ആഗോള പ്രതിസന്ധികൾക്കെതിരെ മുന്നറിയിപ്പുമായി മാർപ്പാപ്പ; സ്പെയിൻ പാർലമെന്റിൽ ചരിത്രപ്രസംഗം.
മാഡ്രിഡ്: ലോകം കടുത്ത ആത്മീയ-സാംസ്കാരിക പ്രതിസന്ധിയിലൂടെയാണ് കടന്നുപോകുന്നതെന്ന് ഫ്രാൻസിസ് മാർപ്പാപ്പയ്ക്ക് ശേഷമെത്തിയ പുതിയ മാർപ്പാപ്പ ലിയോ പതിനാലാമൻ. സ്പെയിൻ പാർലമെന്റിൽ നടത്തിയ ചരിത്രപ്രധാനമായ പ്രസംഗത്തിലാണ് അദ്ദേഹം ലോകരാജ്യങ്ങൾക്ക് ഈ മുന്നറിയിപ്പ് നൽകിയത്. വിവിധ രാജ്യങ്ങളിലെ അക്രമങ്ങൾ, ധ്രുവീകരണം, പരസ്പര അവിശ്വാസം എന്നിവയെല്ലാം ഈ പ്രതിസന്ധിയുടെ ലക്ഷണങ്ങളാണെന്ന് അദ്ദേഹം ചൂണ്ടിക്കാട്ടി. ആയുധങ്ങൾ കൊണ്ട് താൽക്കാലികമായി ഉണ്ടാക്കുന്ന നിശബ്ദതയല്ല, മറിച്ച് നീതിയും അന്താരാഷ്ട്ര നിയമങ്ങളും പാലിച്ചുകൊണ്ടുള്ള സമാധാനമാണ് ലോകത്തിന് ആവശ്യമെന്നും അദ്ദേഹം ഓർമ്മിപ്പിച്ചു.
വലതുപക്ഷ രാഷ്ട്രീയ ഗ്രൂപ്പുകളിൽ നിന്ന് വലിയ എതിർപ്പുകൾ നേരിടുന്ന കുടിയേറ്റ വിഷയത്തിൽ സ്പെയിൻ സർക്കാരിന്റെ നിലപാടുകളെ മാർപ്പാപ്പ ശക്തമായി പിന്തുണച്ചു. അഭയാർത്ഥികളെയും കുടിയേറ്റക്കാരെയും സംരക്ഷിക്കേണ്ടത് ഓരോ രാജ്യത്തിന്റെയും ധാർമ്മികമായ കടമയാണ്. കുടിയേറ്റത്തിന് കാരണമാകുന്ന ദാരിദ്ര്യം, യുദ്ധങ്ങൾ, കാലാവസ്ഥാ വ്യതിയാനം തുടങ്ങിയ അടിസ്ഥാന പ്രശ്നങ്ങൾക്ക് അന്താരാഷ്ട്ര സമൂഹം പരിഹാരം കാണണം. അവർക്കായി സുരക്ഷിതവും നിയമപരവുമായ വഴികൾ ഒരുക്കണമെന്നും അദ്ദേഹം ആവശ്യപ്പെട്ടു. ആദ്യമായിട്ടാണ് ഒരു മാർപ്പാപ്പ സ്പാനിഷ് പാർലമെന്റിനെ അഭിസംബോധന ചെയ്യുന്നത്.
മനുഷ്യജീവന്റെ പ്രാധാന്യത്തെക്കുറിച്ചും അദ്ദേഹം പ്രസംഗത്തിൽ എടുത്തുപറഞ്ഞു. ഗർഭധാരണം മുതൽ സ്വാഭാവിക മരണം വരെയുള്ള മനുഷ്യജീവൻ എല്ലാ സാഹചര്യങ്ങളിലും സംരക്ഷിക്കപ്പെടണം. ഗർഭച്ഛിദ്രം, ദയാവധം എന്നിവ അനുവദിക്കുന്ന സ്പെയിനിലെ നിലവിലെ നിയമങ്ങളുടെ പശ്ചാത്തലത്തിലായിരുന്നു മാർപ്പാപ്പയുടെ ഈ പ്രതികരണം. അതോടൊപ്പം, കത്തോലിക്കാ സഭയിലെ ചില പുരോഹിതന്മാർ ഉൾപ്പെട്ട ലൈംഗിക പീഡന പരാതികളെ ഒരു മഹാമാരി എന്ന് വിശേഷിപ്പിച്ച അദ്ദേഹം, ഇരകൾക്ക് നീതിയും നഷ്ടപരിഹാരവും ഉറപ്പാക്കാൻ സഭ ബാധ്യസ്ഥരാണെന്നും വ്യക്തമാക്കി.
