധാന പ്രഖ്യാപനം നടത്തുക. വിചാരണയ്ക്ക് തയ്യാറായ കേസുകൾ കണ്ടെത്താനും സമാനമായ ഹർജികൾ തരംതിരിക്കാനും ജഡ്ജിമാരെ സഹായിക്കുന്ന പുതിയ എഐ ടൂൾ ഉപയോഗിക്കാനാണ് നീക്കമെന്ന് നീതിന്യായ മന്ത്രാലയം വ്യക്തമാക്കി.

എന്നാൽ, കോടതി ജീവനക്കാരുടെ എണ്ണം കുറയ്ക്കാനോ അവർക്കുള്ള ഫണ്ടിങ് വെട്ടിക്കുറയ്ക്കാനോ സാങ്കേതികവിദ്യയെ ഒരു ആയുധമാക്കരുതെന്ന് രണ്ട് ലക്ഷത്തിലധികം സോളിസിറ്റർമാരെ പ്രതിനിധീകരിക്കുന്ന ലോ സൊസൈറ്റി മുന്നറിയിപ്പ് നൽകി. പരീക്ഷണാടിസ്ഥാനത്തിലുള്ള ഈ പദ്ധതി കൃത്യമായി വിലയിരുത്തണമെന്നും അതിന്റെ വിവരങ്ങൾ പരസ്യപ്പെടുത്തണമെന്നും സംഘടന ആവശ്യപ്പെട്ടു. മു

ഇംഗ്ലണ്ടിലും വെയിൽസിലുമായി ക്രൗൺ കോടതികളിൽ കെട്ടിക്കിടക്കുന്ന കേസുകളുടെ എണ്ണം ഈ വർഷം എൺപതിനായിരവും (80,000) കടന്ന് റെക്കോർഡ് വേഗത്തിലാണ് മുന്നേറുന്നത്. കോവിഡിന് മുൻപുള്ള 2019-ലെ കണക്കുകളേക്കാൾ (38,108 കേസുകൾ) ഇരട്ടിയാണിത്. വിവരവകാശ നിയമപ്രകാരം ലഭിച്ച കണക്കുകൾ അനുസരിച്ച് 2,600-ലധികം വിചാരണകൾ 2028-ലേക്ക് നീണ്ടിരിക്കുകയാണ്; ചില കേസുകൾ 2030-ൽ മാത്രമാണ് കോടതി പരിഗണിക്കുക. ഈ വലിയ പ്രതിസന്ധി പരിഹരിക്കാൻ ജൂറി വിചാരണകളുടെ എണ്ണം കുറയ്ക്കാനും സർക്കാർ ആലോചിക്കുന്നുണ്ട്.

എഐ സാങ്കേതികവിദ്യയുടെ അമിത ഉപയോഗം വരുത്തിവെക്കുന്ന അപകടങ്ങളെക്കുറിച്ചും ആശങ്ക ശക്തമാണ്. ഖത്തർ നാഷണൽ ബാങ്കുമായി ബന്ധപ്പെട്ട ഒരു കേസിൽ എഐ ടൂൾ നൽകിയ 45 കേസ് ഉദാഹരണങ്ങളിൽ 18 എണ്ണവും വ്യാജമായിരുന്നു എന്ന് പിന്നീട് കണ്ടെത്തിയിരുന്നു. അതുപോലെ മൈക്രോസോഫ്റ്റ് കോപൈലറ്റ് (Microsoft Copilot) നൽകിയ തെറ്റായ വിവരങ്ങൾ വിശ്വസിച്ച് മുൻപ് പോലീസ് ഫുട്ബോൾ ആരാധകർക്ക് വിലക്കേർപ്പെടുത്തിയ സംഭവവും ഉണ്ടായിട്ടുണ്ട്. സാങ്കേതികവിദ്യയ്ക്ക് ഒരിക്കലും കോടതി ജീവനക്കാർക്ക് പകരമാകാൻ കഴിയില്ലെന്നും നീതിന്യായ വ്യവസ്ഥയുടെ സുതാര്യത ഉറപ്പാക്കാൻ ശക്തമായ സുരക്ഷാ മാനദണ്ഡങ്ങൾ വേണമെന്നും ലോ സൊസൈറ്റി ചീഫ് എക്സിക്യൂട്ടീവ് ഇയാൻ ജെഫ്രി വ്യക്തമാക്കി.