അഭയാർത്ഥി ബോട്ട് തടഞ്ഞ് തീവ്ര വലതുപക്ഷ പ്രതിഷേധം; പോർട്സ്മത്തിൽ പോലീസ് വാഹനങ്ങൾ തകർത്തു.

പോർട്സ്മത്ത്: യുകെയിലെ പോർട്സ്മത്ത് തീരത്തേക്ക് 140 അഭയാർത്ഥികളുമായി എത്തിയ വലിയ ബോട്ട് അധികൃതർ പിടിച്ചെടുത്തതിന് പിന്നാലെ മേഖലയിൽ കടുത്ത പ്രതിഷേധവുമായി വലതുപക്ഷ സംഘടനകൾ. അഭയാർത്ഥികളെ പ്രോസസിംഗ് സെന്ററിലേക്ക് കൊണ്ടുപോകുന്നത് തടയാൻ നൂറുകണക്കിന് ആളുകളാണ് പാതകൾ ഉപരോധിച്ചത്. വസ്ത്രവും മാസ്കും ധരിച്ചെത്തിയ പ്രതിഷേധക്കാർ പോലീസുമായി ഏറ്റുമുട്ടുകയും രണ്ട് പോലീസ് വാഹനങ്ങളുടെ  സ്ക്രീനുകൾ തകർക്കുകയും ചെയ്തു.

പോർട്സ്മത്ത് മേഖലയിൽ ഇത്രയധികം അഭയാർത്ഥികൾ അടങ്ങിയ ബോട്ട് എത്തുന്നതും, ഇവരെ മാറ്റുന്നത് തടയാൻ ഇത്രയും വലിയ ജനക്കൂട്ടം രംഗത്തിറങ്ങുന്നതും ആദ്യ സംഭവമാണ്. വിവരമറിഞ്ഞ് ഹെലികോപ്റ്ററും വിമാനവും ലൈഫ് ബോട്ടുകളും ഉൾപ്പെടെ വൻ സുരക്ഷാ സജ്ജീകരണങ്ങളാണ് അധികൃതർ തീരത്ത് ഒരുക്കിയത്. പ്രതിഷേധം ശക്തമായതോടെ പോലീസ് പ്രദേശം ഒഴിപ്പിക്കാൻ ഉത്തരവിടുകയും ജനങ്ങളോട് പ്രസ്തുത ഭാഗം ഒഴിവാക്കാൻ അഭ്യർത്ഥിക്കുകയും ചെയ്തു.

ജനങ്ങളെ ഭീതിയിലാഴ്ത്തുന്ന തരത്തിലുള്ള പ്രതിഷേധക്കാരുടെ അക്രമ സ്വഭാവത്തെ യുകെ സർക്കാർ ശക്തമായി അപലപിച്ചു. സമാധാനപരമായ പ്രതിഷേധങ്ങൾക്ക് ജനാധിപത്യത്തിൽ അവകാശമുണ്ടെങ്കിലും അതിക്രമങ്ങൾ വെച്ചുപൊറുപ്പിക്കില്ലെന്ന് ഭരണകൂടം വ്യക്തമാക്കി. അനധികൃത കുടിയേറ്റക്കാരുമായി എത്തുന്ന ചെറുബോട്ടുകളുടെ എണ്ണത്തിൽ കഴിഞ്ഞ വർഷത്തെ അപേക്ഷിച്ച് 40 ശതമാനത്തിലധികം കുറവുണ്ടായിട്ടുണ്ടെന്ന് ഹോം ഓഫീസ് വക്താവ് കൂട്ടിച്ചേർത്തു.

മനുഷ്യക്കടത്തുകാർ പുതിയ കടൽമാർഗ്ഗങ്ങൾ തിരഞ്ഞെടുക്കുന്നതിന്റെ ഭാഗമായാണ് ബോട്ട് പോർട്സ്മത്ത് തീരത്തേക്ക് എത്തിയത്. മുൻദിവസം ഡോവർ തുറമുഖത്ത് നടന്ന പ്രതിഷേധങ്ങൾക്ക് സമാനമായ അക്രമങ്ങളാണ് പോർട്സ്മത്തിലും അരങ്ങേറിയത്. അതിർത്തി സുരക്ഷ ശക്തമാക്കാൻ ഫ്രഞ്ച് തീരങ്ങളിൽ കൂടുതൽ സേനയെ വിന്യസിക്കാൻ കരാറിലേർപ്പെട്ടിട്ടുണ്ടെന്നും കുടിയേറ്റ തടസ്സങ്ങൾ പൂർണ്ണമായി ഇല്ലാതാക്കുമെന്നും സർക്കാർ ഉറപ്പുനൽകി.